Exodus 15

Ilonggo (Maayong Balita nga Biblia (2012))

← Chapter 14 Jump to: Chapter 16 →

1Dayon si Moises kag ang mga Israelinhon nagkanta sini nga ambahanon sa Ginoo: “Magaamba ako sa Ginoo, tungod kay dalayawon ang iya pagdaog, gintagbong niya sa dagat ang mga kabayo kag ang mga nagasakay sa ila.

2Ang Ginoo amo ang akon makusog nga mangangapin, sia amo ang nagluwas sa akon. Sia ang akon Dios, gani dayawon ko sia, sia ang Dios sang akon amay, gani ambahon ko ang iya pagkagamhanan.

3Ang Ginoo isa ka hangaway, ang Ginoo amo ang iya ngalan.

4“Gintagbong niya sa dagat ang mga karwahi kag ang mga hangaway sang hari sang Ehipto, nagkalalumos sa Mapula nga Dagat ang iya pinili nga mga opisyales.

5Ang madalom nga dagat nagtabon sa ila, naglugdang sila sa kadadalman kaangay sang bato.

6“Ang kusog sang imo tuo nga kamot makatilingala, O Ginoo, nga nagalaglag sang imo mga kaaway.

7Sa imo gamhanan nga pagdaog ginlutos mo ang imo mga kaaway, ang imo kaakig naghingalayo, kag nagasunog sa ila subong sang dagami.

8Naghuyop ka sa dagat kag naghawa ang tubig, nagtindog ini subong sang pader, ang madalom nga dagat nagtig-a tubtob sa iya kadadalman.

9Ang kaaway nagsiling, ‘Lagson ko sila, kag dakpon, bahinbahinon ko ang ila mga manggad, kag kuhaon ko sa ila ang tanan ko nga naluyagan, gabuton ko ang akon espada, kag sa akon kusog kuhaon ko ang tanan nga yara sa ila.’

10Pero sa isa mo ka paghuyop, O Ginoo, ang dagat nagtabon sa ila, naglugdang sila subong sang tingga, sa makakulogmat nga dagat.

11“O Ginoo, sin-o bala sa mga diosdios ang makatupong sa imo? Sin-o bala ang makapareho sa imo nga makatilingala ang pagkabalaan? Sin-o bala ang kaangay sa imo, nga makahimo sang mga milagro kag mga buhat nga gamhanan?

12Gin-untay mo ang imo tuo nga kamot, kag ang duta naglamon sa amon nga kaaway.

13Matutom ka sa imo saad, gintuytoyan mo ang imo mga gintubos. Sa imo kusog gindala mo sila sa imo balaan nga duta.

14Ang mga pungsod nakabati, kag nagakurog sila sa kahadlok. Ang kahadlok naglambot sa mga Filistinhon.

15Ang mga pangulo sang Edom ginakugmat, ang mga maisog sa Moab ginakurog. Ang mga pumoluyo sa Canaan, nadulaan sing kaisog.

16Ang kakugmat kag kahadlok nagaabot sa ila, nakita nila ang imo kusog, O Ginoo, kay nagapahimuyong sila sa kahadlok tubtob nakaagi ang imo mga tawo, O Ginoo, ang mga tawo nga imo ginluwas gikan sa pagkaulipon.

17Pasudlon mo sila kag itanom sa imo kaugalingon nga bukid, sa lugar nga imo ginhimo nga balay, O Ginoo, sa Templo, O Ginoo, nga imo ginpatindog.

18Ikaw, O Ginoo, manginhari sa walay katubtoban.”

19Ang mga kabayo sang hari, upod sang iya mga karwahi kag sang iya mga soldado nga nagasakay sa kabayo, nagpadayon sa paglakat sa dagat kag ang Ginoo nagpabalik sang tubig, kag gintabunan sila. Pero ang mga Israelinhon naglakat sa ginpamala nga duta sa tunga sang dagat.

20Si Miriam nga propeta, ang utod ni Aaron, nagkuha sing iya tamborin, kag ang tanan nga mga babayi nagsunod sa iya nga nagatukar sang ila mga tamborin kag nagasinaot.

21Si Miriam nag-amba sa ila sang masunod: “Magkanta sa Ginoo, tungod kay dalayawon ang iya pagdaog, gintagbong niya sa dagat, ang mga kabayo kag ang mga nagasakay sa ila.”

22Dayon ginpangulohan ni Moises ang mga Israelinhon halin sa Mapula nga Dagat, kag nagpakadto sila sa desierto sang Sur. Sa sulod sang tatlo ka adlaw naglakat sila sa desierto, kag wala sila sing nakita nga tubig.

23Sang ulihi nakaabot sila sa lugar nga ginatawag Mara, pero ang tubig didto mapait gid sa bagay nga indi sila makainom sini. Gani gintawag ini nga Mara.

24Ang mga tawo nagreklamo kay Moises kag nagpamangkot, “Ano bala ang amon imnon?”

25Si Moises nagpangamuyo sing hugot sa Ginoo, kag ginpakita sang Ginoo sa iya ang isa ka utod nga kahoy. Ginhaboy niya ini sa tubig kag ang tubig nanginmaayo na imnon. Didto ang Ginoo naghatag sa ila sing mga pagsulondan nga ila igakabuhi kag didto iya man sila gintilawan.

26Nagsiling sia, “Kon kamo magtuman sing bug-os sa akon, ang Ginoo nga inyo Dios, kag maghimo sang ginakabig ko nga matarong, kag magtuman sang akon mga sugo, indi ako magsilot sa inyo paagi sining mga balatian nga ginpadala ko sa mga Ehiptohanon. Ako amo ang Ginoo nga nagaayo sa inyo.”

27Karon nag-abot sila sa Elim, sa diin may dose ka mga tuboran kag setenta ka mga kahoy nga palma. Didto nagpatindog sila sang ila mga tolda sa ubay sang tubig.

← Chapter 14 Jump to: Chapter 16 →