Matthew 11

Ika 2018 Bible

← Chapter 10 Jump to: Chapter 12 →

1Ogẹn Jizọsị gi gwagụ ndị nsọnmazụụn a mmẹbụọ hụ ihiẹn ndị wẹ jẹnkọ d'e mẹ, ọ nọ gha ebẹhụ pụ d'a kuzisọnmẹ imẹ obodo ndị rị ẹgbẹrẹ hụ, e zi ozi ọ rị e zi.

2Ogẹn Jọnụ hụn e mẹ mirin-Chuku gi nọ ụlọ-ngan nụ ihiẹn ndị hụ Kraịstị rị e mẹ, ọ nọ zi ndị nsọnmazụụn a d'e kunrun Kraịstị,

3sị a, “Ịyụ wụdẹ nwan onyẹ ahụn wẹ rị a tụ ẹnya a ra ẹnyi sikọ d'e lemẹ ẹnya onyẹ ọzọ?”

4Jizọsị nọ za wẹ, sị, “Jẹn ni d'a gwa Jọnụ ihiẹn ụnụ rị a nụ lẹ ihiẹn ụnụ rị a hụn:

5ndị ẹnya-ishi a hụnmagụọ ụzọ; ndị ngụrọ e jẹnmẹgụọ ijẹn; ndị oti hụ a dịnhịn, a wụbehi ndị rụnị; ndị odin a nụmagụọ ihiẹn; wẹ hụ e weli ndị nwụnhụnnị, e zi ndị igbẹnnyẹ oziọma.

6Ngọzi ya rị nị onyẹ gilẹni ihiẹn ọ hụn m ẹhụ nwọnmẹ obi-ẹbụọ!”

7Ndị nsọnmazụụn Jọnụ a pụ, Jizọsị nọ gwama igunrun hụ oku Jọnụ, sị, “Kị ụnụ jẹn imẹ atụ d'e lee? Ẹfịfịa ufere rị e buhunmẹ?

8Kị ụnụ jẹnzi nwan d'e lee? Onyẹ yi ẹkwa ṅanrannị? Kaka, ọgwa ndị-nze kẹ wẹ nọ a hụn ndị yi ẹkwa rị mma ṅanrannị.

9Kị ụnụ jẹnzi nwan d'e lee? Onyẹ-amụma? Ẹghẹẹ, m sị ụnụ n'ọ kadẹ onyẹ-amụma.

10Hụnnị wụ onyẹ hụ wẹ de banyen'ẹ, sị, ‘Lee ẹ, m zila onyẹ-ozi m d'e burun'i ụzọ; ịya sikọ d'a kwan'ị ụzọ.’

11“Ezioku kẹ m rị a gwa ụnụ, imẹ ndị ikpoho mụ, onwọnni onyẹ ka Jọnụ hụn e mẹ mirin-Chuku. Kanị, onyẹ hụn kachanrịn ntịn imẹ Alị-eze elu-igwee ka a.

12Gha ogẹn Jọnụ hụn e mẹ mirin-Chuku gi bidọn ọrụn a d'e ru ogẹnni, Alị-eze elu-igwee hụ e gi ikẹn-ikẹn a gha ihun, ndị ghalẹni e gi ẹ e gu egu hụzị e gi ikẹn a banye ẹ.

13Makẹni, ndị-amụma ile lẹ Iwu Mozizi kusọnmẹ uche Osolobuẹ d'e ru ogẹn Jọnụ gi bịa.

14Omẹni ụnụ jẹnkọ d'e kweri, Jọnụ lẹ enwẹn ẹ wụ Ẹlaịja hụ wẹ de n'ọ lala alala.

15Onyẹ hụn nwọn ntịn ya nụ.

16“Kị m'e gi nwan jeni agbọnị? Agbọnị nọ kẹ ụmụẹka nọdị alị imẹ afịa, a hị ibe wẹ,

17‘Ẹnyi e gbuni ụnụ ẹkpịrị, ụnụ etẹnni egu; ẹnyi a bụye hụn wẹ gi a kwan ozun, ụnụ akwannị ẹkwan.’

18“Makẹni, kẹ Jọnụ bịa, o rini, ọ ranị, wẹ sị, ‘Eje-mmọn rị imẹ ẹ.’

19Mmẹ Nwa nke Ịhịan a bịa, m hụ e ri, a ra, wẹ sị, ‘Lee onyẹ okẹn ihiẹn-oriri, onyẹ-manya, ọwụ ndị ụgwọ-isi lẹ ndị ọzọ wẹ gi njọ marịn.’ Kanị, ihiẹn amamihiẹn rụn kẹ wẹ gi a marịn amamihiẹn.”

20Ya Jizọsị nọ banmanị obodo ndị hụ ọ ka ọrụn-atụmẹnya a rụn imẹ wẹ mban, makẹni erogharịnị wẹ.

21Ọ sị, “Ndị Korazini, o sikọ d'a fụ ụnụ ọrụn! Ndị Bẹtisaịda, o sikọ d'a fụ ụnụ ọrụn! Makẹni, omẹni alị Taya-lẹ-Sidọnụ mẹgbu enwẹn wẹ njọ kẹ wẹ te nọ rụn ọrụn-atụmẹnya ile wẹ rụn imẹ ụnụ, nkẹ o tekẹ ndị Taya-lẹ-Sidọnụ rogharị, yiri ẹkwa achọ, kpọn ntụn kpu enwẹn wẹ gi ghọsị nị e rogharịgụọ wẹ.

22M rị nwan a gwa ụnụ, e mẹrukọ wẹ Taya-lẹ-Sidọnụ ihiẹn wẹ k'e mẹ ụnụ Ụhụọhịn Okinkin-ikpe.

23Kẹ ịyụ, obodo Kapanọm, i ro nị wẹ k'e bushi i elu-igwee? Mba, wẹ k'e wetudẹ i alị-mmọn. Makẹni, omẹni alị Sodọm mẹgbu enwẹn wẹ njọ kẹ wẹ nọ rụn ọrụn-atụmẹnya ile wẹ rụn imẹ i, nkẹ ọ hụkwọ d'e ru tannị.

24M rị nwan a gwa ị, emẹrukọ wẹ Sodọm ihiẹn wẹ k'e mẹ i Ụhụọhịn Okinkin-ikpe!”

25Ogẹn hụ kẹ Jizọsị gi sị, “M rị a kpanmịn ị Baba, Onyẹ nwọn elu-igwee lẹ ụwa, makẹni i zuemẹni ndị marịn ihiẹn lẹ ndị nwọn uche ihiẹn ndịnị, we wẹ ghọsị ụmụ-ndu.

26Ẹghẹẹ Baba, ẹnịna k'ọ sụọ ị.

27Nẹdi m e bugụọ ihiẹn ile che m ẹka. Onwọnni onyẹ marịn Nwa mmanị Chuku-Nẹdi sụọ; onwọnzikwọnị onyẹ marịn Chuku-Nẹdi wezụka Nwa lẹzi onyẹ ọwụlẹ Nwa chọ n'o mẹ ẹ marịn Chuku-Nẹdi.

28“Bịa nị d'e kunrun m, ụnụ ile ndụn gụ, bu ibu nyịnnị, m jẹnkọ d'e ye ụnụ ezumikẹn.

29Yiri ni agbụn yoku m, ụnụ a mụnarịn m; makẹni, m rị jụụ, e welụa enwẹn m alị imẹ obi. Ụnụ mẹ ẹ, umẹ-ndụn ụnụ e nwọnrin ezumikẹn.

30Agbụn yoku m ara kẹnrẹn; ibu m'e buye ịhịan ara nyịn.”

← Chapter 10 Jump to: Chapter 12 →