Matthew 7

Ika 2018 Bible

← Chapter 6 Jump to: Chapter 8 →

1“Amalẹ ndị-ọzọ ikpe makẹ Chuku gha a ma ị ikpe.

2K'i dọn han eṅẹn kẹ Osolobuẹ k'a dọn hann'ị. Ẹka i gi sọn ịhịan kẹ Osolobuẹ k'e gi sọn i.

3“Kị haịn i gi a hụn irinrin-nkụn rị nwẹnẹ i ẹnya, kanị y'a ra hụn ogwe-nkụn rị yụ nwẹn ẹnya?

4Nanị kẹ y'e dọnzi sị nwẹnẹ i, ‘Nị m wepụ ị irinrin-nkụn rị ị ẹnya’ bụ yụ nwẹn bu ogwe-nkụn ẹnya?

5Onyẹ ihunnaị! Wepụgụ ogwe-nkụn rị ị ẹnya, kẹni i sa ẹka legha irinrin-nkụn rị nwẹnẹ i ẹnya ọhụnma wepụ.

6“Eyekwọlẹ ni nkitẹ ihiẹn rị nsọ; atụkwọlẹ ihiẹn rị mkpa yeni ezin, amamgbe w'a zọkpụkpọ a, maye ụnụ ọgụn, dọrinrin ụnụ.

7“Rịọ nị, wẹ sikọ d'e ye ụnụ; chọ nị, ụnụ k'a hụn; dụ nị ẹka, wẹ k'a kpọpụnị ụnụ ụzọ.

8Makẹni onyẹ ọwụlẹ hụn rịọnị k'e nwọnhẹn; onyẹ ọwụlẹ hụn chọnị k'a hụn; wẹ sikọ d'a kpọpụnị onyẹ ọwụlẹ dụ ẹka ụzọ.

9Imẹ ụnụ ile, onyẹ k'e ye nwa a ọmụma omẹni ọ rịọ a brẹdi

10mọbụ ye ẹ agwọ omẹni ọ rịọ a azụn?

11O mẹ nwan nị ụnụ ndị njọ ma ye ụmụ ụnụ ezigbo ihiẹn, Nẹdi ụnụ rị elu-igwee e yekọ ndị rị a rịọ a ihiẹn ezigbo ihiẹn karị?

12“Ya wụ, imẹ ihiẹn ile, e mẹ ndị ọzọ ihiẹn i chọ nị wẹ mẹ i: ọnwan wegbama ihiẹn ile Iwu lẹ ndị-amụma ku.

13“Ghashi ni ọnụ-mgbọn hụ mẹ warara. Makẹni, ọnụ-mgbọn wẹ gha a banye ntikpọ shịa ashịa, ụzọ a e ruchanrịn ịhịan a gha; ndị ghakọ ụzọ hụ bu ọda.

14Kanị, ọnụ-mgbọn wẹ gha a banye ndụn mẹ warara ọda-ọda, w'a fagha ụzọ a a fagha; ndị a hụnn'a ebuni ọda.

15“Kpachanpụ nị nị ndị amụma-ntụ ẹnya: w'e kọnrin kẹ atụnrụn, a bịa d'e kunrun ụnụ, kanị, eje-ẹwọrọ kẹ wẹ wụ imẹ.

16Mkpụrụ wẹ kẹ ụnụ k'e gi marịn wẹ. Ọgọgọ ara mị ogbe vaịnị; abị-ogun ara mị ogbe figi.

17Ya wụ, osisi rị mma sikọ d'a mị mkpụrụ rị mma, kanị osisi rịlẹni mma sikọ d'a mị mkpụrụ rịlẹni mma.

18Osisi rị mma as'ẹka mị mkpụrụ rịlẹni mma; osisi rịlẹni mma as'ẹka mị mkpụrụ rị mma.

19Osisi ọwụlẹ mịlẹni mkpụrụ rị mma, e gbutu wẹ ẹ tụye ọkụn.

20Ẹghẹẹ, mkpụrụ wẹ mị k'i jẹnkọ d'e gi marịn wẹ.

21“Ẹlẹ ndị ile a kpọ m ‘Di-nwọnni-ẹnyi’, ‘Di-nwọnni-ẹnyi’ jẹnkọ d'a banye Alị-eze elu-igwee, kanị ndị hụn e mẹ uche Nẹdi m rị elu-igwee sụọ.

22Ụhụọhịn hụ, ndị bu ọda jẹnkọ d'a sị m, ‘Di-nwọnni-ẹnyi, Di-nwọnni-ẹnyi! Ẹlẹ ẹfan ị kẹ ẹnyi gi bu amụma? Ẹlẹ ẹfan ị kẹ ẹnyi gi chụpụ eje-mmọn, rụn okẹn ọrụn-atụmẹnya rị ichẹn-ichẹn?’

23Ogẹn hụ, m sikọ d'a gwapụ wẹ, sị, ‘Onwọnni ogẹn m gi marịn ụnụ; pụ nị ebeni, ndị e bi k'ọ sụọnị wẹ!’

24“Ya wụ, onyẹ nụ ihiẹn ndịnị m rị e ku, gi wẹ bi, hụnyẹ lẹ onyẹ marịn ihiẹn hụn tụn ụlọ a ye elu ọmụma wụ ohu:

25mirin e zue, huru, okẹn ufere a kpọ ụlọ hụ, kanị ọ dannị, makẹni wẹ rụnye ẹ elu ọmụma.

26Kanị, onyẹ nụ ihiẹn ndịnị m rị e ku bụ o gini wẹ bi, hụnyẹ lẹ onyẹ-nzuzu tụn ụlọ a ye elu uzunzun wụ ohu:

27mirin e zue, huru, okẹn ufere a kpọ ụlọ hụ, ọ nọ dan, dankpọchanrịn ọhụnma-ọhụnma!”

28Ogẹn Jizọsị gi kugụ ihiẹn ndịnị, nkuzi ẹ nọ tụ igunrun hụ ile ẹnya.

29Makẹni ọ kuzi wẹ kẹ onyẹ oku rị ẹka a, ẹlẹ nọkẹ ndị-nkuzi Iwu wẹ.

← Chapter 6 Jump to: Chapter 8 →