Matthew 20

Ika 2018 Bible

← Chapter 19 Jump to: Chapter 21 →

1“Makẹni Alị-eze elu-igwee nọ kẹ ebe onyẹ ohu nọ pụ ụzụtụntụn d'e we ndị k'a rụnn'a ọrụn imẹ ugbo-vaịnị.

2Ya lẹ wẹ e kugụ nị egho ọrụn akpọhịn k'o k'a kụ, ọ nọ zi wẹ d'a rụnma ọrụn imẹ ugbo-vaịnị hụ.

3“Ihiẹn nọkẹ ọkụrọkụ itenẹi nke ụtụntụn, ọ pụzị, ọ nọ hụn ndị-ọrụn wuzo mmaka imẹ afịa.

4Ọ nọ sị wẹ, ‘Ụnụ nwẹn, d'a rụnnị ni m ọrụn imẹ ugbo-vaịnị, nị m kụghọ ụnụ ụgwọ ọhụnma.’

5Wẹ nọ jẹnmẹ. “Ọ pụzị ọkụrọkụ mmẹbụọ anwụn rị isi lẹ ọkụrọkụ ẹtọ efinnaị, mẹzikwọ ẹrịra.

6“Ibẹka ọkụrọkụ isẹn ogẹn ẹnyasị, ọ nọ pụzị: ọ nọ hụn ndị turusọnmẹ mmaka; ọ nọ sị wẹ, ‘Kị ụnụ turuni ebeni mmaka kete ụtụntụn?’

7“Wẹ nọ sị a, ‘O ke nwọn onyẹ we ẹnyi ọrụn.’ Ọ nọ sị wẹ, ‘Ụnụ nwẹn jẹnmẹzikwọ nị d'a rụnnị m ọrụn imẹ ugbo-vaịnị m.’

8“O ru ogẹn ẹnyasị, onyẹ hụ nwọn ugbo-vaịnị nọ sị onyẹ hụn e lepụn'a ugbo-vaịnị hụ ẹnya, ‘Kpọ ndị ọrụn hụ n'ị kụ wẹ ụgwọ wẹ, gha ndị ikpanzụụn kụma.’

9Ogẹn ndị ikpanzụụn hụ gha ọkụrọkụ isẹn anwụn rọmagụ rụnma gi bịa, ọ nọ kụ onyẹ-onyẹ egho-ọrụn akpọhịn.

10“Ogẹn ndị ibuzọ gi bịa, wẹ ro ni o jẹnkọ d'a kụkarị wẹ egho-ọrụn akpọhịn; kanị ọ kụzị onyẹ-onyẹ egho-ọrụn akpọhịn.

11Ogẹn wẹ gi kụgụ ndị ibuzọ hụ ụgwọ, wẹ nọ dẹnwịnnwịnmanị onyẹ nwọn ọrụn,

12a sị, ‘Ndị ikpanzụụnnị rụn mgbahunmẹ ọkụrọkụ ohu sụọ, kanị ẹnyi nwẹn bu ọrụnnị isi kete ụtụntụn, ma anwụn, ị nọ nwan kụ ẹnyi lẹ wẹ ahanmahan.’

13“Kanị onyẹ nwọn ọrụn nọ shịarị onyẹ ohu imẹ wẹ, sị a, ‘Di-ẹnyi, arị m e mẹgbu i; ẹlẹ egho-ọrụn akpọhịn kẹ mmẹ lẹ yụ ku?

14Weri nwan nke i lama; mmẹ chọ nị m ye onyẹ ikpanzụụnnị ihiẹn m ye i.

15Iwu gizi m nị m gi ihiẹn m mẹ ihiẹn m chọ? Ra iwe rị e we i nị m rị a ha ẹka?’

16“Ẹrịra kẹ ndị kpan azụụn k'a dọn bu ụzọ, ndị bu ụzọ a kpanrịn azụụn.”

17Ya Jizọsị nọ jẹnmẹ Jerusalẹm. Ebe wẹ jẹnkọ, ọ nọ we ndị nsọnmazụụn a mmẹbụọ shi ụsụọ, sị wẹ,

18“Lee n'ẹ, ẹnyi jẹnkọ nwan Jerusalẹm; ẹnyi ru ebahụn, wẹ sikọ d'e re Nwa nke Ịhịan ye ndị-isi nchụn-ẹjan lẹ ndị-nkuzi Iwu, a ma w'a ikpe-ọnwụn,

19bu ẹ che ẹka itumunyẹ nị wẹ gi ẹ gu egu, fịan a mkpịnsịn, kpọma a elu obe o we nwụn; kanị hụn m'ẹ akpọhịn ẹtọ, Osolobuẹ jẹnkọ d'e weli ẹ.”

20Ogẹn ahụn, nnẹ Jemisi lẹ Jọnụ, ụmụ Zẹbẹdi, wẹhẹ wẹ d'e kunrun Jesu. O gbuni Jesu osekpu, rịọ a n'o mẹn'ẹ ọhụnma.

21Jesu nọ sị a, “K'ị chọ?” Ọ nọ sị a, “Ku ẹ ni ụmụ m ẹbụbụọnị jẹnkọ d'a nọdị, onyẹ ohu ẹka-nni i, onyẹ ohu ẹka-ekpẹn i imẹ alị-eze i.”

22Kanị Jizọsị nọ sị, “Ụnụ amarịn ihiẹn ụnụ rị a rịọ. Nị ụnụ s'ẹka ra ihiẹn rị imẹ mkpu m jẹnkọ d'a ra?” Wẹ nọ sị, “Nị ẹnyi saghọ ẹka.”

23Ọ nọ sị wẹ, “Ezioku-ezioku, ụnụ jẹnkọ d'a ra ihiẹn rị imẹ mkpu m, kanị ẹlẹ mmẹ nwọn ku onyẹ k'a nọdị m ẹka-nni lẹ ẹka-ekpẹn; kama, ndị hụn Nẹdi m kwademẹn'ẹ wụ ndị k'a nọdị n'a.”

24Ndị nsọnmazụụn iri họdụnị a nụ ihiẹnni, wẹ nọ bumẹni umunẹ ẹbụọ hụ olulu.

25Ya Jizọsị nọ kpọzụnhan wẹ, sị wẹ, “Ụnụ a marịnghọ nị imẹ ndị alị ọzọ, ndị isi wẹ a kị wẹ nkịgbu, ndị uku a ghọsị wẹ nị uwẹ ka wẹ.

26Kanị, nke ụnụ arịkọ ẹrịra. Kama, onyẹ chọ n'ọ wụrụ okẹn ịhịan imẹ ụnụ, ya wụrụ odibo ụnụ;

27onyẹ chọ n'ọ wụrụ ibuzọ imẹ ụnụ, ya wụrụ igbọn ụnụ —

28nọkẹ kẹ mmẹ Nwa nke Ịhịan dọn bịa, ẹlẹ ni wẹ gbanị m odibo, kama, kẹni m gba odibo, yezikwọ ndụn m, gi ẹ gbapụha ndị bu ọda.”

29Ogẹn Jesu lẹ ndị nsọnmazụụn a gi gha Jẹriko pụkọ, igunrun hi-ogbe nọ sọnmẹ ẹ.

30Hụn ikẹnnyẹ ẹbụọ ẹnya kpu ishi nọdị alị mkpẹnrẹn ụzọ hụ gi nụ nị Jizọsị ghafekọ, wẹ nọ yimẹ oro, sị, “Di-nwọnni-ẹnyi! Nwa Defidi!! Mẹ omikẹn ẹnyi!!”

31Igunrun hụ nọ jụgbọ wẹ, sị wẹ gba nkịtịn; kanị wẹ nọ yikẹnmẹdẹ, “Di-nwọnni-ẹnyi! Nwa Defidi!! Mẹ omikẹn ẹnyi!!”

32Jizọsị a kụsị, kpọ wẹ, sị, “Kị ụnụ chọ nị m mẹni ụnụ?”

33Wẹ nọ sị a, “Di-nwọnni-ẹnyi, ẹnyi chọ nị ẹnyi leghama ụzọ.”

34Jizọsị nọ mẹ omikẹn mẹtụ wẹ ẹka ẹnya. Wẹ nọ leghama ụzọ ozigbo, sọnmẹ ẹ.

← Chapter 19 Jump to: Chapter 21 →