bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Ika
/
Ika 2018 Bible
/
Matthew 5
Matthew 5
Ika 2018 Bible
← Chapter 4
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 6 →
1
Ogẹn Jesu gi hụn igunrun hụ rị e sọnn'ẹ, ọ nọ shi elu òke rị ebẹhụ, nọdị alị, ndị nsọnmazụụn a nọ bịa d'e kunrun ẹ.
2
Ya Jesu nọ kuzimẹ igunrun hụ ile, sị,
3
“Ngọzi wụ nke ndị la enwẹn wẹ tọnị Osolobuẹ nọkẹ igbẹnnyẹ, makẹni Alị-eze elu-igwee wụ nke wẹ!
4
Ngọzi wụ nke ndị hụn rị a kwannị, makẹni wẹ jẹnkọ d'a rọkọ wẹ obi.
5
Ngọzi wụ nke ndị hụn e welụa enwẹn wẹ alị, makẹni wẹ sikọ d'e nwọnrin ụwa ile.
6
Ngọzi wụ nke ndị ọ rị a gụn nị ihiẹn rị kẹ Osolobuẹ dọn chọ, a gụn wẹ kẹ ihiẹn-oriri lẹ ihiẹn-ọrịra; ẹfọ jẹnkọ d'e jun wẹ.
7
Ngọzi wụ nke ndị hụn e mẹ omikẹn, makẹni wẹ sikọ d'e mẹni wẹ omikẹn.
8
Ngọzi wụ nke ndị obi wẹ rị ọchan, makẹni wẹ sikọ d'a hụn Osolobuẹ.
9
Ngọzi wụ nke ndị hụn e mẹ ni udọn rị, makẹni wẹ sikọ d'a kpọ wẹ ụmụ Osolobuẹ.
10
Ngọzi wụ nke ndị wẹ rị e kpokpo makẹni wẹ rị e mẹ ihiẹn Osolobuẹ chọ: Alị-eze elu-igwee wụ nke wẹ.
11
“Ngọzi wụ nke ụnụ wẹ gha a kpari ụnụ, e kpokpo ụnụ, e gi ufiri m e buo ụnụ eje-ihiẹn ile rị ichẹn-ichẹn.
12
Ghọghọ nị; ẹfọ ya sụọ ụnụ ụsụọ — makẹni ụgwọ-ọrụn ụnụ hi-ogbe imẹ elu-igwee! Ẹrịra kẹ wẹ kpokpozi ndị-amụma buni ụnụ ụzọ.
13
“Ụnụ wụ nnu ụwa. Kanị, omẹni nnu asụọzịnị ụsụọ, nị wẹ s'ẹka mẹ ẹ sụọmazị ụsụọ? Onwọnzini ihiẹn wẹ gi ẹ e mẹ, karị ikpọn ẹ tuhu, a zọgbumẹ wẹ ẹ.
14
“Ụnụ wụ ukpẹ ụwa. Obodo wẹ tụnye elu òke asakọ ẹka zueri.
15
Ẹrịra k'ọ rịzị nị ịhịan ara mụyegụ ukpẹ, zuemẹ ẹ ye okpuru afẹrẹ; kama, w'e bu ẹ e che elu ihiẹn, ịhịan ile rị imẹ ụlọ e gi ẹ legha ụzọ.
16
Ẹrịra kẹ ụnụ k'a nịzị ukpẹ ụnụ e nwun hụn ịhịan e legha, kẹni wẹ a hụn ọrụn-ọma ụnụ, e gi ẹ a ja Nẹdi ụnụ rị elu-igwee mma.
17
“Erokwọlẹ ni nị m bịa d'a kagbu Iwu Mozizi mọbụ ihiẹn ndị-amụma de. Abịanị m d'a kagbu wẹ, kama, m bịa d'e mẹzu wẹ.
18
Makẹni, m rị a gwa ụnụ ezioku, d'e ru ni elu-igwee lẹ ụwa a ghafe, onwọnni mkpụrụ-ẹkụkwọ ọwụlẹ rị imẹ Iwu mọbụ ihiẹn ọwụlẹ wẹ vinyehụ mkpụrụ-ẹkụkwọ, hụn wẹ jẹnkọ d'a kagbu — d'e ru nị ihiẹn ile rị Iwu e mẹzuchanrịn.
19
Ya wụ nị onyẹ nu hụn ọwụlẹ imẹ iwu ndịnị ye nkọ, a kuzi ịhịan ẹrịra, wẹ sikọ d'a kpọ hụnyẹ onyẹ kachanrịn ntịn imẹ Alị-eze elu-igwee. Kanị, onyẹ rị e dọnmẹ wẹ, a kuzi wẹ, wẹ sikọ d'a kpọ a okẹn-ịhịan imẹ Alị-eze elu-igwee.
20
M rị a gwa ụnụ, mmanị ezi-omumẹ ụnụ ka nke ndị-nkuzi Iwu lẹ ndị Itu-Farisi, ụnụ asakọ ẹka banye Alị-eze elu-igwee.
21
“Ụnụ a nụgụọ nị wẹ sị ndị akan, ‘Egbulẹ ni ọchụn; onyẹ gbu ọchụn, a ma w'a ikpe.’
22
Kanị, m rị gwa ụnụ nị onyẹ budẹni nwẹnẹ ẹ olulu a kpọ w'a ikpe; onyẹ kpọ nwẹnẹ ẹ iyi, o jẹnkọ Ọgwa Ndị-isi; onyẹ sị ịhịan ‘Nzuzu,’ ọkụn-mmọn rị e che ẹ.
23
“Ya wụ, omẹni ị wẹhẹ oyiye i ebe wẹ nọ e ye oyiye, nị y'a nọ ebẹhụ nyanhan nị nwẹnẹ i rị e wen'i iwe makẹ ihiẹn i mẹ ẹ,
24
lagụ oyiye i tọ ebẹhụ wẹ nọ e ye oyiye; jẹn, ni ịyụ lẹ nwẹnẹ i sụọkingụ, i kebe kinhẹn d'e ye oyiye i.
25
“Ịyụ lẹ onyẹ ikpe i sụọkin ẹgwa, ebe ụnụ kelẹni ru ọgwa, amamgbe o we i ye ọka-ikpe, ọka-ikpe e we i ye (ụlakpa) onyẹ ẹwuru-ogi, a tụ wẹ i ye ụlọ-ngan.
26
M rị a gwa ị ezioku, y'a pụhakọ ngan d'e ru mgbe ị kụgụ ịkọbọ ikpanzụụn wẹ be i.
27
“Ụnụ a nụgụọ nị wẹ sị ndị mbụ, ‘Aghẹrẹlẹ.’
28
Kanị mmẹ lẹ enwẹn m rị a gwa ụnụ nị onyẹ lee okpoho ẹnya, ọ la a ẹnya, e mẹgụọlẹ mgba a imẹ obi ẹ.
29
Omẹni ẹnya ẹka-nni i a han ị e mẹ njọ, gụpụ a tuhu. Ọ ka ị mma nị mkpamkpa ẹhụ ị ohu arịzị a, karị nị wẹ tụ ẹhụ ị ile ye ọkụn-mmọn.
30
Omẹni ẹka-ihiẹn i a han ị e mẹ njọ, bepụ a tuhu. Ọ ka ị mma nị mkpamkpa ẹhụ ị ohu arịzị a, karị nị wẹ tụ ẹhụ ị ile ye imẹ ọkụn-mmọn.
31
“Wẹ te sịzịkwọ, ‘Onyẹ kpechan nwunyẹ ẹ, ya ye ẹ ẹkụkwọ mkpechan.’
32
Kanị mmẹ nwẹn rị a gwa ụnụ nị onyẹ kpechan nwunyẹ ẹ bụ ẹlẹni nwunyẹ ẹ zọ ụkụ ye ọfịa, hụnyẹ rị e mẹ ẹ n'ọ zọ ụkụ ye ọfịa. Onyẹ lụ okpoho wẹ kpechan a nagụọ nwunyẹ ịhịan.
33
“Ụnụ a nụzịghọ nị wẹ sị ndị akan, ‘Ekunlẹ ẹfan Osolobuẹ bụ y'e mẹni ihiẹn i kwe nkwa a; i k'e mẹrịrịnị Osolobuẹ ihiẹn i kwe nkwa a.’
34
Kanị mmẹ lẹ enwẹn m sị ụnụ, ekunlẹ ihiẹn ọwụlẹ, kaka. Ekunlẹ elu-igwee, makẹni ịya wụ ukpo-eze Chuku;
35
ekunlẹ ụwa, makẹni ịya k'ọ tụkwasị ụkụ; ekunlẹ Jerusalẹm, makẹni ịya wụ obodo Eze uku hụ;
36
ekundẹlẹ isi i, makẹni y'a saẹka mẹ ntutu ohu chanma ụchan mọbụ gimẹ ngi.
37
Sịhụ ‘Ẹghẹẹ’ mọbụ ‘Mba’; ihiẹn ọwụlẹ karị ọnwan gha ẹka Eje-onyẹ hụ bịa.
38
“Ụnụ a nụgụọ nị wẹ sị, ‘Onyẹ tikpọ ịhịan ẹnya ohu, wẹ tikpọgwarị a ẹnya ohu; onyẹ tikwọn ịhịan eze ohu, wẹ tikwọngwarị a eze ohu.’
39
Kanị, mmẹ nwẹn sị ị, ịhịan bịangbu i, esọnlẹ ẹ dọ. Kama, onyẹ ma ị ọra nti ẹka-nni, y'e bu nti hụn-ẹbọ zimẹn'ẹ.
40
Onyẹ chọ n'o kpe i narịn ị ẹwuru i yi imẹ, nịzị a weri hụn i yiye elu ẹ.
41
Onyẹ wa ijẹn maịlị ohu ye i olu, y'e sọn ẹ jẹn maịlị ẹbụọ.
42
Onyẹ rịọ ị ihiẹn, y'e ye ẹ; onyẹ chọ n'o zinarịn ị ihiẹn, ajụlẹ.
43
“Ụnụ a nụgụọ nị wẹ sị, ‘I sikọ d'e nwọnrịrị ihiẹn-ọsụsụọ ndị nke i, e ze ize ndị-iṅẹnrẹn i.’
44
Kanị mmẹ nwẹn sị ụnụ e nwọn ihiẹn-ọsụsụọ ndị-iṅẹnrẹn ụnụ, e mẹni ni ndị rị e kpokponi ụnụ ekpere,
45
kẹni ụnụ wụrụ ụmụ Nẹdi ụnụ rị elu-igwee nke-esi. Makẹni, o mẹ anwụn a e tikpu kẹ eje-ịhịan kẹ ezigbo ịhịan, e mẹ mirin e zueni kẹ ndị ezi-omumẹ kẹ ndị eje-omumẹ.
46
Makẹni, omẹni ndị nwọn ihiẹn-ọsụsụọ ị kẹ yụ nwẹn nwọn ihiẹn-ọsụsụọ wẹ, elee ụgwọ-ọrụn k'i k'e nwọnhẹn? Ẹlẹ ẹrịra kẹ ndị ụgwọ-isi wẹ gi njọ marịn e mẹ?
47
Omẹzini ndị nke i sụọ kẹ y'e kele ọhụnma, k'i gi mẹkarị ndị ọzọ? Ẹlẹ ẹrịra kẹ ndị ghalẹni e fe Chuku e mẹ?
48
Zu ni nwan oke kẹ Nẹdi ụnụ hụn rị elu-igwee dọn zu oke.
← Chapter 4
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 6 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28