Matthew 6

Ika 2018 Bible

← Chapter 5 Jump to: Chapter 7 →

1“Kpachanpụkwọ nị ẹnya amamgbe ụnụ e mẹmẹ ihiẹn Osolobuẹ kẹni ịhịan hụn ụnụ. Makẹni, ụnụ mẹ ẹ, ụnụ anarịnkọzị ụgwọ-ọrụn ẹka Nẹdi ụnụ hụn rị elu-igwee:

2“Ya wụ, ụnụ gha e ye ndị igbẹnnyẹ ihiẹn, akụlẹ ni ẹgogo kẹ ndị-ihunnaị dọn e mẹ imẹ ụlọ-ofufe lẹ ọkpụzọ, kẹni ịhịan ile ja wẹ mma. M rị a gwa ụnụ ezioku, a narịnchanrịngụọlẹ wẹ ụgwọ-ọrụn wẹ.

3Kama, ụnụ gha e ye ndị-igbẹnnyẹ ihiẹn, anịlẹ ni ẹka-ekpẹn ụnụ marịn ihiẹn ẹka-nni ụnụ rị e mẹ,

4kẹni ihiẹn ụnụ mẹni ndị-igbẹnnyẹ wụrụ ihiẹn ụnụ mẹ nzuzue, Nẹdi ụnụ hụn a hụn ihiẹn zuerini a kụ ụnụ ụgwọ.

5“Ụnụ ghazịkwọ e mẹ ekpere, emẹlẹ ni kẹ ndị-ihunnaị. Makẹni, ọ sụọ wẹ nị w'e turu imẹ ụlọ-ofufe lẹ ọkpụzọ e mẹ ekpere, kẹni ịhịan hụn wẹ. Ezioku kẹ m rị a gwa ụnụ, a narịnchanrịngụọlẹ wẹ ụgwọ-ọrụn wẹ.

6Kama, ụnụ jẹnkọnị d'e mẹ ekpere, ban nị mmụlọ, gụnma ụzọ, mẹ ekpere jẹnni Nẹdi ụnụ hụn wẹ ghalẹni e legha; Nẹdi ụnụ hụn a hụn ihiẹn zuerini sikọ d'a kụ ụnụ ụgwọ.

7“Kanị ụnụ gha e mẹ ekpere, ekulẹ ni ọtụtụ oku kẹ ndị hụn ghalẹni e fe Osolobuẹ dọn e mẹ. Makẹni wẹ rị e ro ni ọtụtụ oku wẹ kẹ wẹ sikọ d'e gi nụ ekpere wẹ.

8Anọlẹ ni nwan kẹ wẹ. Makẹni, Nẹdi ụnụ a marịnghọ ihiẹn rị ụnụ mkpa nị ụnụ d'a rịọma a.

9“E mẹ ni nwan ekpere ẹnịna: ‘Nẹdi ẹnyi hụn rị elu-igwee, mẹ ịhịan ile dọnmẹ ẹfan ị nsọ.

10Alị-eze i (ọkịkị ị) ya bịa; uche i ya mẹ elu-ụwa k'o dọn e mẹ imẹ elu-igwee.

11Ye ẹnyi ihiẹn ẹnyi jẹnkọ d'e ri tannị;

12gbagharị ẹnyi eje-ihiẹn ẹnyi mẹ, kẹ ẹnyi dọn gbagharị ndị mẹ ẹnyi eje-ihiẹn.

13Edulẹ ẹnyi ye imẹ ọnwụnwan, ka gbapụha ẹnyi imẹ eje-ihiẹn.’

14“Ẹghẹẹ, ụnụ gbagharị ndị ọzọ mmẹfie wẹ, Nẹdi ụnụ rị elu-igwee a gbagharịzịkwọ ụnụ;

15kanị, omẹni ụnụ agbagharịnị ndị ọzọ mmẹfie wẹ, Nẹdi ụnụ agbagharịkọ ụnụ mmẹfie ụnụ.

16“Ụnụ gha e bu ọnụ, erọnmẹlẹ ni ihun kẹ ndị ihunnaị. W'e rọnmẹ ihun, kẹni ịhịan ile hụn nị wẹ rị e bu ọnụ. Ezioku kẹ m rị a gwa ụnụ, a narịnchanrịngụọlẹ wẹ ụgwọ-ọrụn wẹ.

17“Kama, ụnụ gha e bu ọnụ, te ni udẹn isi, ha ntutu, ụnụ e fin ihun,

18makẹ onyẹ ọzọ gha a marịn mmanị Nẹdi ụnụ sụọ hụn wẹ ghalẹni e legha; Nẹdi ụnụ hụn a hụn ihiẹn zuerini sikọ d'a kụ ụnụ ụgwọ.

19“Akpatọlẹ ni akụ-lẹ-ụba elu ụwanị, ebe ẹkịka nọ e ripụ ihiẹn, ebe ihiẹn nọ a gba nchara, ebe ohin nọ e gbukpọ e zunrun.

20Ka kpatọ nị akụ-lẹ-ụba imẹ elu-igwee, ebe ẹkịka nọlẹni e ripụ ihiẹn, ebe ihiẹn nọlẹni a gba nchara, ebe ohin ghalẹni e gbukpọ e zunrun.

21Makẹni, ebe akụ-lẹ-ụba ụnụ rị, ịya kẹ obi ụnụ jẹnkọ d'a rịzị.

22“Ẹnya wụ ukpẹ ẹhụ. O mẹ nwan nị ẹnya ị rị ikẹn, ukpẹ sikọ d'e nwungbarị ẹhụ ị.

23Kanị, omẹni ẹnya ị arị ikẹn, ẹhụ ị ile sikọ d'a wụ ishi-ishi. O mẹ nwan nị ukpẹ hụn rị imẹ ị wụ ishi, ya wụ nị ishi rị imẹ i karị ẹka!

24“Onwọnni onyẹ a saẹka e fe madụ ẹbụọ: makẹni, ọ k'a gbakitọ ohu azụụn, bu obi che hụn-ẹbọ, mọbụ o we enwẹn ẹ kwanị ohu, legberi hụn-ẹbọ: y'a sakọ ẹka fe Osolobuẹ lẹ egho.

25“Ufiri ẹ, m rị a gwa ụnụ, ehuelẹ ni uhue ndụn ụnụ, ihiẹn ụnụ k'e ri mọbụ ihiẹn ụnụ k'a ra mọbụ ihiẹn ụnụ k'e yiye ẹhụ. Ẹlẹ ndụn ka ihiẹn-oriri? Ẹlẹ ẹhụ ka ẹkwa?

26Lekpọdẹ ni nnụnụ e fe elu: w'a ra rụn ugbo mọbụ ghọrị ihiẹn-ugbo mọbụ kpọntọ ihiẹn ọban bụ Nẹdi ụnụ rị elu-igwee hụ e ye wẹ ihiẹn-oriri. Ẹlẹ ụnụ ka wẹ mkpa a rị?

27Imẹ ụnụ ile, onyẹ k'a saẹka gi uhue tọ mgbahunmẹ ọkụrọkụ ohu cheni hụn nkẹ ọ tọ?

28O mẹ nke ẹkwa, kị ụnụ rị e hueni uhue ẹ? Lekpọ nị kẹ obobo rị ọfịa dọn e sue: w'a ra rụn ọrụn, w'a ra kpa ẹkwa;

29kanị, m rị a gwa ụnụ nị, kẹ Solomọnụ nwọnhanlẹ ọghọ, o kẹnhanị ekikẹn kẹ hụn ọwụlẹ imẹ obobo ndịnị.

30Omẹni ẹrịra kẹ Osolobuẹ e kẹnhan ẹfịfịa rị ọfịa ekikẹn, ẹfịfịa hụn rị ndụn tannị, eki fọn e bu w'ẹ che imẹ ọkụn, o kẹnkọ ụnụ ekikẹn ọhụnma karị? Heuu, ndị okukwe nta!

31Ehuelẹ ni nwan uhue, a sị, ‘Kị ẹnyi k'e ri?’ mọbụ ‘Kị ẹnyi k'a ra?’ mọbụ ‘Kị ẹnyi k'e yi?’

32Ihiẹn ndịnị wẹ kẹ ndị kwerilẹni ni Osolobuẹ a chụsọnmẹ, kanị Nẹdi ụnụ rị elu-igwee a marịnghọ nị ihiẹn ndịnị ile rị ụnụ mkpa;

33ka chụmagụ nị Alị-eze Osolobuẹ lẹ ihiẹn Osolobuẹ chọ, o sikọ d'e yezi ụnụ ihiẹn ndịnị ile.

34“Ehuelẹ ni nwan uhue banyeni ekile, nị eki nwọn oku ẹ; nsọngbu ụhụọhịn e zugụọn'a.

← Chapter 5 Jump to: Chapter 7 →