Matthew 18

Ika 2018 Bible

← Chapter 17 Jump to: Chapter 19 →

1Ogẹn hụ, ndị nsọnmazụụn Jizọsị nọ bịa d'e kunrun Jizọsị, sị, “Onyẹ kachanrịn imẹ Alị-eze elu-igwee?”

2Ọ nọ kpọ nwata ohu, bu ẹ che etintinnaị wẹ, sị,

3“M rị a gwa ụnụ ezioku, omẹni ụnụ ehutọnị wụrụ ndị nọ kẹ ụmụẹka, onwọnni ogẹn ụnụ e gi banye Alị-eze elu-igwee.

4Onyẹ hụn welụa enwẹn ẹ alị nọkẹ nwatanị, ịya kachanrịn imẹ Alị-eze elu-igwee.

5Onyẹ ọwụlẹ hụn gi ufiri ẹfan m nabanhan nwata nọ ẹnịna a nabanhangụọ m.

6“Kanị onyẹ mẹ onyẹ ohu imẹ ndị ntanị kwerinini m mẹ njọ, ọ ka onyẹ ahụn mma nị wẹ kẹnmẹ ọlọ hi-ogbe ye ẹ olu, tụ a ye imẹ-imẹ ohimin.

7Ọ jọka njọ nị ihiẹn e buhẹ njọ rị arị elu-ụwa! Ọnwụnwan k'a bịakwọ, kanị ọ k'a jọ onyẹ wẹ gha ẹka a bịa njọ.

8“Omẹni ẹka ị mọbụ ụkụ ị a haịn ị e mẹ njọ, bepụ a tuhu. Ọ ka ị mma n'ị banye ndụn ọsụọn'a ẹhụ ị ezuni oke mọbụ n'ị dan ngụrọ, karị nị wẹ tụ ị ye imẹ ọkụn itẹbitẹ bụ ẹka ị ẹbụbụọ lẹ ụkụ ị ẹbụbụọ zu oke.

9Omẹni ẹnya ị a haịn ị e mẹ njọ, gụpụ a tuhu. Ọ ka ị mma n'i gi ẹnya ohu sụọ banye ndụn karị nị wẹ tụ ị ye ọkụn-mmọn bụ ẹnya ị ẹbụbụọ zu oke.

10“Hụn n'a nị ụnụ elegberini hụn ọwụlẹ imẹ ndị ntanị kwerinini m. Makẹni, m rị a gwa ụnụ, ndị mmọn-ozi wẹ rị ihun Nẹdi m rị elu-igwee e lee ihun ẹ ogẹn ile.

11Makẹni, mmẹ Nwa nke Ịhịan, bịa d'a zụọpụha ndị huni.

12“Gwadẹle ni m? Omẹni ịhịan nwọn atụnrụn ọgụn-isẹn, ohu imẹ wẹ a kpahu, ọ latọkọ ohu-arịa-ọgụn-isẹn họdụnị elu-ugu ebahụn wẹ nọ a kpa nni jẹnmẹ d'a chọ ohu hụ kpahuni?

13Omẹni ọ hụn a, m rị a gwa ụnụ ezioku, o k'e gi ẹ ghọghọ karị ohu-arịa-ọgụn-isẹn hụ kpahulẹni.

14Ẹrịrazịkwọ, onwọnni akpụ onyẹ ohu imẹ ndị ntanị hụn Nẹdi ụnụ rị elu-igwee chọ n'ọ la iwi.

15“Nwẹnẹ i mẹ i njọ, jẹn d'a gwa a mmẹfie ẹ ẹgbata yụ lẹ ịya sụọ. Omẹni o gọn ị ntịn, y'e wekinhẹngụọ nwẹnẹ i.

16Kanị, omẹni o gọnni i ntịn, y'e weri onyẹ ohu mọbụ mmadụ ẹbụọ jẹnzi d'a hụn a kẹni wẹ gi oku-ọnụ madụ ẹbụọ mọbụ ẹtọ gi oku dọn.

17Ọ jụ n'o gọnkọ wẹ ntịn, gwa ndị ụka. Ọ jụkwọ n'o gọnkọ ụka ntịn, weri ẹ rịkẹ onyẹ ghalẹni e fe Osolobuẹ mọbụ onyẹ a na ụgwọ-isi furulẹni.

18“Ezioku kẹ m rị a gwa ụnụ: ihiẹn ọwụlẹ ụnụ sị ‘Mba’ elu-ụwa, elu-igwee k'a sị ‘Mba;’ ihiẹn ọwụlẹ ụnụ sị ‘Ẹghẹẹ’ elu-ụwa, elu-igwee sị ‘Ẹghẹẹ.’

19M rịzị a gwa ụnụ ezioku, omẹni mmadụ ẹbụọ imẹ ụnụ e kwerigbama elu-ụwanị rịọ ihiẹn ọwụlẹ, Nẹdi m rị elu-igwee sikọ d'e mẹni ụnụ ya.

20Makẹni ebe ọwụlẹ mmadụ ẹbụọ mọbụ ẹtọ gi ẹfan m zu, mmẹ lẹ wẹ rị ebẹhụ.”

21Pita nọ bịa d'e kunrun Jizọsị, sị a, “Di-nwọnni-ẹnyi, mgbe ole kẹ nwẹnẹ m sikọ d'e mẹ m njọ a gbagharị m'a? Ẹlẹ mgbe ẹsa?”

22Jizọsị nọ sị a, “Asịnị m'ị mgbe ẹsa, kanị mgbe ẹsa-ẹsa iri ụzọ ẹsa.

23“Ya wụ, Alị-eze elu-igwee nọ kẹ ebe eze ohu nọ chọ nị ya lẹ idibo ẹ ku oku egho wẹ gi ẹ.

24Ogẹn o gi kumẹ, e wẹhẹni wẹ ẹ onyẹ ohu gi ẹ egho higbu enwẹn ẹ hụn k'e zu wẹ kụ ndị-ọrụn nnụ-uku iri (10,000) ụgwọ ahụa mmisẹn.

25Kanị onyẹ hụ asanị ẹka kụ a. Di-nwọnn'ẹ nọ sị wẹ re ya lẹ nwunyẹ ẹ lẹ ụmụ a lẹ ihiẹn ile o nwọn, gi ẹ kụ a ụgwọ o gi ẹ.

26“Ya odibo hụ nọ gbu osekpu, rịọ a ntan rịọ a imọn, sị, ‘Dodo, nwọn ndidin; m jẹnkọ d'a kụchanrịn ị ihiẹn ile m gi i.’

27Di-nwọnn'ẹ nọ gi omikẹn hapụ a, sị a akụzịlẹ ụgwọ hụ.

28“Kanị, odiboni a pụ, ọ nọ hụn odibo ibe ẹ hụn gi ẹ egho-ọrụn akpọhịn ọgụn-isẹn sụọ. Ọ nọ tọdọn ẹ ẹkpịrị, sị a, ‘Kụ m ụgwọ i gi m!’

29“Ya odibo ibe ẹ hụ nọ dann'a alị, rịọ a nta, rịọ a imọn, sị, ‘Dodo, nwọn ndidin; m jẹnkọ d'a kụ ị ụgwọ ị.’

30Kanị ọ jụ. Hụn nkẹ o gi hapụ a, ọ nọ budẹ ẹ che ụlọ-ngan, n'ọ tọ ebẹhụ d'e ru n'ọ kụ a ụgwọ hụ.

31“Ogẹn idibo ibe ẹ gi hụn ihiẹnni, ọ fụ wẹ ọda-ọda, wẹ nọ jẹn d'a gwachanrịn di-nwọnni wẹ ihiẹn ile mẹni.

32Di-nwọnn'ẹ nọ sị wẹ kpọha a. Ọ nọ sị a, ‘Eje-odibo! M hapụ ị, sị ị akụzịlẹ ụgwọ hụ ile i gi m, makẹni ị rịọ m arịọ.

33O furuni n'i mẹni ibe i omikẹn kẹ m dọn mẹni yụ nwẹn?’

34Di-nwọnn'ẹ nọ gi olulu w'ẹ ye wẹ nị w'e mẹshi ẹ ikẹn ụlọ-ngan d'e ru n'ọ kụchanrịn ụgwọ hụ ile o gi.

35“Ẹrịra kẹ Nẹdi m rị elu-igwee jẹnkọ d'e mẹzikwọ ụnụ, omẹni ụnụ egini obi ụnụ ile gbagharị nwẹnẹ ụnụ.”

← Chapter 17 Jump to: Chapter 19 →