Judges 1

Ilokano (Ti Biblia (1973))

Jump to: Chapter 2 →

1Ket naaramid idi calpasan ti ipapatay ni Josue, a dagiti annac ti Israel immumanda ken Jehova, a kinunada, Asino cadacami ti umunanto a sumang-at a makigubat a maibusor cadagiti Cananeos?

2Ket ni Jehova simmungbat, Ni Juda sumang-atto: adtoy, nga inyawatco ti daga iti imana.

3Ket ti Juda kinunana ken Simeon a cabsatna, Makipagsang-atca caniac iti gasatco ket makigubatta a maibusor cadagiti Cananeo; ket siac cumuyogacto met a mapan iti gasatmo, ket ti Simeon napan kimmuyog kencuana.

4Ket ti Juda simmang-at; ket ni Jehova inyawatna iti imada ti Cananeo ken ti Perezeo: ket nangcabilda cadacuada idiay Bezec cadagiti sangapulo a ribu a lallaki.

5Ket nasaracanda ni Adoni-bezec idiay Bezec; ket nakibacalda a maibusor kencuana, ket kinabilda ti Cananeo, ken ti Perezeo.

6Ngem ni Adoni-bezec nagtalaw; ket isu kinamatda, ket isu tiniliwda, ket pinutedda kencuana dagiti tangan dagiti im-imana ken sacsacana.

7Ket ni Adoni-bezec kinunana, Pitopulo nga ar-ari, a napuculan dagiti tangtangan dagiti im-imada ken sacsacada nagurnongda ti taraonda iti siroc ti lamesaanco: cas iti inaramidco, casta met ti insupapac ti Dios caniac. Ket isu impanda idiay Jerusalem, isu a nacatayanna.

8Ket dagiti annac ni Juda ginubatda ti Jerusalem, ket isu innalada, ket isu kinabilda iti tadem ti campilan, ket pinuuranda ti ili.

9Ket calpasanna dagiti annac ni Juda simmalogda a makigubat iti Cananeo nga agnaed iti caturodan, ken iti abagatan, ken cadagiti tantanap.

10Ket ti Juda napan a maibusor iti Cananeo nga agnaed iti Hebron (ti nagan ti Hebron idi unana a tiempo isu idi Kiryat-arba); ket kinabilda ni Sesai, ni Ahiman, ken ni Talmai.

11Ket manipud sadiay napan a maibusor cadagiti agnaed sadi Debir. (Ti nagan ti Debir idi unana a tiempo isu ti Kiryat-sefer.)

12Ket ni Caleb kinunana, Ti mangcabil iti Kiryat-sefer, ket isu ti alaenna, itedconto kencuana ni anacco nga Acsa nga asawana.

13Ket ni Otoniel nga anac a lalaki ni Cenez, a cabsat a lalaki nga adi ni Caleb innalana: ket isu intedna kencuana ni Acsa nga anacna nga asawana.

14Ket naaramid, idi a ti babai napan kencuana, isu ti tinignayna idi a dumawat ken amana iti maysa a daga: ket isu dimsaag idi asno; ket ni Caleb kinunana idi anacna, Ania ti cayatmo?

15Ket isu kinunana kencuana, Itdem caniac ti maysa a bendicion; agsipud ta sica insaadnac iti daga ti Abagatan, iccannac met cadagiti ub-ubbog ti danum. Ket ni Caleb iniccanna cadagiti ub-ubbog a nangato ken cadagiti ub-ubbog a nababa.

16Ket dagiti annac ti Cineo, a cayong ni Moises, simmang-atda a naggapu iti ili dagiti palpalma a naicuyogda cadagiti annac ni Juda a nagpalet-angda ti Juda, nga adda iti abagatan ti Arad; ket napanda ket nakipagnaedda cadagiti tattao.

17Ket ti Juda napan agraman ken cabsatna a Simeon, ket isuda kinabilda ti Cananeo nga agnaed idiay Sefaat, ket rinebbada nga intalipupus, ket ti nagan ti ili nagaladan iti Horma.

18Castamet ti Juda met innalana ti Gaza agraman iti sacupna, ken iti Ascalon agraman iti sacupna, ken ti Ecron agraman ti sacupna.

19Ket ni Jehova adda idi iti Juda; ket pinagtalaona dagiti agnaed iti caturodan; ta dina nabalin a pinagtalao dagiti naed cadagiti tantanap, nga addaan idi cadagiti luglugan a linandocan.

20Ket intedna ti Hebron ken ni Caleb, cas ni Moises insaona idi: isu a namagtalaoanna idi sadiay cadagiti tallo nga annac ni Enac.

21Ket dagiti annac ni Benjamin saanda a pinagtalao dagiti Jebuseo a nagnaed idi idiay Jerusalem; no di ket ti Jebuseo nakinaed cadagiti annac ni Benjamin idiay Jerusalem agingga iti daytoy nga aldaw.

22Ket ti balay ni Jose, isuda met simmang-atda a maibusor iti Bet-el; ket ni Jehova adda idi cadacuada.

23Ket ti balay ni Jose nagbaon a pinasiimna ti Bet-el. (Ti nagan ti ili idi unana a tiempo Luz.)

24Ket dagiti nagsiim namatmatanda ti maysa a lalaki a naggapu iti ili, ket kinunada kencuana, Dawatenmi kenca, Ipamatmatmo cadacami, pagsercan iti ili, ket aramidenminto kenca ti caasi.

25Ket isu insurona cadacuada ti pagsercan iti ili; ket kinabilda ti ili iti tadem ti campilan; ket linabasanda daydi a tao agraman amin a familiana.

26Ket daydi a tao napan iti daga dagiti Jetteo, ket namangon iti maysa nga ili, ket ninaganna iti Luz, ket daytoy isu ti naganna agingga iti daytoy nga aldaw.

27Ket ti Manases saanna a napagtalao dagiti nagnaed ti Bet-sean, ken dagiti il-ilina: uray dagiti taga Taanac ken cadagiti il-ilina, uray dagiti agnaed sadi Dor ken cadagiti il-ilina, uray dagiti agnaed sadi Ibleam ken cadagiti il-ilina, uray dagiti agnaed sadi Magiddo ken cadagiti il-ilina; no di ket ti Cananeo kinayatna ti nagtaeng iti daytoy a daga.

28Ket naaramid, a idinto a ti Israel pimmigsa, pinagtrabajoda dagiti Cananeo iti nadagsen, ngem dida pinagtalao ida nga intalipupus.

29Ket ti Efraim saanna a pinasia ti Cananeo nga agnaed idiay Gezer; no di ket ti Cananeo nagtaeng idiay Gezer iti nagtengngaanda.

30Ti Zabulon saanna a pinagtalao dagiti agnaed idiay Citron, ken dagiti agnaed idiay Naalol; no di ket ti Cananeo nagnaed iti tengngada, ket napagtrabajoda iti nadagsen.

31Ti Aser saanna a pinagtalao dagiti nagnaed idiay Aco, uray dagiti nagnaed idiay Sidon, uray idiay Ahlab, uray idiay Aczib, uray idiay Helba, uray idiay Afec, uray idiay Rehob;

32No di ket nagnaed dagiti Aseritas iti tengnga dagiti Cananeos, a nagnaed iti daga; ta dida pinagtalao ida.

33Ti Neftali saanna a pinasia dagiti nagnaed idiay Bet-semes, ken dagiti nagnaed idiay Bet-anat; no di ket nagnaed iti tengnga dagiti Cananeos, a nagnaed iti daga: ngem dagiti naed ti Bet-semes, ken dagiti naed ti Bet-anat napagtrabajoda iti nadagsen.

34Ngem dagiti Amorreo dinarupda dagiti annac ni Dan agingga iti caturodan; nga dida pinalubusan ida a sumalog idi iti lobong:

35Ngem dagiti Amorreo kinayatda ti agnaed iti bantay Heres, sadi Ahalon, ken Saalbin: nupay casta ti balay ni Jose nangartap, a pinagtrabajoda ida iti nadagsen.

36Ket ti sacup ti Amorreo manipud iti sang-atan ti Acrabim, ken mangrugi iti bato, ket agpangato.

Jump to: Chapter 2 →