Judges 19

Ilokano (Ti Biblia (1973))

← Chapter 18 Jump to: Chapter 20 →

1Ket naaramid cadagidi nga al-aldaw, idi awan ti ari iti Israel, nga adda idi maysa a Levita a naggangannaet iti caadayuan a bacras ti caturodan ti Efraim, a nangala nga agpaay kencuana iti babai a camalala idiay Belen ti Juda.

2Ket di camalalana nagbalangcantis a maibusor kencuana, ket nagawid nanipud kencuana agingga iti balay ni amana idiay Belen ti Juda, ket adda idi sadiay iti bayat ti uppat a bulan.

3Ket ni asawana timmacder, ket napan simmurot kencuana, tapno isu casaona a siemma unay, tapno isu alaenna manen, ket isu addaan maysa nga adipen, ken sanga-paris nga asno: ket ti babai isu inyegna iti balay ni amana: ket idi a ti ama ti balasang isu ti nakitana, nagragsac a simmabet kencuana.

4Ket ni catuganganna, nga ama ti balasang isu tinactacna; ket isu nakitaeng kencuana bayat ti tallo nga aldaw; iti casta nanganda ken imminumda, ket nagdagus idiay.

5Ket naaramid iti maicapat nga aldaw, nga isuda bimmangonda a nasapa iti bigat, ket isu bimmangon tapno agawid: ket ti ama ti balasang kinunana iti manugangna, Pakirdem ta pusom iti sangcasacmol a tinapay, ket iti calpasanna incayonto iti dalanyo.

6Iti casta isuda nagtugawda, ket nanganda ken imminumda, isuda a dua: ket ti ama ti babai kinunana iti lalaki: Siac agdawatac kenca, a maay-ayoca coma iti panagtactacmo iti agpatnag, ket bay-am ta pusom nga agragsac.

7Ket ti lalaki timmacder tapno agawid; ngem ni catuganganna isu inuyotanna, ket nagdagus manen idiay.

8Ket timmacder a nasapa iti bigat iti maicalima nga aldaw tapno agawid; ngem ti ama ti balasang kinunana, Dawatec kenca pakirdem ta pusom, ket agtactaccayo coma agingga iti panaglikig ti aldaw; ket isuda nanganda, isuda nga agpadpada.

9Ket idi a ti lalaki timmacder tapno mapan, isu, ken ti camalalana, ken ti adipenna, ni catuganganna, nga ama ti balasang, kinunana kencuana, Adtoy, a ti aldaw agturong iti rabii, agdawatac cadacayo nga agtactaccayo nga agpatnag: adtoy, ti aldaw aggibus, agdagusca ditoy tapno ta pusom naragsac coma; ket intono bigat gamudenyonto a masapa ti dalanyo, tapno mapanca iti pagtaengan.

10Ngem ti lalaki dina kinayat ti nagtactac iti daydi a rabii, no di ket timmacder ket nagawid, ket immay agingga iti sango iti Jebus, (isu met laeng ti Jerusalem): ket addada idi kencuana ti sangca-paris nga asno a sisisilla; adda met kencuana ti camalalana.

11Ket idi nga isuda addada iti asideg ti Jebus, ti aldaw nalpasen; ket ti adipen kinunana ken apona, Agdawatac kenca, umayca ket dumagastayo iti daytoy nga ili dagiti Jebuseo, ket agdagustayo coma kencuana.

12Ket ni apona kinunana kencuana, Ditayto dumagas iti ili ti gangannaet, a saan a dagiti cucua dagiti annac ti Israel; ngem lumabastayo nga agturong iti Gabaa.

13Ket kinunana iti adipenna, Umayca, ket umadanitayo coma iti maysa cadagitoy a luglugar; ket datayo agdagustayo idiay Gabaa, wenno idiay Rama.

14Iti casta isuda limmabasda ket napanda iti dalanda; ket ti init limneken cadacuada iti asideg ti Gabaa, a cucua ti Benjamin.

15Ket isuda simmiccoda, a mapan agdagus idiay Gabaa: ket isu simrec ket timmugaw iti calzada ti ili, ta awan idi ti tao a nangawat cadacuada iti balayna tapno agdagusda.

16Ket, adtoy, ti maysa a lacay immay a naggapu iti trabajo manipud iti away iti malem: ket ti tao taga caturodan ti Efraim idi, ket naggangannaet idiay Gabaa; ngem dagiti tattao idiay a lugar isuda idi dagiti Benjamitas.

17Ket isu intangadna dagiti matana, ket nakitana ti agbaliasat a tao iti calzada ti ili; ket ti lacay kinunana, Sadino ti papanam? ken sadino ti naggapuam?

18Ket isu kinunana kencuana, Naglasatcami a naggapu sadi Belen ti Juda agingga iti caadayuan a bacras ti caturodan ti Efraim, ta taga idiayac, ket napanac idi agingga iti Belen ti Juda, ket innac ita iti balay ni Jehova, ket awan ti nangala caniac iti balayna.

19Nupay casta adda a padapada garami ken sagana a canen nga agpaay cadagiti asnomi; ken casta met adda tinapay ken arac nga agpaay caniac ken agpaay iti adipenmo a babai, ken agpaay iti agtutubo a lalaki nga adda cadagiti adipenmo: ket awan ti masapul nga uray ania.

20Ket ti lacay kinunana, Talna ti adda coma kenca; amin dagiti masapsapulmo maipabiang coma caniac, isuna laeng a dica coma agdagus iti calzada.

21Iti casta isu inyegna iti balayna, ket iniccanna iti canen dagiti asnona; ket binuggoanda dagiti sacsacada, ket nanganda ken imminumda.

22Ket idi nga isuda pinaragsacda dagiti puspusoda, adtoy, dagiti lallaki ti ili, dadduma a tattao a nacas-ang, linicmutda ti balay, a pampampagenda ti ruangan; nagsaoda iti apoen ti balay, a ti lacay, a cuncunada, Iruarmo ti tao a simrec iti balaymo, tapno isu ti maamammomi coma.

23Ket ti tao, nga apoen ti balay rimmuar cadacuada, ket kinunana cadacuada, Saan, cacabsatco, agdawatac cadacayo, dicayo aramiden coma iti casta a kinadakes; ta daytoy a tao simrec iti balayco, dicayo aramiden coma daytoy a kinamauyong.

24Adtoy, ditoy adda balasangco a virgen, ken ti camalalana; iruarconto ida ita, ket pagtamedenyo ida, ket aramidenyo cadacuada ti cas pagarupenyo a naimbag: ngem iti daytoy a tao dicayo arimiden coma ti uray ania a kinamauyong.

25Ngem dagiti lallaki isu dida kinayat nga impangag: iti casta ti lalaki innalana ti camalalana, ket inruarna cadacuada; ket isu tinignayda, ket nagpalaloda kencuana iti nagpatnag iti daydi a rabii agingga iti bigat: ket idi a ti bigat mangrugi nga agbannawag, isu pinalubosanda a nagawid.

26Idin ti babai immay iti panagbannawag ti aldaw, ket napasag iti sango ti ruangan ti balay daydi a tao isu nga ayan idi ni apona, agingga iti naglawag.

27Ket ni apona bimmangon iti bigat, linuctanna dagiti ruangan ti balay, ket rimmuar a mapan iti dalanna; ket, adtoy, ti babai a camalalana nga adda idi a napasag iti sango ti ruangan ti balay, a dagiti im-imana naiparabawda iti dapian.

28Ket isu kinunana kencuana, Bumangonca, ta intayon; ngem awan ti simmungbat: idin ti lalaki isu ti binangonna nga incabilna iti rabaw ti asnona; ket ti lalaki timmacder, ket napan iti lugarna.

29Ket idi nga isu macagteng iti balayna, nangala iti maysa a buneng, ket iniggamanna ti camalalana, ket isu rinangrangcayna, camcameng ken camcameng, a pinagcasangapulona ket dua a capisi, ket pinaipanna ida cadagiti amin a bedbeddeng ti Israel.

30Ket naaramid idi a casta, nga amin a nacakita kencuana, kinunada, Awan ti casta nga aramid a naaramid wenno nakita nanipud iti aldaw a dagiti annac ti Israel simmang-atda a naggapu iti daga ti Egipto agingga iti daytoy nga aldaw: Isu panunutenyo, mangalacayo iti patigmaan, ket agsaocayo.

← Chapter 18 Jump to: Chapter 20 →