Judges 11

Ilokano (Ti Biblia (1973))

← Chapter 10 Jump to: Chapter 12 →

1Ket ni Jefte a Galaadita isu ti tao a mannacabalin ken maingel ket isu anac ti maysa a balangcantis: ket ni Galaad pinutotna idi ni Jefte.

2Ket ti asawa ni Galaad nangipasngay met idi kencuana cadagiti annac a lallaki; ket idinto a dagiti annac ti asawana dimmadackelda, pinagtalawda ni Jefte, ket kinunada kencuana, Dicanto agtawid iti balay ni amami; ta sica ti anac ti sabali a babai.

3Idin ni Jefte nagtalaw a maipuon cadagiti cacabsatna, ket isu nagtaeng iti daga ti Tob: ket timmiponda ken Jefte dagiti tattao a naubbaw, a nakipagruarda kencuana.

4Ket naaramid idi a calpasan ti sumagmamano a tiempo, a dagiti annac ni Ammon nakigubatda a maibusor iti Israel.

5Ket idi a casta, nga idi a dagiti annac ni Ammon nakigubatda iti Israel, dagiti lallacay ti Galaad napanda a mangpaawid ken Jefte manipud iti daga ti Tob.

6Ket kinunada ken Jefte, Umayca ket sica ti pangolomi, tapno datayo makigubattayo coma cadagiti annac ni Ammon.

7Ket ni Jefte kinunana cadagiti lallacay ti Galaad, Didac aya ginura idi, ket pinaruardac iti balay ni amac? ket apayapay umaycayo ita caniac itatta ta dacayo addacayo iti rigat?

8Dagiti lallacay ti Galaad kinunada ken ni Jefte, Gapuna dacami agsublicami manen kenca itatta, tapno umayca cumuyog coma cadacami, ket makicabiltayo coma cadagiti annac ni Ammon; ket sicanto ti pangolomi amin nga agnaed idiay Galaad.

9Ket ni Jefte kinunana cadagiti lallacay ti Galaad, No dacayo isublidac manen iti balay tapno makibacalac cadagiti annac ni Ammon, ket ni Jehova yawatnanto ida iti saclangco, siacto ti pangoloyo?

10Ket dagiti lallacay ti Galaad kinunada ken Jefte, Ni Jehova isunto ti macasacsi cadatayo; pudno unay a mayalubog iti saom casta ti aramidenminto.

11Iti casta ni Jefte napan a kimmuyog cadagiti lallacay ti Galaad, ket dagiti tattao isu inaramidda a pangoloda ken agturay cadacuada: ket ni Jefte insaona amin dagiti sasaona iti saclang ni Jehova idiay Mizpa.

12Ket ni Jefte nangibaon cadagiti babaonen iti ari cadagiti annac ni Ammon, a kinunana, Ania ti bibiangmo caniac, nga immayca caniac a manggubat a maibusor iti dagac?

13Ket ti ari dagiti annac ni Ammon sinungbatanna dagiti imbaon ni Jefte, Agsipud ta ti Israel innalana idi ti dagac, idi simmang-at a naggapu sadi Egipto, manipud iti Arnon agingga iti Jaboc, ken aginggana iti Jordan: gapuna isublina coma manen dagitoy a dagdaga a sicacappia.

14Ket ni Jefte nangibaon manen cadagiti babaonen iti ari cadagiti annac ni Ammon;

15Ket isu kinunana kencuana, Castoy ti cuna ni Jefte: Ti Israel saan idi a nangala iti daga ti Moab, uray daga dagiti annac ni Ammon;

16Ngem idi nga isuda simmang-atda a naggapu sadi Egipto, ket ti Israel naglasat iti let-ang agingga iti Baybay a Nalabaga, ket immay iti Cades;

17Idin ti Israel nangibaon cadagiti babaonen iti ari ti Edom, a kinunana, Agdawatac kenca palubosannac, a lumasat iti dagam; ngem ti ari ti Edom saanna ida nga impangag. Ket casta met a nangibaon iti ari ti Moab; ngem nagmadi: ket ti Israel nagtaeng idiay Cades.

18Sada linasat ti let-ang, ken linicawda ti daga ti Edom, ken ti daga ti Moab, ket immayda iti bangir a daya ti daga ti Moab, nagpacarsoda iti sabali a bangir ti Arnon; ket isuda saanda idi nga immay iti nagbeddengan ti Moab, agsipud ta ti Arnon isu ti nagbeddengan ti Moab.

19Ket ti Israel nangibaon idi cadagiti babaonen ken Sehon nga ari dagiti Amorreo, nga ari ti Hesebon; ket ti Israel kinunana kencuana, Agdawatcami kenca a palubosannacami coma nga aglasat iti dagam agingga iti lugarco.

20Ngem ni Sehon saan idi a nagtalec iti Israel a lumasat iti sacupna; no di ket ni Sehon inummongna amin dagiti tattaona, ket nagpacarso idiay Joas, ket nakigubat a maibusor iti Israel.

21Ngem ni Jehova a Dios ti Israel inyawatna ni Sehon ken amin dagiti tattaona iti ima ti Israel, ket kinabilda ida, iti casta ti Israel tinagicuana ti amin a daga ti Amorreo, a nagnaed idi idiay a daga.

22Ket isuda tinagicuada amin dagiti bedbeddeng dagiti Amorreo, manipud Arnon agingga iti Jaboc, ken manipud iti let-ang agingga iti Jordan.

23Gapu ta ni Jehova, a Dios ti Israel, pinagtalaona idi dagiti Amorreo iti sango ti ilina nga Israel, ket sica tagicuaem ida?

24Dicanto tagicuaen daydiay a ni Cemos a diosmo itedna kenca a tagicuaem? iti casta ngarud tagicuaenmi amin daydiay a namagtalaoan ni Jehova a Diosmi iti sangoananmi.

25Ket sica naimimbagca aya ngem ni Balac nga anac ni Sefor, nga ari ti Moab? isu uray caano, nakisusic aya idi a maibusor iti Israel, wenno uray caano nakigubat aya idi a maibusor cadacuada?

26Iti bayat ti panagnaed ti Israel cadagiti tallogasut a tawen, idiay Hesbon ken cadagiti il-ilina, ken idiay Aroer ken cadagiti il-ilina, ken cadagiti amin nga il-ili nga addada iti abay ti Arnon; apayapay dacayo dicayo sinubbot ida iti uneg dayta a tiempo?

27Gapuna siac saanac a nacabasol iti maicaniwas kenca, ngem sica agaramidca iti dakes caniac iti pananggubat ta maibusor caniac: ni Jehova nga Ocom, ocomenna ita coma dagiti annac ti Israel ken dagiti annac ni Ammon.

28Nupay casta ti ari dagiti annac ni Ammon dina impangag dagiti sasao ni Jefte nga imbaonna kencuana.

29Idin ti Espiritu ni Jehova immay ken Jefte, ket naglasat idiay Galaad ken idiay Manases, ken naglasat idiay Mizpa ti Galaad, ken manipud iti Mizpa ti Galaad naglasat agingga cadagiti annac ni Ammon.

30Ket ni Jefte nangicari idi ken Jehova iti maysa a cari, ket kinunana, No sica yawatmonto coma iti imac dagiti annac ni Ammon,

31No casta isunto, a ti uray siasino nga umay manipud cadagiti ruruangan ti balayco a sumabet caniac, intono agsubliac iti talna nga aggapu cadagiti annac ni Ammon, isunto ti cucua ni Jehova, ket idatonconto kencuana a maipaay iti mapuuran a daton.

32Iti casta ni Jefte naglasat agingga cadagiti annac ni Ammon a makigubat cadacuada, ket ni Jehova inyawatna ida iti imana.

33Ket kinabilna ida iti dackel a panangpapatay, manipud Aroer agingga iti pacagtengan iti Mennit, a duapulo met laeng nga il-ili, ken agingga iti Abelqueramin. Iti casta dagiti annac ni Ammon naparucmada iti sango dagiti annac ti Israel.

34Ket ni Jefte immay iti Mizpa agingga iti balayna; ket adtoy, a ti anacna a babai rimmuar a simmabet kencuana agraman cadagiti panpandereta ken salsala: ket isu idi ti bugbugtong nga anacna, malacsid kencuana isu awananen iti sabali nga anacna, lalaki man wenno babai.

35Ket naaramid idi nga isu ti nakitana, rinayabna dagiti pagan-anayna, ket kinunana, Ay, anacco sica pinabassitnac unay, ket sica ti maysa cadagiti mangdagensen caniac; ta siac linuctac ti ngiwatco idi ken Jehova, ket diac mabalin a babawyen.

36Ket isu kinunana kencuana, Amac, no sica linuctam idi ta ngiwatmo ken Jehova; aramidem caniac iti cas rimmuar idi ita ngiwatmo, yantangay ni Jehova inaramidna gapu kenca ti pammales cadagiti cabcabusormo, a dagiti met laeng annac ni Ammon.

37Ket isu kinunana ken amana, Bay-am a daytoy a banag maaramid coma caniac: palubosannac coma laeng iti bayat ti dua a bulan, tapno innac coma ket sumalogac coma cadagiti banbantay, ket sangitac coma ti kinavirgenco, siac ken dagiti cadcaduac.

38Isu kinunana, Inca, ket isu ti pinalubusana bayat ti dua a bulan, ket isu pimmanaw, isu agraman cadagiti cadcaduana, ket sinangitanna ti kinavirgenna iti tapaw dagiti banbantay.

39Ket naaramid idi a nalpas dagiti dua a bulan, nga isu simmubli ken amana, isu inaramidna kencuana ti mayanatop iti carina nga incarina idi: ket di anacna saanna a naam-ammo ti lalaki. Ket adda idi cadawyan idiay Israel,

40A dagiti annac a babbai ti Israel mapanda iti tinawentawen a manglaglagip idi anac a babai ni Jefte a Galaadita bayat ti uppat nga aldaw iti macatawen.

← Chapter 10 Jump to: Chapter 12 →