Judges 16

Ilokano (Ti Biblia (1973))

← Chapter 15 Jump to: Chapter 17 →

1Ket ni Samson napan idi idiay Gaza, ket nakitana sadiay iti maysa a babai a balangcantis, ket simrec kencuana.

2Ket naisao cadagiti Gazitas, a nacuna, Ni Samson nacaay ditoy. Ket isu linacubda, ket isu sinanebda a nagpatnag iti daydi a rabii iti ruangan ti ili; ket adda a naulimec bayat iti daydi a rabii, a cuncunada, Bayantayo agingga iti agbannawag iti bigat, ket sa isu papatayentayo.

3Ngem ni Samson nagidda agingga iti tengnga ti rabii. Ket iti tengnga ti rabii bimmangon, ket iniggamanna dagiti rikep ti ruangan ti ili, ken dagiti dua a bautecna, ket pinarutna ida, ti balunet ken ti amin, ket binaclayna ida, ket impanna ida iti tapaw ti bantay nga adda iti sango ti Hebron.

4Naaramid idi iti calpasanna, nga isu nagayat iti maysa a babai idiay lobong ti Sorec, a ti naganna Dalila.

5Ket dagiti appoen dagiti Filisteos simmang-atda kencuana, ket kinunada kencuana, Isu ayayoem, ket kitaem no sadino ti yan ti pigsana a dackel unay, ken iti ania a pamuspusan ti pacabalinanmi coma a mangaladag a maibusor kencuana, tapno isu reppetenmi coma tapno isu tutuokenmi, ket mangtedcaminto kenca ti tumunggal maysa cadacami iti sangaribu ket sangagasut a capisi ti pirac.

6Ket ni Dalila kinunana ken Samson, Agdawatac kenca, ibagam caniac, no ania ti ayan ta pigsam a dackel unay, ken iti ania ti pacabalinam a mareppetto coma tapno pangtutooc kenca.

7Ket ni Samson kinunana kencuana, No reppetendacto cadagiti pito a lapnit a nalangto nga uray caano saan a napagango, no casta cumapuyacto, ket agbalinacto a cas iti sabali a tao.

8Ket dagiti appoen dagiti Filisteos nangyegda kencuana cadagiti pito a laplapnit a nalangto a saan a napagango, ket isuda dagiti pinangreppetna kencuana.

9Ket isu addaan idi cadagiti agsaneb a nagyanda iti maysa a naun-uneg a siled. Ket isu kinunana kencuana, Samson, dagiti Filisteo addada ita dennam. Ket isu ginursotna dagiti laplapnit, a cas la iti maysa a calabag ti lungtot magsat no sagiden ti apuy. Iti casta ti pigsana saan idi a naammoan.

10Ket ni Dalila kinunana ken Samson, Adtoy, sica rinabrabacnac, ket nagsaoca caniac cadagiti ul-ulbod: agdawatac kenca ibagam ita caniac, no ania ti pacabalinam a mareppetto coma.

11Ket isu kinunana kencuana, No reppetendacto cadagiti babbaro a taltali isuda nga awan idi ti naar-aramid nga aramid, no casta cumapuyacto, ket agbalinacto a cas iti sabali a tao.

12Iti casta ni Dalila nangala cadagiti babbaro a taltali, ket isuda dagiti pinangreppetna kencuana, ket kinunana kencuana, Samson, dagiti Filisteos addada ita dennam. Ket dagiti agsaneb addada idi iti maysa a naun-uneg a siled. Ket isu ginursotna ida cadagiti takiagna a casda la maysa a sagut.

13Ket ni Dalila kinunana ken Samson, Agingga ita sica rabrabakennac, ken imbagam caniac dagiti ul-ulbod: ibagam ita no ania ti pacabalinam a mareppetto coma. Ket isu kinunana kencuana. No mangyabelca cadagiti pito calabag a buoc ti oloc iti abel.

14Ket isu inlanzana iti pasoc, ket kinunana kencuana, Samson, dagiti Filisteos, addada ita dennam. Ket isu nagriing iti turogna, ket pinarotna ti pasoc ti pagab-lan ken ti abel.

15Ket isu kinunana kencuana, Casano ti pannacabalinmo nga agcuna, Siac agayatac kenca, no dayta pusom awan caniac? sica rinabrabacnac iti namitlo a daras, ket dica imbaga caniac no sadino ti ayan ta pigsam a dackel unay.

16Ket naaramid idi, nga idinto nga isu pinairutanna iti tumunggal aldaw cadagiti sasaona, ket isu inuyotanna, a ti cararuana nariribuc agingga ken patay.

17Ket isu imbagana kencuana amin a pusona, ket kinunana kencuana, Ti pangiskis saan idi nga imay iti rabaw ti oloc; ta siac idi ti maysa a Nazareo ti Dios nanipud iti tian ni inac: no mapukisanac coma, iti casta pumanawton caniac ti bilegco, ket agcapuyacto, ket agbalinacto a cas iti uray siasino a sabali a tao.

18Ket idinto a nakita ni Dalila nga isu imbagana amin a pusona, nagbaon ket inayabanna dagiti appoen dagiti Filisteos, a kinunana, Sumang-atcayo iti daytoy a daras, ta isu imbagana caniac amin a pusona. Idin dagiti appoen dagiti Filisteos simmang-atda kencuana, ket iniggamanda nga inyeg ti cuarta.

19Ket isu pinaturogna idi iti rabaw dagiti tumengna; ket nangayab iti maysa a tao, ket kiniskisanna dagiti pito a parpargayen iti olona; ket isu rinugianna ti nangparigat kencuana, ket ti pigsana pimmanaw kencuana.

20Ket isu kinunana kencuana, Samson, dagiti Filisteos addada iti dennam. Ket isu nagriing iti turogna, ket kinunana, Siac lumsotacto a cas cadagiti dadduma a tiempo, ket macalapsutacto. Ngem dina amammo a ni Jehova immadayu idi kencuana.

21Ngem dagiti Filisteos isu tiniliwda, ket sinuatda dagiti matana; ket isu insalogda idiay Gaza, ket isu pinarautanda cadagiti cawcawar a suer; ket isu naggilgiling idiay pagbaludan.

22Nupay casta ti buoc ti olona nangrugi idi a tumobo manen, iti calpasan ti pannacapukisna.

23Ket dagiti appoen dagiti Filisteos naguommongda a mangyawat iti dackel a daton ken Dagon a diosda, ken agragragsacda; ta kinuncunada, Ti diostayo inyawatna iti imatayo ni Samson a cabusortayo.

24Ket idi a dagiti tattao isu nakitada, dinayawda ti diosda, ta kinuncunada, Ti diostayo inyawatna cadagiti im-imatayo ni Samson a cabusortayo, ken ti managdadael iti dagatayo, isu a nangpapatay idi cadagiti adu cadatayo.

25Ket naaramid, nga idinto a dagiti puspusoda addada idi a siraragsac, a kinunada, Ayabanyo ni Samson, tapno agaramid cadatayo iti ay-ayam. Ket inayabanda ni Samson iti pagbaludan; ket nagaramid iti ay-ayam iti saclangda. Ket insaadda iti nagbabaetan dagiti ad-adigi.

26Ket ni Samson kinunana idi ubing a nangkibin iti imana. Anusannac ta macarawac coma dagiti ad-adigi isuda a nagsaadan ti balay, tapno agsadagac coma cadacuada.

27Ket ti balay adda idi a napno cadagiti lallaki ken babbai; ket amin dagiti appoen dagiti Filisteos addada idi sadiay; ket iti rabaw ti pangatepan adda idi tallo a ribu a lallaki ken babbai, nga agbuybuyada iti bayat a ni Samson nagaramid iti ay-ayam.

28Ket ni Samson immasug ken Jehova, ket kinunana, O Apo Jehova agdawatac kenca, lagipennac, ket papigsaennac, agdawatac kenca, iti daytoy laeng a canito, O Dios, tapno maminpinsan a balsec coma dagiti Filisteos iti maipanggep cadagitoy dua a matac.

29Ket ni Samson kinapetna dagiti dua a nagtengnga nga ad-adigi nga iti rabawda nagsaadan ti balay, ket nagsadag cadacuada, iti maysa ti imana a canawan, ket iti sabali ti imana a catigid.

30Ket ni Samson kinunana, Bay-annac a matay agraman cadagiti Filisteos. Ket isu inbuaritna agraman ti amin a pigsana, ket ti balay narba iti rabaw dagiti appoen, ken iti rabaw dagiti amin a tattao nga addada idi kencuana. Iti casta dagiti natnatay nga isu pinapatayna idi pannacatayna adaduda ngem cadagiti pinapatayna idi panagbiagna.

31Idin dagiti cacabsatna ken amin ti balay ni amana simmalogda, ket innalada ket isu insang-atda, ken intanemda iti nagbaetan ti Sora ken Estaol iti pagtaneman ni Manoa nga amana. Ket isu inocomanna ti Israel bayat ti duapulo a tawen.

← Chapter 15 Jump to: Chapter 17 →