Judges 17

Ilokano (Ti Biblia (1973))

← Chapter 16 Jump to: Chapter 18 →

1Adda idi maysa a lalaki idiay caturodan ti Efraim, a ti naganna Mica.

2Ket kinunana ken inana, Dagiti sangaribu ket sangagasut a capisi ti pirac, a naala idi kenca, a gapu cadacuada nagilunodca, ket insaom met cadagiti pagdengngegco adtoy, ti pirac adda caniac; isu innalac idi. Idin ni inana kinunana, Bendicionan coma ni Jehova ti anacco.

3Ket isu insublina ken inana dagiti sangaribu ket sangagasut a capisi ti pirac; ket ni inana kinunana, Pudno idatonco daytoy a pirac ken Jehova manipud iti imac nga agpaay iti anacco, tapno mangaramid coma iti ladawan a kinitikitan ken sinocog; gapuna isu isublicto ita kenca.

4Ket idi nga insublina ken inana dagiti pirac, ni inana nangala iti dua gasut a capisi ti pirac, ket isu intedna ida iti agtuntunaw, ket nangaramid cadagidiay iti maysa a ladawan a kinitikitan ken sinocog; ket adda idi idiay balay ni Mica.

5Ket ni lalaki a Mica addaan idi iti balay dagiti didios: ket nagaramid iti maysa nga efod, ken terafim, ket kinonsagrarna ti maysa cadagiti annacna a lalaki, a nagbalin a padina.

6Cadagidiay nga al-aldaw awan idi ti ari iti Israel: ti tumunggal maysa a tao aramidenna idi daydi a nalinteg iti matana met laeng.

7Ket adda idi maysa nga agtutubo a lalaki a taga Belen ti Juda, iti familia ni Juda, nga isu Levita; ket naggangannaet sadiay.

8Ket ti agtutubo a lalaki pimmanaw idi iti Belen nga ili ti Juda, tapno aggangannaet iti sadinoman a pacasaracanna iti lugar; ket isu immay iti caturodan ti Efraim iti balay ni Mica, idi nga isu nagpagpagna.

9Ket ni Mica kinunana kencuana, Sadino ti naggapuam? Ket isu kinunana kencuana, siac Levitaac a taga Belen ti Juda, ket innac aggangannaet iti sadinoman a pacasaracac iti lugar.

10Ket ni Mica kinunana kencuana, Makipagtaengca caniac, ket sicanto ti amac ken padi; ket siac mangtedacto kenca iti sangapulo a capisi ti pirac iti macatawen, ken iti pagan-anay a pagpelles, ken iti taraonmo. Iti casta ti Levita simrec.

11Ket ti Levita napnec iti pannakinaedna iti daydi a tao; ket daydi agtutubo a lalaki cas la maysa cadagiti annacna kencuana.

12Ket ni Mica kinonsagrarna ti Levita, ket daydi nga agtutubo a lalaki nagbalin a padina, ket nagnaed idiay balay ni Mica.

13Idin ni Mica kinunana, Ita ammoc a ni Jehova agaramidto caniac iti imbag, agsipud ta addaanac iti maysa a Levita a padi.

← Chapter 16 Jump to: Chapter 18 →