Judges 20 — Ilokano (Ti Biblia (1973))

1Idin amin dagiti annac ti Israel rimmuarda, ket ti gimong nagurnong a cas maymaysa a tao, manipud Dan agingga iti Beer-seba, agraman iti daga ti Galaad, ken Jehova idiay Mizpa.

2Ket dagiti pangpangolo dagiti amin a tattao, a dagiti amin met laeng capcaputotan ti Israel nagparangda iti paggigimongan ti ili ti Dios, nga uppat a gasut a ribu a magmagna a nagtagicampilanda.

3(Ita dagiti annac ni Benjamin nangngegda nga dagiti annac ti Israel simmang-atda idi iti Mizpa.) Ket dagiti annac ti Israel kinunada, Ibagayo cadacami, casano ti pannacaaramid idi daytoy a kinadakes?

4Ket ti Levita, nga asawa ti babai a napapatay, simmungbat ket kinunana, Siac immayac idiay Gabaa, a cucua ti Benjamin, siac ken ti camalalac, tapno agdaguscami.

5Ket dagiti lallaki ti Gabaa timmacderda a maibusor caniac, ket inalicubcubda ti balay iti aglawlaw caniac iti rabii; pinanunutda ti mamapatay, caniac ket ni camalalac pinilitda, ket natay idi.

6Ket innalac ti camalalac, ket isu pinutputedco a pinispisi, ket isu imbaonco iti amin a ili ti tawid ti Israel; ta isuda inaramidda ti kinagaramugam ken kinamauyong iti Israel.

7Adtoy, dacayo nga annac ti Israel, dacayo amin, mangtedcayo ditoy iti pammagbaga ken pammatigmaanyo.

8Ket amin dagiti tattao timmacderda a cas maymaysa a tao, a kinunada, Awan cadatayo ti mapanto iti toldana, awan cadatayo ti agsublinto iti balayna.

9No di ket ita daytoy ti banag nga aramidentayonto iti Gabaa: intayto a maibusor kencuana a ginnasangasat;

10Ket mangalatayto cadagiti sangapulo a tattao iti tumunggal sangagasut cadagiti amin a capcaputotan ti Israel, ket sangagasut iti maysa a ribu, ket sangaribu iti sangapulo ribu, tapno mapanda mangala cadagiti balbalon nga agpaay cadagiti tattao tapno aramidenda coma, intono umayda iti Gabaa ti Benjamin, ti mayanatop iti amin a kinamauyong nga inaramidda iti Israel.

11Iti casta amin dagiti lallaki ti Israel naguurnongda a maibusor iti ili, nagcucuyogda a cas maymaysa a tao.

12Ket dagiti capcaputotan ti Israel nangibaonda cadagiti lallaki iti amin a caputotan ni Benjamin, a kinunada, Ania a kinadakes daytoy a naaramid iti tengngayo?

13Gapuna ita yawatyo dagiti tattao, a dagiti lallaki a nacas-ang, nga addada iti Gabaa, tapno papatayenmi ida coma, ket iwacsimi coma ti kinadakes manipud iti Israel. Ngem ti Benjamin dina kinayat nga impangag ti timec dagiti cacabsatna nga annac ti Israel.

14Ket dagiti annac ni Benjamin naguornongda a naggapu cadagiti il-ili agingga iti Gabaa, tapno mapanda a makigubat a maibusor cadagiti annac ti Israel.

15Ket dagiti annac ni Benjamin nabilangda iti daydi nga aldaw a naggapuda cadagiti il-ili, duapulo ket innem a ribu a lallaki a nagtagicampilan, malacsid dagiti agnaed iti Gabaa, a nabilangda idi iti pito gasut a lallaki a napili.

16Cadagitoy amin a lallaki adda pito gasut a lallaki a napili a caannawidanda ti ima a catigid, ti tumunggal maysa mangipallatibong iti bato iti maysa a buoc, ket saan a bumiddot.

17Ket dagiti tattao ti Israel, malacsid ti Benjamin, nabilangda idi iti uppat a gasut a ribu a lallaki a nagtagicampilan; amin dagitoy isuda dagiti tattao ti gubat.

18Ket dagiti annac ti Israel timmacderda, ket simmang-atda agingga iti Bet-el ket nagdawatda iti patigmaan iti Dios; ket kinunada, Siasino cadacami ti umuna a sumang-atto iti gubat a maibusor cadagiti annac ni Benjamin? Ket ni Jehova kinunana, Ni Juda sumang-atto nga umuna.

19Ket dagiti annac ti Israel bimmangonda iti bigat, ket nagpacarsoda a maibusor iti Gabaa.

20Ket dagiti lallaki ti Israel rimmuarda idi a manggubat a maibusor iti Benjamin; ket dagiti lallaki ti Israel inurnosda ti gubat a maibusor cadacuada idiay Gabaa.

21Ket dagiti annac ni Benjamin rimmuarda iti Gabaa, ket nangipasagda iti daga iti duapulo ket dua a ribu cadagiti Israelitas iti daydi nga aldaw.

22Ket dagiti tattao, a lallaki ti Israel, immingelda, ket inurnosda manen ti gubat iti disso a nangurnosanda iti immuna nga aldaw.

23Ket dagiti annac ti Israel simmang-atda, ket nagsangitda iti sango ni Jehova agingga iti malem; ket nagsaludsodda ken Jehova, a kinunada, Umasidegacto manen iti gubat a maibusor cadagiti annac ni Benjamin a cabsatco? Ket ni Jehova kinunana, Sumang-atcayo a maibusor kencuana.

24Ket dagiti annac ti Israel immasidegda a maibusor cadagiti annac ni Benjamin iti maicadua nga aldaw.

25Ket ti Benjamin napan a maibusor cadacuada a naggapu iti Gabaa iti maicadua nga aldaw, ket nangipasagda manen iti daga iti sangapulo ket walo a ribu cadagiti annac ti Israel; amin dagitoy nagtagicampilanda.

26Idin amin dagiti annac ti Israel, ken amin dagiti tattao simmang-atda, ket immayda iti Bet-el, ket nagsangitda, ket nagtugawda idiay iti saclang ni Jehova, ket nagayunarda iti daydi nga aldaw agingga iti malem; ket nagidatonda cadagiti datdaton a mapuuran, ken datdaton iti cappia iti saclang ni Jehova.

27Ket dagiti annac ti Israel nagsaludsodda ken Jehova, (ta ti lacasa ti tulag ti Dios adda idiay cadagidi nga al-aldaw.

28Ket ni Finees, nga anac ni Eleazar, nga anac ni Aaron, nagtacder idi iti saclangna cadagidi nga aldaw), a kinunana, Nupay casta rumuaracto manen iti gubat a maibusor cadagiti annac ni Benjamin a cabsatco, wenno agsardengacto? Ket ni Jehova kinunana, sumang-atca; ta intono bigat yawatconto ita imam.

29Ket ti Israel nangisaad cadagiti agsaneb a maibusor iti Gabaa iti aglicmut.

30Ket dagiti annac ti Israel simmang-atda a maibusor cadagiti annac ni Benjamin iti maicatlo nga aldaw, ket inurnosda ti gubat a maibusor iti Gabaa, a cas cadagidi sabali a daras.

31Ket dagiti annac ni Benjamin rimmuarda a maibusor cadagiti tattao, ket nayadayuda iti ili; ket rinugianda ti nangcabil ken namapatay cadagiti tattao, a cas cadagidi sabsabali a daras, cadagiti calcalzada a napatac, maysa cadagidiay sumang-at iti Bet-el, ket ti sabali agpa-Gabaa, iti away, iti agtallopulo a tattao ti Israel.

32Ket dagiti annac ni Benjamin kinunada, Isuda macabilda iti sangoanantayo, a cas la idi immuna. Ngem dagiti annac ti Israel kinunada, Agtalawtayo coma, ket yadayutayo ida iti ili agingga cadagiti calcalzada a napatac.

33Ket timmacderda amin dagiti tattao ti Israel idiay lugarda, ket naguornosda idiay Baal-tamar: ket dagiti pagsaneben ti Israel rimmuarda iti lugarda, idiay met laeng Maareh-geba.

34Ket immayda a maibusor iti Gabaa dagiti sangapulo a ribu a lallaki a napili ti amin nga Israel, ket ti gubat nacaro idi; ngem dagidiay dida amammo a ti dakes umadani idi cadacuada.

35Ket ni Jehova kinabilna ti Benjamin iti sango ti Israel; ket dagiti annac ti Israel nangipasagda iti Benjamin iti daydi nga aldaw cadagiti duapulo ket lima a ribu ket sangagasut a lallaki, amin dagitoy nagtagicampilanda.

36Iti casta dagiti annac ni Benjamin nakitada nga isuda macabilda idi; ta dagiti lallaki ti Israel pinalamlamanda ti Benjamin, ta nagtalecda cadagiti agsaneb nga incabilda idi a maibusor iti Gabaa.

37Ket dagiti agsaneb nagdarasda, ket dimmuclosda iti Gabaa, ket dagiti agsaneb naglayonda, ket kinabilda ti amin nga ili iti tadem ti campilan.

38Ket ti nadutocan a tanda cadagiti lallaki ti Israel ken dagiti agsaneb isu idi, nga isuda agaramidda coma iti dackel nga ulep nga asuc a bumangon manipud iti ili.

39Ket dagiti lallaki ti Israel nagsublida iti gubat, ket ti Benjamin rinugianna ti nangsugat ken namapatay cadagiti lallaki ti Israel cadagiti agtallopulo a tattao; ta isuda kinunada, Pudno nga isuda macabilda iti saclangtayo, a cas idi immuna a gubat.

40Ngem idi a ti ulep mangrugi a bumangon manipud iti ili iti maysa a monmon ti asuc dagiti Benjamitas kimmitada iti licudda; ket, adtoy, nga iti amin nga ili umuli iti asuc nga agpalangit.

41Ket dagiti lallaki ti Israel nagsublida, ket dagiti lallaki ti Benjamin nagcullayawda idi; ta nakitada a ti dakes immay idi cadacuada.

42Gapuna nga intallicudda dagiti bucbucotda iti sango dagiti lallaki ti Israel agingga iti dalan ti let-ang; ngem ti gubat simmurot a siiinget cadacuada; ket dagiti rimmuar cadagiti il-ili pinasagda ida iti nagngalayanna.

43Isuda linacubda dagiti Benjamitas, ket kinamatda ida, ket nagamudanda ida cadagiti luglugar a paginanaanda, agingga iti sango ti Gabaa nga agpaleleggacan ti init.

44Ket idiay napasagda iti Benjamin dagiti sangapulo ket walo a ribu a lallaki amin dagitoy isuda idi dagiti tattao a mamaingel.

45Ket isuda nagsublida, ket nagtalawda a nagpalet-ang iti bato ti Rimmon: ket isuda nacasaracda manen cadacuada cadagiti daldalan a napatac cadagiti lima ribu a lallaki, ket kinamatda ida agingga iti Gidom, ket nangcabilda cadacuada cadagiti dua a ribu a lallaki.

46Iti casta amin dagidi napasag iti Benjamin iti daydi nga aldaw duapulo ket lima a ribu a lallaki a nagtagicampilan; amin dagitoy isuda idi dagiti lallaki a mamaingel.

47Ngem innem a gasut a lallaki nagsublida ken nagtalawda a nagpalet-ang iti bato ti Rimmon, ket nagyanda idiay bato ti Rommon bayat ti uppat a bulan.

48Ket dagiti lallaki ti Israel nagsublida manen cadagiti annac ni Benjamin, ket kinabilda ida iti tadem ti campilan, padapada ti dagup ti ili ken an-animal, ken amin a nasaracanda: casta met amin dagiti il-ili a nasaracanda pinasgedanda iti apuy.