Judges 13

Ilokano (Ti Biblia (1973))

← Chapter 12 Jump to: Chapter 14 →

1Ket dagiti annac ti Israel inaramidda manen daydi a dakes iti imatang ni Jehova; ket ni Jehova inyawatna ida iti ima dagiti Filisteos bayat ti uppat a pulo a tawen.

2Ket adda idi maysa a lalaki ti Sora, iti familia dagiti Danitas, isu a managan idi ti Manoa; ket ti asawana lupes idi, ket saan a naganac.

3Ket ti angel ni Jehova nagparang iti babai, ket kinunana kencuana, Adtoy ita, sica lupesca, ket dica naganac; ngem sica agsicogcanto, ket mangipasngaycanto iti anac a lalaki.

4Gapuna ita agdawatac kenca agaluadca ket dica uminum iti arac wenno aniaman a naingel nga inumen, ket dica mangan iti uray aniaman a narugit a banag:

5Ta, adtoy, sica agsicogcanto, ket mangipasngaycanto iti maysa nga anac a lalaki; ket ti pangiskis dinto umay iti rabaw ti olona, ta ti ubing isunto ti Nazareo iti Dios manipud iti tian; ket isu rugiannanto nga ispalen ti Israel iti ima dagiti Filisteos.

6Idin ti babai immay, ket sinaritana ken asawana, a kinunana, Maysa a lalaki ti Dios immay caniac, ket ti rupana isu idi ti rupa ti maysa nga angel ti Dios, nacakigkigtot unay; ket diac sinaludsud kencuana no taga-ano, uray isu dina imbaga caniac ti naganna.

7Ngem isu kinunana caniac, Adtoy, sica mangisicogcanto ken mangipasngaycanto iti maysa nga anac a lalaki; ket ita dica uminum iti arac wenno aniaman a naingel nga inumen, ket dica mangan iti uray ania a narugit; ta ti ubing isunto ti Nazareo iti Dios manipud iti tian agingga iti aldaw ti ipapatayna.

8Idin ni Manoa nagdawat ken Jehova, ket kinunana, O, Apo, agdawatac kenca, palubusam coma daydi lalaki ti Dios nga imbaonmo nga umay manen cadacami, ket isuronacami coma no ania ti aramidenminto iti ubing a mayanacto.

9Ket ti Dios impangagna ti timec ni Manoa; ket ti angel ti Dios immay manen iti babai idi isu agtutugaw iti away: ngem ni Manoa nga asawana awan idi kencuana.

10Ket ti babai nagdaras, ket nagtaray, ket imbagana ken asawana, ket kinunana kencuana, Adtoy, daydi lalaki a nagparang caniac, nga immay caniac idi sabali nga aldaw.

11Ket ni Manoa timmacder, ket sinurotna ni asawana, ket immay iti lalaki, ket kinunana kencuana, Sica daydi lalaki a nagsao iti babai? Ket isu kinunana, Siac.

12Ket ni Manoa kinunana, Matungpalda coma ita dagiti sasaom: ania ti maibilinto maipapan iti ubing, ken casano ti aramidenminto kencuana?

13Ket ti angel ni Jehova kinunana ken Manoa, Ti babai tungpalennanto dagiti amin a banbanag nga imbagac idi kencuana.

14Isu saan a mangan iti uray ania nga agtaud iti uvas, dicayo palubusan nga uminum iti arac wenno iti naingel nga inumen, saan a mangan iti uray ania a narugit; amin ti imbilinco kencuana tungpalenna coma.

15Ket ni Manoa kinunana iti angel ni Jehova, Agdawatac kenca, palubosannacami coma a mangtactac kenca, tapno agsaganacami coma iti maysa a calding nga urbon nga agpaay kenca.

16Ket ti angel ni Jehova kinunana ken Manoa, Uray no tactakennac, diacto mangan iti tinapaymo; ngem no cayatmonto agaramid iti mapuuran a daton, isu ti rebbengmo nga idaton ken Jehova. Ta ni Manoa dina idi am-ammo nga isu ti angel ni Jehova.

17Ket ni Manoa kinunana iti angel ni Jehova, Ania aya ti naganmo, tapno, intono dagiti sasaom matungpalda, mabalinminto ti agaramid kenca iti panagdayaw?

18Ket ti angel ni Jehova kinunana kencuana, Apayapay saludsudem ti naganco, idinto nga isu ti nacascasdaaw?

19Iti casta ni Manoa nangala iti urbon a lalaki a calding agraman daton a macan, ket isu ti indatonna iti rabaw ti maysa a bato ken Jehova; ket ti angel nagaramid iti nacascasdaaw unay; ket ni Manoa ken ni asawana nakitada.

20Ta naaramid, nga idi a ti darang agpangato a tumorong iti langit manipud iti altar, ti angel ni Jehova immuli iti darang ti altar, ket ni Manoa ken ni asawana nakitada, ket nagpaclebda iti rabaw ti daga.

21Ket ti angel ni Jehova saan a nagparangen cada Manoa ken ni asawana. Idin ni Manoa naawatanna nga isu angel ni Jehova.

22Ket kinuna ni Manoa ken ni asawana, Data pudno a mataytanto, ta nakitata ti Dios.

23Ket ni asawana kinunana kencuana, No ni Jehova cayatnata coma a papatayen, dina coma awaten cadagiti imata ti daton a mapuuran, ken iti daton a macan, dina coma iparang cadata amin dagitoy a banbanag, uray daytoy a tiempo dina coma ibaga iti casta a banbanag a cas cadagitoy.

24Ket ti babai nangipasngay iti maysa nga anac a lalaki, ket isu pinanagananda iti Samson: ket ti ubing dimmackel, ket isu binendicionan ni Jehova.

25Ket ti Espiritu ni Jehova nangrugi a nangtigtignay kencuana idiay Mahanedan, iti nagbaetan ti Sora ken Estaol.

← Chapter 12 Jump to: Chapter 14 →