Judges 18

Ilokano (Ti Biblia (1973))

← Chapter 17 Jump to: Chapter 19 →

1Cadagidi nga al-aldaw awan idi ti ari iti Israel: ket cadagidi nga al-aldaw ti caputotan dagiti Danitas agsapsapulda idi iti maysa a tawid tapno pagtaengan; ta agingga iti daydi nga aldaw ti tawidda saan pay a naipaay cadacuada iti tengnga dagiti capcaputotan ti Israel.

2Ket dagiti annac ni Dan imbaonda a naggapu iti familiada dagiti lima a lallaki a naggapuda iti amin a bilang, lallaki a mamaingel, a naggapuda iti Saraa, ken Estaol, tapno siimenda ken sukimatenda coma a naimbag ti daga; ket kinunada cadacuada, Incayo, ket siimenyo ti daga. Ket isuda immayda iti caturodan ti Efraim agingga iti balay ni Mica, ket nagdagusda idiay.

3Idi addada iti asideg ti balay ni Mica, nalasinda ti timec daydi agtutubo a lalaki a Levita; ket dimmagasda idiay, ket isuda kinunada kencuana, Asino ti nangyeg kenca ditoy? ket ania ti aramidem ditoy a lugar? ket ania ti adda kenca ditoy?

4Ket isu kinunana cadacuada, Iti castoy ken castoy ti nangaramidan caniac ni Mica, ket tinangdanannac, ket nagbalinac a padina.

5Ket kinunada kencuana, Agdawatcami kenca Umumanca man iti patigmaan ti Dios, tapno maammoanmi coma no iti dalanmi nga papanammi narang-ayto.

6Ket ti padi kinunana cadacuada, Incayo a sitatalna; iti saclang ni Jehova isu ti dalanyo iti papananyo.

7Idin dagiti lima a lallaki pimmanawda, ket immayda iti Lais, ket nakitada dagiti tattao, nga addada idi kencuana, nga isuda agtaengda iti kinatalged, a mayalubog iti cadawyan dagiti Sidonio, natalnada ken natalgedda; ta sadiay awan ti uray asino nga adda iti daga, nga addaan iti kinaturay, a mangicabil coma cadacuada iti bain iti uray ania, ket isuda adayuda idi cadagiti Sidonio, ket saanda a makibibiang idi iti uray siasino a tao.

8Ket isuda immayda cadagiti cacabsatda idiay Sora ken Estaol: ket dagiti cacabsatda kinunada cadacuada, Ania ti cunayo?

9Ket isuda kinunada, Tumacdercayo, ket sumang-attayo a maibusor cadacuada; ta nakitami ti daga, ket adtoy, isu namayengmeng unay. Ket dacayo agtalnacayo? dicayo agmayamay ala a mapan ken sumrec iti panagtagicua iti daga.

10Intono dacayo, umaycayto iti maysa nga ili a natalged, ket ti daga isu ti nalawa; ta ti Dios inyawatna ita imayo, maysa a lugar a sadiay awan masapsapul iti uray ania nga adda iti lubong.

11Ket rimmuarda manipud sadiay iti familia dagiti Danitas a naggapu iti Sora ken Estaol, dagiti innem a gasut a lallaki a nangibarikesda cadagiti ig-igam ti gubat.

12Ket simmang-atda, ket nagpacarsoda idiay Kiryat-jearim sadi Juda: gapuna a ninaganda daydiay a lugar iti Mahane-dan agingga iti daytoy nga aldaw; adtoy, adda iti licudan ti Kiryat-jearim.

13Ket immalatiwda manipud sadiay agingga iti caturodan ti Efraim, ket immayda iti balay ni Mica.

14Idin simmungbat dagiti lima a lallaki, a napan idi nagsiim iti ili a Lais, ket kinunada cadagiti cacabsatda, Ammoyo a cadagitoy a balbalay adda efod, ken terafim, ken ladawan a kinitikitan ken ladawan a sinocog? gapuna a panunotenyo no ania ti aramidenyo coma.

15Ket isuda dimmagasda kencuana, ket immayda iti balay daydi agtutubo a Levita, iti balay met laeng ni Mica, ket sinaludsudda kencuana iti maipapan iti casasaadna.

16Ket dagiti innem a gasut a tattao a nagibarikes cadagiti ig-igam ti gubat, nga isuda dagiti annac ni Dan, sitatacderda idi iti pagsercan ti ruangan.

17Ket dagidi lima a lallaki, a napan idi nangsiim iti daga immulida, ket immayda idiay, ket innalada ti ladawan a kinitikitan, ken ti efod, ken ti terafim, ken ti ladawan a sinocog: ket ti padi nagtacder iti pagsercan ti ruangan agraman dagiti innem a gasut a lallaki a nangibarikes cadagiti igigam ti gubat.

18Ket idi a dagitoy simrecda iti balay ni Mica, ket napanda innala ti ladawan a kinitikitan, ti efod, ken ti terafim, ken ti ladawan a sinocog, ti padi kinunana cadacuada, Ania ti aramidenyo aya?

19Ket isuda kinunada kencuana, Agtalnaca, iyapputmo ta imam ita ngiwatmo, ket makicuyogca cadacami, ket sicanto ti amami ken padi: nasaysayaat aya kenca nga agpadica iti balay ti maymaysa a tao, wenno agpadica iti maysa a caputotan ken familia ti Israel?

20Ket ti puso ti padi nagragsac, ket innalana ti efod, ken terafim, ken ti ladawan a kinitikitan, ket napan iti tengnga dagiti tattao.

21Iti casta isuda nagsublida, ket pimmanawda, ket incabilda dagiti babassit nga ubbing ken dagiti an-animal ken dagiti sansanicua iti sangoananda.

22Ket idinto nga isuda addada iti adayu bassit manipud iti balay ni Mica, dagiti tattao a nagnaed cadagiti balbalay iti asideg iti balay ni Mica naguornongda, ket kinamacamda dagiti annac ni Dan.

23Ket isuda pinuccawanda dagiti annac ni Dan. Ket isuda intaliawda dagiti rupada, ket kinunada ken Mica, Ania ti nadadael kenca nga umayca agraman iti casta a buyot?

24Ket isu kinunana, Dacayo innalayo dagiti didiosco nga inaramidco, ken ti padi, ket pimmanawcayo, ket ania pay ti adda caniac? ket casano ngarud ti panagcunayo caniac, Ania ti nadadael kenca?

25Ket dagiti annac ni Dan kinunada kencuana, Dica ipangngeg ta timecmo iti tengngami, di la ket ta dagiti lallaki a naglucsaw cabilendacayo, ket madadaelmo dayta biagmo, agraman dagiti bibiag dagiti cabbalaymo.

26Ket dagiti annac ni Dan napanda iti dalanda: ket idi a makita ni Mica nga isuda napigsada unay nga agpaay kencuana, nagbaw-ing ket simmubli iti balayna.

27Ket isuda innalada daydiay nga inaramid ni Mica, ken ti padi nga adda idi kencuana, ket immayda iti Lais, a maysa nga ili a natalged ken natalna, ket kinabilda ida iti tadem ti campilan, ket pinansgedanda ti ili iti apuy.

28Ket awan idi ti mangispal, ta isu adayu idi iti Sidon, Ket isuda dida idi makibibiang iti uray siasinoman a tao; ket adda idi iti lobong nga adda iti abay ti Bet-rehob. Ket isuda binangonda ti ili, ket nagnaedda kencuana.

29Ket ginaladanda ti nagan ti ili iti Dan, a mayalubog iti nagan ni Dan nga amada, a nayanac idi ken Israel; nupay ti nagan ti ili idi isu ti Lais idi unana.

30Ket dagiti annac ni Dan pinatacderda a maipaay cadacuada met laeng daydi ladawan a kinitikitan; ket ni Jonatan nga anac a lalaki ni Gerson, nga anac a lalaki ni Moises, isu ken dagiti annacna isuda idi dagiti padi iti caputotan dagiti Danitas agingga iti aldaw a pannacacayaw ti daga.

31Iti casta isuda pinatacderda nga agpaay cadacuada met laeng daydi ladawan a kinitikitan ni Mica, nga inaramidna idi, iti amin a tiempo a ti balay ti Dios adda idi idiay Silo.

← Chapter 17 Jump to: Chapter 19 →