Judges 14

Ilokano (Ti Biblia (1973))

← Chapter 13 Jump to: Chapter 15 →

1Ket ni Samson simmalog iti Timna, ket nakitana idiay Timna ti maysa a babai nga anac dagiti Filisteos.

2Ket simmang-at, ket impalawagna ken amana ken ni inana, ket kinunana, Nacakitaac iti maysa a babai idiay Timna cadagiti annac a babbai dagiti Filisteos: ita ngarud alaenyo nga agpaay caniac nga asawa.

3Idin da amana ken inana kinunada kencuana, Uray caanoman awan aya ti maysa a babai cadagiti annac a babbai dagiti cacabsatmo, uray iti amin nga cailiac, tapno inca mangala iti asawa cadagiti annac dagiti Filisteos a di nacugit? Ket ni Samson kinunana ken amana, Isu gunodem cadi nga agpaay caniac; ta isu pinagrayonac unay.

4Ngem ni amana ken inana dida naammoan a dayta naggapu ken Jehova; gapu ta isu nagsapul iti pamuspusan a maibusor cadagiti Filisteos. Ta daydi a tiempo dagiti Filisteos agturayda iti Israel.

5Idin simmalog da Samson ken ni amana ken ni inana, iti Timna, ket immay iti cauvasan ti Timna: ket, adtoy, ti maysa a bumaro a leon, a naguga a sipupungtot a maibusor kencuana.

6Ket ti Espiritu ni Jehova immay a sipipigsa unay kencuana, ket isu pinisangna a cas la iti panangpisangna coma iti urbon a calding; ket isu awanan iti uray aniaman iti imana: ngem dina impacaammo cada amana ken inana daydi nga inaramidna.

7Ket isu simmalog ket nakisarita idi babai; ket isu pinagrayona unay ni Samson.

8Ket idi calpasan ti dadduma a tiempo nagsubli tapno isu alaenna, ken simmiasi iti dalan tapno kitaenna daydi bangcay ti leon a natay: ket, adtoy, nga adda idi iti bangcay ti leon ti maysa a pangen ti uyocan, ken diro.

9Ket isu innalana cadagiti, im-imana, ket nagtuloy iti dalanna, a mangmangan bayat ti ipapanna ket isu nacagteng cada amana ken ni inana, ket intedna cadacuada, ket isuda nanganda: ngem dina imbaga cadacuada nga innalana ti diro iti bangcay ti leon.

10Ket ni amana simmalog agingga iti babai: ket ni Samson nangaramid idiay iti maysa a rambac; ta casta ti cadawyanda nga aramiden idi dagiti babbaro.

11Ket naaramid, nga idi isu nakitada, nangyegda cadagiti tallopulo a cadcadua tapno addada kencuana.

12Ket ni Samson kinunana cadacuada, Palubosandac ita a mangicabil iti maysa a burtia cadacayo: no dacayo mabalinyo nga ipalawag caniac iti uneg dagiti pito nga aldaw ti rambac, ket isu matumpunganyo, no casta mangtedacto cadacayo cadagiti tallopulo a cawcawes a lino ken tallopulo a pagpagan-anay a pagpelles.

13Ngem no dacayo isu dicayto mabalin nga ipalawag caniac, dacayo ngarud itdenyonto caniac dagiti tallopulo a cawcawes a lino, ken dagiti tallopulo a pagpagan-anay a pagpelles. Ket isuda kinunada kencuana, Icabilmo ta burtiam, tapno mangngegmi coma.

14Ket isu kinunana cadacuada, iti cumacaan rimmuar ti canen, ket iti napigsa rimmuar ti kinasam-it. Ket isuda dida nabalinan a impalawag daydi burtia bayat ti tallo nga aldaw.

15Ket naaramid iti maicapito nga aldaw, nga isuda kinunada iti asawa ni Samson: Ayayoem ni asawam, a mangipalawag coma cadacami iti burtia, ta no saan pasgedandaca iti apuy sica ken iti balay ni amam: inayabandacami tapno papanglawendacami? saan a pudno a casta?

16Ket nagsangit ti asawa ni Samson iti sangona, ket kinunana, Gurguraennac laeng, ket dinac ayaten: ta sica nangicabilca iti maysa a burtia cadagiti annac dagiti cailiac, ket isu dica imbaga caniac. Ket isu kinunana kencuana, Adtoy, isu diac imbaga ken amac uray ken inac, ket ibagacto kenca?

17Ket isu nagsangit iti sangona cadagiti pito nga aldaw, iti bayat ti rambacda: ket naaramid iti maicapito nga aldaw, nga isu imbagana kencuana, ta isu pinilitna unay; ket isu imbagana cadagiti annac dagiti cailianna.

18Ket iti maicapito nga aldaw iti sacbay ti ilelennec ti init, dagiti lallaki ti ili kinunada kencuana, Ania ti nasamsam-it ngem iti diro? Ket ania ti napigpigsa ngem iti maysa a leon? Ket isu kinunana cadacuada, No coma no dacayo dicayo coma pinagarado ti danawan a vacac, dicayo coma natumpungan ti burtiac.

19Ket ti Espiritu ni Jehova immay a sipipigsa unay kencuana, ket simmalog idiay Ascalon, ket nangcabil cadagiti tallopulo a tattao cadacuada, ket innalana ti samsamda, ket intedna dagiti pagan-anay a pagpelles cadagidi a nangipalawag iti burtia. Ket ti pungtotna simged, ket simmang-at agingga iti balay ni amana.

20Ngem ti asawa ni Samson naited iti caduana, isu nga inaramatna idi a cas gayyemna.

← Chapter 13 Jump to: Chapter 15 →