Judges 10

Ilokano (Ti Biblia (1973))

← Chapter 9 Jump to: Chapter 11 →

1Ket iti calpasan ni Abimelec timmacder ni Tola nga anac a lalaki ni Pua, nga anac a lalaki ni Dodo, a lalaki ti Issacar, a mangisalacan iti Israel; isu nga agnaed idi idiay Samir iti caturodan ti Efraim.

2Ket isu inocomanna ti Israel bayat ti duapulo ket tallo a tawen, ket natay, ket naitabon idiay Samir.

3Iti calpasanna timmacder ni Jair a Galaadita; nga inocomanna ti Israel bayat ti duapulo ket dua a tawen.

4Ket isu addaan idi cadagiti tallopulo nga annac a lallaki nga agsacayda cadagiti tallopulo nga as-asno nga urbon, ket addaanda cadagiti tallopulo nga il-ili, isuda a nanaganda idi cadagiti Havvot-jair agingga iti daytoy nga aldaw, nga addada idiay daga ti Galaad.

5Ket ni Jair natay ket naitabon idiay Camon.

6Ket dagiti annac ti Israel inaramidda manen daydi a dakes iti imatang ni Jehova, ket nagservida cadagiti Baales, ken ni Astarot, ken cadagiti didios ti Siria, ken cadagiti didios ti Sidon, ken cadagiti didios ti Moab, ken cadagiti didios dagiti annac ni Ammon, ken cadagiti didios dagiti Filisteos; ket indianda ni Jehova; ket dida nagservi idi kencuana.

7Ket ti pungtot ni Jehova simged a maibusor iti Israel, ket inlacona ida cadagiti ima dagiti Filisteos, ken iti ima dagiti annac ni Ammon.

8Ket isuda kiniburda ken pinarigatda dagiti annac ti Israel cadagidi a tawen: iti sangapulo ket walo a tawen pinarigatda amin dagiti annac ti Israel nga addada idi iti baliw ti Jordan idiay daga ti Amorreo, nga isu ti adda idiay Galaad.

9Ket dagiti annac ni Ammon bimmallasiwda iti Jordan tapno gubatenda idi ti Juda, ken iti Benjamin, ken iti balay ni Efraim; iti casta ti Israel isu idi ti natutuoc unay.

10Ket dagiti annac ti Israel immasugda idi ken Jehova, a kinunada, Dacami nagbasolcami iti maicaniwas kenca, agsipud ta indianmi idi ti Diosmi, ket nagservicami idi cadagiti Baales.

11Ket ni Jehova kinunana cadagiti annac ti Israel, Saan a siac idi ti nangisalacan cadacayo cadagiti Egipcios, ken cadagiti Amorreo, cadagiti annac ni Ammon, ken cadagiti Filisteos?

12Dagiti Sidonio met, ken dagiti Amalecitas, ken dagiti Maonitas pinarigatdacayo, ket dacayo immasugcayo caniac, ket insalacancayo idi iti imada?

13Ngem dacayo indiandac, ket nagservicayo cadagiti sabsabali a didios: gapuna a siac dicayo isalacanen.

14Incayo ket umasugcayo cadagiti didios a piniliyo; isuda coma ti mangispal cadacayo iti tiempo ti rigatyo.

15Ket dagiti annac ti Israel kinunada ken Jehova, Dacami nacabasolcami: aramidem cadacami ti pagarupem a naimbag; isuna laeng a dawatenmi kenca nga isalacannacami, ita nga aldaw.

16Ket iniccatda dagiti sabsabali a didios manipud iti tengngada, ket nagservida ken Jehova; ket ti cararuana napaliday gapu iti kina-ay-ay-ay ti Israel.

17Idin dagiti annac ni Ammon naguornongda, nagpacarsoda idiay Galaad; ket naggigimong dagiti annac ti Israel, ket nagpacarsoda idiay Mizpa.

18Ket dagiti tattao, a dagiti pangpanguloen ti Galaad kinunada ti maysa ken maysa, Siasinoman a tao ti mayat a mangirugi ti gubat a maibusor cadagiti annac ni Ammon isunto ti pangoloen cadagiti amin nga agnaed iti Galaad.

← Chapter 9 Jump to: Chapter 11 →