Judges 21

Ilokano (Ti Biblia (1973))

← Chapter 20 Jump to:

1Ket dagiti lallaki ti Israel insapatada idi idiay Mizpa, a kinunada, Awan cadatayo ti mangtedto iti anacna a babai a maiyasawa iti Benjamin.

2Ket dagiti tattao immayda iti Bet-el, ket nagtugawda idiay agingga iti malem iti saclang ti Dios, ket inngatoda dagiti timtimecda, ket nagsangitda iti nacaro.

3Ket isuda kinunada, O Jehova, a Dios ti Israel, apay aya daytoy a naaramid iti Israel, nga iti daytoy nga aldaw maysa a caputotan agcurang iti Israel?

4Ket naaramid idi iti sumono nga aldaw, a dagiti lallaki timmacderda iti agsapa, ket namangonda idiay iti maysa nga altar, ket nagidatagda cadagiti datdaton a mapuuran ken datdaton ti cappia.

5Ket dagiti annac ti Israel kinunada, Siasino ti adda cadagiti amin a caputotan ti Israel a di-simmangat iti gimong ken Jehova? Ta isuda nagaramidda idi iti dackel a sapata maipapan iti daydiay a di-simmang-at ken Jehova idiay Mizpa, a kinunada, Isu maicabil a di bumorong ken patay.

6Ket dagiti annac ti Israel nagbabawida a gapu iti Benjamin a cabsatda, ket kinunada, Adda maysa a caputotan a naipusay iti Israel iti daytoy nga aldaw.

7Casano ti aramidentayonto a gapu cadagiti assawa nga agpaay cadagidiay nga natda, agsipud ta datayo insapatatayo gapu ken Jehova a ditayto mangted cadacuada cadagiti annactayo a babbai nga asawaenda?

8Ket kinunada, Adda maysa cadagiti caputotan ti Israel a saan a simmang-at ken Jehova idiay Mizpa? Ket, adtoy, sadiay awan ti immay iti pacarso a naggapu iti Jabes-galaad agingga iti gimong.

9Ta idi a dagiti tattao nabilangda, adtoy, awan sadiay dagiti agnaed ti Jabes-galaad.

10Idin ti gimong nangibaon idiay cadagiti sangapulo ket dua a ribu a lallaki cadagiti camamaingelan, ket binilinda ida, a kinunada, Incayo ket cabilenyo iti tadem ti campilan dagiti agnaed ti Jabes-galaad, agraman cadagiti babbai ken cadagiti babassit nga ubbing.

11Ket daytoy isu ti banag nga aramidenyonto: dacayo dadaelenyonto a talipupusen tumunggal lalaki, ken tumunggal babai a nakicaidda idi iti lalaki.

12Ket nacasaracda cadagiti agnaed ti Jabes-galaad cadagiti uppat a gasut a babbalasang a virgen a di nacaammo iti lalaki gapu iti pannakicaiddana kencuana; ket inyegda ida iti pacarso idiay Silo, nga adda idiay daga ti Canaan.

13Ket amin a gimong nangibaonda ket nagsaoda cadagiti annac ni Benjamin nga addada idi idiay bato ti Rimmon, ket impablaacda ti cappia cadacuada.

14Ket ti Benjamin nagsubli idi a tiempo; ket intedda cadacuada dagidi babbai a biniagda cadagiti babbai ti Jabes-galaad: ket nupay casta saanda idi nga umanay cadacuada.

15Ket dagiti tattao nagbabawianda ida a gapu iti Benjamin, agsipud ta ni Jehova inaramidna ti pannacadadael cadagiti capcaputotan ti Israel.

16Idin dagiti lallacay ti gimong kinunada, Casano ti aramidentayonto a gapu cadagiti assawa a maipaay cadagiti natda, agsipud ta dagiti babbai iti Benjamin nadadaelda?

17Ket kinunada, Adda coma maysa a tawid a maipaay cadagidiay a nacatalaw iti Benjamin, tapno ti maysa a caputotan saan coma a mapunas iti Israel.

18Ngem datayo met laeng ditayo mabalin ida nga iccan cadagiti assawada cadagiti annactayo a babbai: ta dagiti annac ti Israel insapatada idi, a kinunada, Mailunod coma daydiay a mangted iti asawa iti Benjamin.

19Ket kinunada, Adtoy, nga adda fiesta ni Jehova iti tinawentawen idiay Silo, nga adda iti amianan ti Bet-el, iti daya ti dalan a napatac a sumang-at manipud iti Bet-el agingga iti Siquem, ken iti abagatan ti Lebona.

20Ket binilinda dagiti annac ni Benjamin, a kinunada, Incayo, ket agsanebcayo idiay cauv-uvasan;

21Ket agsiputcayo, ket, adtoy, a no rumuar dagiti annac a babbai ti Silo nga agsasalada cadagiti salsala, isunton ti iruruaryo cadagiti cauv-uvasan, ket cumemmegcayto tunggal maysa iti asawaenna cadagiti annac a babbai ti Silo, ket incayto iti daga ti Benjamin.

22Ket isunto, nga intono dagiti ammada wenno cacabsatda a lallaki agpulongda cadacami, dacami cunaminto cadacuada, Ipalubosyo cadacuada a siaasi cadacami; yantangay dacami dicami nangala ti agpaay tumunggal lalaki cadacuada ti asawana idiay paggugubatan, uray dacayo dicayo inted ida cadacuada; no saan a casta ita dacayo coma ti macabasol.

23Ket dagiti annac ni Benjamin inaramidda iti castoy, ket nangalada cadacuada cadagiti assawada, a mayalubog iti bilangda, cadagiti agsalsala idi isuda dagiti innalada: ket napanda ken simmublida iti tawidda, ket binangonda dagiti il-ilida, ket nagnaedda cadacuada.

24Ket dagiti annac ti Israel pimmanawda nanipud sadiay idi a tiempo tumunggal lalaki iti caputotanna ken familiana, ket napanda tunggal tao manipud sadiay agingga iti tawidna.

25Cadagidi nga al-aldaw awan idi ti ari idiay Israel: ti tumunggal tao aramidenna idi daydi a nalinteg iti matana met laeng.

← Chapter 20 Jump to: