Genesis 14

Mien Bible (Thai Script) © Thailand Bible Society, 2007

← Chapter 13 Jump to: Chapter 15 →

1ต๋อย วั้ว หฒั่น เญย ลู่ง เดี๊ย ม่าย ซีนา เต่ย-ปูง เญย ฮู่ง, อัมลาเฟน, ม่าย เอนลาสา ฒี่ง เญย ฮู่ง, อาลีโอก, ม่าย เอลาม ฒี่ง เญย ฮู่ง, เคโดลาโอเม, แอ๋ง ม่าย โกยิม ฒี่ง เญย ฮู่ง, ทิดาน.

2น้าย เต๋ย ฮู่ง เตี๋ย มี่ง เหธา โสโดม ฒี่ง เญย ฮู่ง, เบยลา, โกโมลา ฒี่ง เญย ฮู่ง, บินซา, อัดมา ฒี่ง เญย ฮู่ง, ซีน้าบ, เสโบยิม ฒี่ง เญย ฮู่ง, เซเมเบ, เหธา เบลา ฒี่ง (น้าย เซ โสอา ฒี่ง) เญย ฮู่ง เบ๊าะ จ๋า.

3น้าย เต๋ย ปยา เต้า ฮู่ง กั๊บ เจี๊ยน ชะ เยียม สิดดิม ห่อง (เซ ค้อย-เฑ้า เญย ต๋อง) เบ๊าะ จ๋า.

4นิ่น บัว หฒุ เคโดลาโอเม ฮู่ง กุ๊น นิ่น บัว เหฒียบ เหญ่ย หฮญัง มป่า เถา เหฒียบ ฟาม หฮญัง วั้ว หฮญัง นิ่น บัว แหง่ง เจี๊ยน.

5เหฒียบ เฝย หฮญัง วั้ว หฮญัง, เคโดลาโอเม ฮู่ง แอ๋ง เหธา นิ่น กั๊บ ชะ เบ๊าะ จ๋า วั้ว เต๋ย ฮู่ง มี่ง เบ๊าะ ฮี่ง เยียม อัดทาโล้ดคานนาอิม เญย เลฟาอิม เมี่ยน, เยียม ฮาม ฒี่ง เญย สูซิม เมี่ยน, เยียม ซาเว คีลิยาทาอิม เญย เดา-แป้ง เญย เอมิม เมี่ยน,

6แอ๋ง เหธา เสอี เต่ย-ปูง บง หฒั่ง ต๋อง เญย โฮลี เมี่ยน, แอ๋ง เบ๊าะ ฮี่ง เถา เอนปาลาน ฒี่ง นิด เต่ย-ปูง-ฮวาง วั้ว.

7นิ่น บัว แอ๋ง หฑวน เถา เอนมิดฟัด, (น้าย เซ คาเดด) เบ๊าะ ฮี่ง เหฑ่ง เยียม ฮาซาโซน ทามา เญย อามาเล้ก เมี่ยน, เลี่ยม อาโมไล เมี่ยน.

8ฆะฮ้า โสโดม ฒี่ง เญย ฮู่ง, โกโมลา ฒี่ง เญย ฮู่ง, อัดมา ฒี่ง เญย ฮู่ง, เสโบยิม ฒี่ง เญย ฮู่ง, เหธา เบลา ฒี่ง (น้าย เซ โสอา) เญย ฮู่ง ธ้วด มี่ง สิดดิม ห่อง เดา-แป้ง เญย ต๋อง

9เหธา วั้ว เต๋ย เปยย เต้า ฮู่ง เบ๊าะ จ๋า. ม่าย เอลาม ฒี่ง เญย ฮู่ง, เคโดลาโอเม, ม่าย โกยิม ฒี่ง เญย ฮู่ง, ทิดาน, ม่าย ซีนา เต่ย-ปูง เญย ฮู่ง, อัมลาเฟน, หย่า ม่าย เอนลาสา ฒี่ง เญย ฮู่ง, อาเลโอก. เปยย เต้า ฮู่ง เหธา ปยา เต้า ฮู่ง เบ๊าะ จ๋า.

10สิดดิม ห่อง ม่าย โญ่ว ไห่ เญย ฒูง เญย ค้วด ปวั๊ง เหฑ่ง. โสโดม เหธา โกโมลา ฒี่ง เญย ฮู่ง ถิว เปย๋า, นิ่น บัว ม่าย เต๋ย เมี่ยน ด๊อด น้าย เต๋ย ฒูง เญย ค้วด หมี่ อ๊ะ. เหฒ่ง เหฌี่ย เญย เมี่ยน เปย๋า ฝาว บง.

11วั้ว เต๋ย เปยย เต้า ฮู่ง ธ้าง เหฑ่ง โสโดม เหธา โกโมลา ฒี่ง เญย หญู่งๆ กะน้าย เหธา เหยียด ฒู้ง หญั่น ฮบ ฯฒฯ มี่ง หมี่ อ๊ะ.

12นิ่น บัว หย่า ธ้าง อับลาม เญย ฟุน, โล้ด, เหธา นิ่น เญย เหยียด ฒู้ง กะน้าย ต้อ มี่ง เหฑ่ง, เหว่ย หฒุ นิ่น เยียม โสโดม ฒี่ง.

13ม่าย เต้า เมี่ยน เปย๋า ดุ๊ด ฯฒฯ ต้อ น้าย เต๋ย สี่ มี่ง บั๋ว ฮิบลู เมี่ยน, อับลาม. อับลาม เยียม อาโมไล เมี่ยน, มัมเล, เญย ต้ม บะอง เฒวย เดี๋ยง-หล่ม. มัมเล เหธา นิ่น เญย อี เต้า โย์ว, เอดโค เหธา อาเน, โหฒว อับลาม เญย โล์-แกง ต่อย.

14อับลาม ไฮ์ ก๊อง นิ่น เญย เธียน ฟุน หฒุ ธ้าง มี่ง, นิ่น ฯฒฯ ติ่ว ฑ่อย เยียม นิ่น เญย เปย๊า ฒง ธ้วด เสย, ไฮ่ เบ๊าะ จ๋า เญย มจั่ง ตอน, ฟาม-แป๊ะ เหฒียบ เป๊ด เต้า, หฒุ่น เจี๊ยน มี่ง เถา ดาน ฒี่ง.

15เถา วั้ว อับลาม เฒาะ นิ่น กั้น เญย เมี่ยน ปุน ฆอย โหฒว เหยียด กวั้น เหยียด กวั้น เญย, ลู่ง ม์วน หฒั่น เบ๊าะ วั้ว เต๋ย เมี่ยน แอ๋ง หฒุ่น เจี๊ยน มี่ง เถา โฮบา ฒี่ง เยียม ดามัดกัด ฒี่ง เญย ป๊ะ ปูง แหมง.

16นิ่น บัว เฒาะ เหยียด ฒู้ง ธ้าง มี่ง เญย กะน้าย หฑวน. เลี่ยม นิ่น เญย ฟุน, โล้ด, เหธา โล้ด เญย หญู่งๆ กะน้าย, แอ๋ง เหธา มเซียะ ตอน เหธา แปะ ฝีง เหยียด ฒู้ง ต้อ หฑวน เหฑ่ง ต้าย อ๊ะ.

17อับลาม เบ๊าะ ฮี่ง เคโดลาโอเม ฮู่ง แอ๋ง เหธา นิ่น ต้ง เฮญี้ยว เบ๊าะ จ๋า วั้ว เต๋ย ฮู่ง, นิ่น ฯฒฯ หฑวน. เถา ซาเว ห่อง, (แอ๋ง ม่าย บั๋ว เห่ว “ฮู่ง ห่อง,”) โสโดม ฒี่ง เญย ฮู่ง ธ้วด ต้าย ฒิบ.

18แอ๋ง ม่าย ซาเลม ฒี่ง เญย ฮู่ง, เมนคีเซเดก, ต้อ เต๋ย ฌั้ว เหธา อะหงุ่น ติ๊ว ปุน อับลาม. เมนคีเซเดก โหฒว เยียม ฮลัง เจี๋ย เญย ทิน-ฮู่ง เญย ไซ เมี่ยน.

19นิ่น หย่า ปวัง หว่า ปุน อับลาม, “โท้ เยียม ฮลัง เจี๋ย เญย ทิน-ฮู่ง, เหฒย ลู่ง เหฒย เดา วั้ว เต้า, เหธย ฟุ ปุน อับลาม.

20เธง เยียม ฮลัง เจี๋ย เญย ทิน-ฮู่ง, เหว่ย หฒุ นิ่น ปุน เม่ย เญย วิน-วั้ง หฒุ เยียม เม่ย เญย ปั์ว-เดี๊ย.” อับลาม ฯฒฯ เฒาะ นิ่น ตุ๊ หฑวน ต้าย เญย เหยียด ฒู้ง กะน้าย, เหฒียบ โก๊ว เญย เหยียด โก๊ว ปุน เมนคีเซเดก.

21โสโดม ฒี่ง เญย ฮู่ง ก๊อง บั๋ว อับลาม, “ถุย เมี่ยน หฑวน ปุน เยีย. กะน้าย เม่ย กั้น หล่ง อ๊ะ.”

22อับลาม เตา โสโดม ฒี่ง เญย ฮู่ง, “เยีย ซูง เจี๊ยน ปั์ว ตอง เจี๊ยน เฒี้ยว, ต้ง เยียม ฮลัง เจี๋ย, เหฒย ลู่ง เหฒย เดา เญย ทิน-ฮู่ง, แล์ง เจี๋ย แหง่ง หว่า.

23เยีย แล์ง ตะฟ่าน เม่ย เญย หาย หญู่ง กะน้าย เยีย ไม้ หล่ง เหยียด เต๋ย. เลี่ยม เหยียด ติ้ว สุย ไฟ เหยียด ติ้ว เฮ่ ฮลาง เยีย ฒู้ง ไม้ หล่ง เหว่ย ปุน เม่ย ฆะฮ้า ฮี้ง ไม้ ตุ๊ ก๊อง, ‘เยีย เหธย อับลาม ปุ๊ด ฒ่อย.’

24เยีย กั้น ไม้ หล่ง เหยียด หญู่ง ธ้วด ลิ์ว เยีย เญย เมี่ยน หญั่น ลิ์ว ฮบ ลิ์ว เญย. ม่าย กัน เยีย มี่ง เญย เมี่ยน, อาเน, เอดโค เหธา มัมเล, อ๋อย หฒุ ปุน นิ่น บัว ตุ๊ นิ่น บัว เญย ป่วน ฮนั้ง.”

← Chapter 13 Jump to: Chapter 15 →