Genesis 47

Mien Bible (Thai Script) © Thailand Bible Society, 2007

← Chapter 46 Jump to: Chapter 48 →

1โยเซ้บ ฯฒฯ หฑวน มี่ง บั๋ว ฟาโล ฮู่ง, “เยีย เญย เตีย เหธา เยีย เญย มั์ว-ต่อย เยียม คานาอัน เต่ย-ปูง เปี้ยน เจี๊ยน นิ่น บัว เญย ยู่ง, ปะกี ยู่ง, แซง-คู้, เหยียด ฒู้ง กะน้าย ต้าย เถา อ๊ะ. อี้ หฒั่น นิ่น บัว เยียม วั้ว โกเซน.”

2โยเซ้บ กิ๊น ปยา เต้า นิ่น เญย ก๋อ เหธา นิ่น มี่ง หวุ่ย ปวั้ง ฟาโล ฮู่ง.

3ฟาโล ฮู่ง หน่าย โยเซ้บ เญย ก๋อ บัว, “เม่ย บัว โหฒว หาย หญู่ง กง หญั่น เญย เมี่ยน?”

4นิ่น บัว เตา, “เยีย บัว, เม่ย เญย โปว, เซ ยู์ง ยู่ง, ยู์ง ปะกี ยู่ง เญย เมี่ยน ฮนั้ง เยีย บัว เญย อง-ถาย นอ. เยีย บัว ต้าย เยียม โต่ว น้าย นอม เต่ย-ปูง เหว่ย หฒุ คานาอัน เต่ย-ปูง หง่อ ตุ๊ โค้ว ไห่. เลี่ยม ไม้ ม่าย เมี้ย ปุน ยู่ง กวั้น ปะกี ยู่ง กวั้น หญั่น. โท้ ปุน เยีย บัว เยียม วั้ว โกเซน.”

5ฟาโล ก๊อง บั๋ว โยเซ้บ, “อี้ หฒั่น เม่ย เญย เตีย, เม่ย เญย มั์ว-ต่อย ต้าย เถา เม่ย น้าย อ๊ะ.

6อียิบ เต่ย-ปูง เซ เยียม เม่ย เญย หฑะเฮมียน. ปุน นิ่น บัว เยียม เต่ย-ปูง เก้า หลง เจี๋ย เญย ต๋อง เหลียบ งว์า-กอน, เซ ปุน นิ่น บัว เยียม โกเซน เต่ย. สี ก๊อง นิ่น บัว หาย เต้า ม่าย ปั้น เหฒ่ย, อ๋อย หฒุ ออน โหฒว เปย๊ย เฒ้ย โก๋ว เยีย เญย แซง-คู้.”

7โยเซ้บ แอ๋ง ต้อ นิ่น เญย เตีย, ยาโค้บ, มี่ง หวุ่ย ปวั้ง ฟาโล ฮู่ง. ยาโค้บ หย่า ปวัง หว่า ฟาโล.

8ฮู่ง เตี๋ย หน่าย ยาโค้บ, “เม่ย เญย หฮญัง-เจ๊ย ตุ๊ บัวะ เหฒีย หฮญัง อ๊ะ?”

9ยาโค้บ เตา ฟาโล, “เยีย เญย เสย เฒ้ย โย่ว เจี๋ย น้าย โย่ว เจี๋ย วั้ว เยียม ตุ๊ เหยียด แป๊ะ ฟ่า เหฒียบ หฮญัง อ๊ะ. น้าย เต๋ย ฮนอย-เหญียะ โหย่ว นั้ง โหย่ว โค้ว. ไม้ ด่ง เยีย เญย อง-ถาย บัว โย่ว เจี๋ย น้าย เยียม โย่ว เจี๋ย วั้ว เยียม เญย หญุด เฒ้ย ด๊าว.”

10ยาโค้บ แอ๋ง ปวัง หฑุ่น หว่า ฟาโล ลิ์ว, ฯฒฯ ธ้วด หมี่ อ๊ะ.

11โยเซ้บ ต้อ นิ่น เญย เตีย เหธา นิ่น เญย มั์ว-ต่อย มี่ง เหลียบ งว์า-กอน เยียม อียิบ เต่ย-ปูง เก้า หลง เจี๋ย เญย ต๋อง, ลามาเสด ฒี่ง กะเฮลน, หฒิว ฟาโล ฮู่ง บั๋ว เญย หว่า.

12โยเซ้บ ปุน หญั่น ฮบ นิ่น เญย เตีย, นิ่น เญย มั์ว-ต่อย, เลี่ยม นิ่น เญย เตีย เญย เหยียด ฒู้ง เปย๊า ฒง เมี่ยน, หฒิว เมี่ยน ล่าน จวัง นิ่น บัว.

13ก๋อม วั้ว นอม เต่ย-ปูง ไม้ ม่าย หญั่น ฮบ. เมี่ยน หง่อ ตุ๊ โค้ว! ไห่. อียิบ เต่ย-ปูง เหธา คานาอัน เต่ย-ปูง เญย เมี่ยน หง่อ เกา หฮนาง, ไจ่ เหฑ่ง หมี่ อ๊ะ.

14โยเซ้บ เซียว เหฑ่ง อียิบ เมี่ยน เหธา คานาอัน เมี่ยน ม์าย เบย้า เญย เหยียด ฒู้ง ญ่าน แอ๋ง ต้อ มี่ง ฟาโล เญย ฮู่ง ติ่น.

15อียิบ เมี่ยน เหธา คานาอัน เมี่ยน เญย ญ่าน หล่ง ฌัง เหฑ่ง หมี่ อ๊ะ. อียิบ เมี่ยน ฯฒฯ มี่ง ล์อ โยเซ้บ ก๊อง, “โท้ ปุน เต๋ย หฮนาง เยีย บัว หญั่น. เยีย บัว เหว่ย หาย ติ่ว อ๋อย หฒุ เยียม เม่ย เญย หฑะเฮมียน หง่อ ไต่? เหว่ย หฒุ เยีย บัว เญย ญ่าน เหฑ่ง หมี่ อ๊ะ.”

16โยเซ้บ ก๊อง, “สี ก๊อง เม่ย บัว เญย ญ่าน เหฑ่ง หมี่ อ๊ะ นอ, ต้อ เม่ย บัว เญย แซง-คู้ ต้าย เหยี่ยน เบย้า.”

17แปะ ฝีง ฯฒฯ ต้อ นิ่น บัว เญย แซง-คู้ มี่ง โยเซ้บ วั้ว. โยเซ้บ หล่ง เบย้า เหยี่ยน นิ่น บัว เญย ยู่ง, ปะกี ยู่ง, ง่ง, ล่อ, ม์า. วั้ว หฮญัง โยเซ้บ เห่ว นิ่น บัว ต้อ แซง-คู้ ต้าย เหยี่ยน ล่าง หฒิ.

18วั้ว หฮญัง เจี๋ย ลิ์ว, ฆะฮ้า หฮญัง นิ่น บัว แอ๋ง ต้าย บั๋ว โยเซ้บ, “เยีย บัว ไม้ ปี๋ง, ก๊อง หฒะ บั๋ว เฒี้ยว, เยีย บัว เญย ญ่าน เหฑ่ง. เยีย บัว เญย แซง-คู้ หย่า เป๋น เม่ย เญย เหฑ่ง หมี่ อ๊ะ. ธ้วด ลิ์ว เยีย บัว เญย ซิน เหธา เยีย บัว เญย เดา ไม้ ม่าย หาย หญู่ง ปุน เม่ย อ๊ะ.

19เยีย บัว เหว่ย หาย ติ่ว อ๋อย หฒุ เยียม เม่ย เญย หฑะเฮมียน หง่อ ไต่? เลี่ยม เยีย บัว เหธา เยีย บัว เญย เดา อ๋อย หฒุ เหมียด เหฑ่ง. โท้ เม่ย หล่ง ล่าง หฒิ เหยี่ยน เยีย บัว เหธา เยีย บัว เญย เดา. เยีย บัว ฯฒฯ เป๋น ฟาโล ฮู่ง เญย โน่ว. เยีย บัว เญย เดา หย่า เป๋น นิ่น เญย หมี่ อ๊ะ. โท้ ปุน เบย้า ญิม เยีย บัว เหว่ย ปุน เยีย บัว ไฮ่ ตุ๊ แหม่ง เฒี่ยง, ไม้ ไต่. เด่ย หย่า ไม้ หฒุ กวั่ง เจี๊ยน ฮวางๆ วั้ว.”

20ฮนั้ง หน่าย โยเซ้บ ม์าย เหฑ่ง อียิบ เต่ย-ปูง เญย เดา ปุน ฟาโล ฮู่ง. อียิบ เมี่ยน เต้าๆ หม่าย เหฑ่ง นิ่น บัว เญย เดา, หลาย นิ่น บัว หง่อ ตุ๊ ปะหละ โค้ว ธูง มี่ง. เดา เหยียด ฒู้ง ฯฒฯ เป๋น เหฑ่ง ฟาโล เญย.

21โยเซ้บ หย่า ปุน หฒวัง แปะ ฝีง เยียม น้าย ปูง อียิบ มี่ง เถา วั้ว ปูง อียิบ เป๋น เหฑ่ง ฟาโล ฮู่ง เญย โน่ว.

22ขูง เหฒ่ง ไซ เมี่ยน เญย เดา โยเซ้บ ไม้ ม์าย ฮนั้ง, เหว่ย หฒุ ไซ เมี่ยน หฒั่นๆ ตุ๊ ฟาโล ฮู่ง จวัง เญย ป่วน. นิ่น บัว ตุ๊ เก๋า ฟาโล ฮู่ง เญย ป่วน ยู์ง แหม่ง ฯฒฯ ไม้ หฒุ หม่าย กั้น เญย เดา.

23โยเซ้บ ก๊อง บั๋ว หฒวัง แปะ ฝีง, “อี้ ฮนอย เยีย ม์าย เม่ย บัว เหธา เม่ย บัว เญย เดา ปุน ฟาโล ฮู่ง หมี่ อ๊ะ. น้าย เยีย แอ๋ง ปุน เจี๊ยน กะน้าย-ญิม ปุน เม่ย บัว หฒวัง วั้ว เด่ย.

24เถา เซียว เญย เฒี่ยง โห่, ปยา โก๊ว เฒาะ ธ้วด เหยียด โก๊ว ปุน ฟาโล ฮู่ง. เหฒ่ง วั้ว เต๋ย เปยย โก๊ว ปุน เม่ย บัว โหฒว ญิม หฒวัง หย่า ปุน เม่ย บัว กั้น เหธา เม่ย บัว เญย ฮมวั้ง ต่อย หญั่น.”

25แปะ ฝีง ก๊อง, “เม่ย เหฌียว ธ้วด เยีย บัว เญย แหม่ง. โท้ ปุน เยีย บัว เยียม เม่ย เญย หฑะเฮมียน ตุ๊ หลง, เยีย บัว ฯฒฯ แล์ง โหฒว ฟาโล ฮู่ง เญย โน่ว.”

26โยเซ้บ เหลียบ ติ้ว เล์ย ต้าย, หธ่อ หล่ง เจี๊ยน เถา อี้ จ๋า ฮนอย, เซ อียิบ เต่ย-ปูง เญย แกง-หฒวัง กะน้าย ปยา โก๊ว อ๋อย หฒุ ปุน โก๊ว ฮู่ง เตี๋ย. ขูง ม่าย ไซ เมี่ยน เญย เดา ฮนั้ง ไม้ เป๋น ฮู่ง เตี๋ย เญย ป่วน.

27อิสะลาเอน เมี่ยน เยียม อียิบ เต่ย-ปูง, โกเซน เต่ย, ตุ๊ นิ่น บัว กั้น เญย เดา หย่า หฮยาง ต้าย ม่าย ฝุเจว๊ย ธั้ม.

28ยาโค้บ เยียม อียิบ เต่ย-ปูง ตุ๊ เหฒียบ เธี้ยด หฮญัง, นิ่น เญย หฮญัง-เจ๊ย ตุ๊ เหยียด แป๊ะ เฝย เหฒียบ เธี้ยด หฮญัง.

29เถา อ๊า ลั่ม เต๋ย เกวย เสย เญย เฒี่ยง โห่, นิ่น เห่ว นิ่น เญย ตอน, โยเซ้บ, ต้าย, บั๋ว โยเซ้บ, “สี ก๊อง หฒิว ตอน ปวัด, เยีย โหฒว หอบ เม่ย เญย เฮญี้ยว นอ, โท้ ต้อ เม่ย เญย ปั์ว อัน เจี๊ยน เยีย เญย ธั่ม ฒุ่ย กะเดี๊ย แหมง แล์ง แหง่ง หว่า. อ๋อย หฒุ แล์ง เม่ย อ๋อย เหฒียบ ฒัวะ เญย โหฒว หลง ปุน เยีย, ไม้ หฒัง เยีย เญย เซย เยียม น้าย อียิบ เต่ย-ปูง.

30เยีย เกวย เสย, ตอน อ๋อย หฒุ ต้อ เยีย เญย เซย ธ้วด อียิบ เต่ย-ปูง หฑวน มี่ง จวั่ง เยีย เญย อง-ถาย เญย โฒ้ว หฒัง.” โยเซ้บ เตา, “เยีย ฒู้ง อ๋อย เอย เจี๊ยน เตีย เญย หว่า โหฒว.”

31ยาโค้บ ก๊อง, “เยีย อ๋อย เม่ย แล์ง แหง่ง หว่า เม่ย หฒะเก้ง โหฒว.” โยเซ้บ ฯฒฯ แล์ง เจี์ย แหง่ง หว่า. แล์ง ลิ์ว, ยาโค้บ เยียม วั้ว โหธว-ต้าว โด๊ะ เหฌี่ย ป๋าย ทิน-ฮู่ง.

← Chapter 46 Jump to: Chapter 48 →