Genesis 23

Mien Bible (Thai Script) © Thailand Bible Society, 2007

← Chapter 22 Jump to: Chapter 24 →

1ซาลา เฒี่ยง เสย หฒั่ง เญย หฮญัง-เจ๊ย ตุ๊ เหยียด แป๊ะ หญี่ เหฒียบ เธี้ยด หฮญัง.

2นิ่น เกวย เสย วั้ว หฒั่น เยียม คานาอัน เต่ย, คีลิย้าดอานบา, เซ เฮโบโลน ฒี่ง วั้ว. ซาลา ไต่ มี่ง, อับลาฮัม เฑ่า ไห่, เยียม วั้ว เญี้ยม.

3อับลาฮัม เยียม เกะ นิ่น เญย เอ๊า เญย กะเฮลน มี่ง บั๋ว ฮิดไท เมี่ยน,

4“เยีย เซ กั้น ฝีง เมี่ยน ต้าย เหธา เม่ย บัว เยียม น้าย. โท้ เม่ย บัว หม่าย เต๋ย เยียม น้าย เญย เดา ปุน เยีย โหฒว โฒ้ว-เก้ม หฒัง เยีย เญย เอ๊า.”

5วั้ว เต๋ย ฮิดไท เมี่ยน เตา, “ต้ม ก๋อ อ่า,

6เม่ย หมวัง เยีย บัว ก๊อง โอ่. เม่ย เยียม เยีย บัว บุด๋ง เซ เหยียด เต้า โหฒว โฮล เญย เมี่ยน. เม่ย หมั่ง ก๋า, หาย นอม ต๋อง เก้า หลง เจี๋ย, เม่ย กุ๊น ต้อ เม่ย เญย เอ๊า มี่ง หฒัง วั้ว. เยียม เยีย บัว น้าย ไม้ ม่าย หาย เต้า แฑง เจี๊ยน นิ่น เญย โฒ้ว ไฟ ล่าน เจี๊ยน ไม้ ปุน หฒัง เม่ย เญย เอ๊า.”

7อับลาฮัม ฯฒฯ เจี์ย ซิน ป๋าย วั้ว นอม เต่ย-ปูง เญย ฮิดไท เมี่ยน.

8นิ่น ก๊อง, “สี ก๊อง เม่ย บัว ม่าย เฮญี้ยว ปุน เยีย หฒัง เยีย เญย เอ๊า เยียม น้าย นอม ต๋อง, โท้ เม่ย บัว หมวัง เยีย เญย หว่า แอ๋ง เถง เยีย โท้ โสหา เญย ตอน, เอโฟโลน.

9โท้ นิ่น หม่าย มักเปลา แบ๋ง-ค้วด ปุน เยีย. น้าย นอม แบ๋ง-ค้วด เยียม นิ่น เญย เด่ย-ต้าว. โท้ นิ่น เยียม เม่ย บัว เญย หฑะเฮมียน หม่าย ปวั๊ง จ๋า-ฒิ่น เหว่ย เป๋น เยีย เญย ป่วน โหฒว โฒ้ว-เก้ม.”

10วั้ว เต้า ฮิดไท เมี่ยน, เอโฟโลน, เยียม นิ่น กั้น เญย เมี่ยน บุด๋ง ตอง เจี๊ยน เฒว์ย ฒี่ง แก้ง ด่าง เญย ฮิดไท เมี่ยน เตา อับลาฮัม, “ต้ม ก๋อ อ่า,

11ไม้ หฒุ อ๊ะ. หมวัง เยีย ก๊อง โอ่. เยีย เฒาะ วั้ว ฑง เด่ย, เลี่ยม แบ๋ง-ค้วด, ฝูง ปุน เม่ย เหฑ่ง. เยียม น้าย ตอง เจี๊ยน เยีย กั้น เญย เมี่ยน เยีย จิว ปุน เม่ย. กุ๊น ต้อ เม่ย เญย เอ๊า มี่ง หฒัง วั้ว อ๊ะ.”

12มป่า อับลาฮัม แอ๋ง ป๋าย วั้ว นอม เต่ย-ปูง เญย เมี่ยน,

13ตอง เจี๊ยน หฒวัง เมี่ยน บั๋ว เอโฟโลน. “สี ก๊อง เม่ย อะเฮน้ย นอ, โท้ เม่ย หมวัง เยีย โอ่. เยีย ปวั๊ง เฮญี้ยว ปุน วั้ว ฑง เด่ย เญย จ๋า-ฒิ่น. โท้ เม่ย ฒิบ เหว่ย ปุน เยีย ไฮ่ เยียม วั้ว นอม ต๋อง หฒัง เยีย เญย เอ๊า.”

14เอโฟโลน เตา อับลาฮัม,

15“ต้ม ก๋อ อ่า, หมวัง เยีย โอ่. น้าย ฑง เด่ย เญย จ๋า-ฒิ่น หฒี่ ตุ๊ อี จ้อย เหธา ฟ่า เหฒียบ เฝย ลู์ง ญ่าน ฮนั้ง. มป่า เม่ย เหธา เยีย ไม้ หฒุ ฝุน หาย หญู่ง อ๊ะ. กุ๊น หฒัง เม่ย เญย เอ๊า อ๊ะ.”

16อับลาฮัม ฯฒฯ ตี่ง ม์าย อ๊ะ. เอย เอโฟโลน ตอง เจี๊ยน ฮิดไท เมี่ยน ก๊อง เญย หว่า, นิ่น เฑียง อี จ้อย ฟ่า เหฒียบ เฝย ลู์ง ญ่าน, หฒิว วั้ว นอม เต่ย-ปูง เญย แซง-เอ๋ย เมี่ยน เฑียง เญย เฮนี้ย-ต้าว, ปุน เอโฟโลน.

17เอโฟโลน เญย เด่ย เยียม มักเปลา, เซ เยียม มัมเล เญย ตง ปูง แหมง. น้าย ฑง เด่ย เหธา เด่ย กะญั์ว เญย แบ๋ง-ค้วด, เลี่ยม ฮวีง หฑวน เญย เดี๋ยง เป๋น เหฑ่ง อับลาฮัม เญย.

18เยียม ฒี่ง แก้ง ธ่าง ล่าง วั้ว หฒั่น, วั้ว เต๋ย ฮิดไท เมี่ยน เต้าๆ ฯฒฯ ฮิ้ว ตุ๊ วั้ว ฑง เด่ย หม่าย ตั๋ง ปุน อับลาฮัม หมี่ อ๊ะ.

19อับลาฮัม ฯฒฯ ต้อ นิ่น เญย เอ๊า, ซาลา, มี่ง หฒัง เยียม มักเปลา เญย แบ๋ง-ค้วด, คานาอัน เต่ย-ปูง, นิด มัมเล วั้ว. (เซ นิด เฮโบโลน.)

20วั้ว ฑง เด่ย เหธา เด่ย กะญั์ว เญย แบ๋ง-ค้วด, ฮิดไท เมี่ยน หม่าย ตั๋ง ปุน อับลาฮัม หล่ง โหฒว โฒ้ว-เก้ม.

← Chapter 22 Jump to: Chapter 24 →