Genesis 30

Mien Bible (Thai Script) © Thailand Bible Society, 2007

1ลาเซน ฮิ้ว ตุ๊ นิ่น กั้น ไม้ ไฮ่ ยู์ง กู้งว์า ปุน ยาโค้บ, นิ่น ฯฒฯ เหมว่ย เจี๊ยะ นิ่น เญย ต่อ. นิ่น ก๊อง บั๋ว ยาโค้บ, “เม่ย ปุน เยีย ตุ๊ ฝุเจว๊ย ม่าะ! ไม้ เฒย แอ๊ะ, เยีย ไต่ อ๊ะ.”

2ยาโค้บ เฉีย เจี์ย ไห่ ลาเซน. นิ่น ก๊อง, “เยีย ไม้ เฒ์ย ทิน-ฮู่ง. ทิน-ฮู่ง กั้น ปุน เม่ย ไม้ ไฮ่ ม่าย กู้งว์า.”

3ลาเซน ก๊อง, “น้าย เยีย เญย โน่ว เป์ย, บินฮา. เม่ย กุ๊น เหธา นิ่น เปว๋ย ม่าะ! นิ่น ไฮ่ ยู์ง กู้งว์า ปุน เยีย, เยีย ฯฒฯ หลาย นิ่น ตุ๊ เต้า กู้งว์า ฝุน เยีย เญย ป่วน.”

4ลาเซน ฯฒฯ ปุน นิ่น เญย โน่ว เป์ย, บินฮา, นิ่น เญย โหฆ หล่ง โหฒว เอ๊า. ยาโค้บ หย่า เหธา นิ่น เปว๋ย.

5บินฮา ฯฒฯ ม่าย เจี๊ยน ซิน, ยู์ง ตุ๊ เต้า ตอน ปุน ยาโค้บ.

6ลาเซน ก๊อง, “ทิน-ฮู่ง เซี้ยม ลิ์ว ตี่ง ปุน เยีย, หย่า ไฮ์ เยีย โจ้ว เญย หว่า ฯฒฯ ปุน เต้า ตอน เยีย.” ลาเซน ฯฒฯ เถง วั้ว เต้า ตอน ธ้วด บั๋ว เห่ว ดาน.

7ลาเซน เญย โน่ว เป์ย, บินฮา, แอ๋ง ม่าย เจี๊ยน ซิน, ยู์ง ตุ๊ ตะเหญ่ย เต้า ตอน ปุน ยาโค้บ.

8ลาเซน ก๊อง, “เยีย เหธา เยีย เญย ต่อ แฑง ต้ม จ๋า หย่า แฑง ตุ๊ ฮี่ง.” นิ่น เถง วั้ว เต้า ตอน ธ้วด บั๋ว เห่ว นับทาลี.

9เลอา ฮิ้ว ตุ๊ นิ่น กั้น ไม้ ยู์ง กู้งว์า อ๊ะ. นิ่น ฯฒฯ ปุน นิ่น เญย โน่ว เป์ย, สินปา, ยาโค้บ หล่ง โหฒว เอ๊า.

10สินปา หย่า ยู์ง ตุ๊ เต้า ตอน ปุน ยาโค้บ.

11เลอา ก๊อง, “เยีย เก้ง แหม่ง หลง.” นิ่น ฯฒฯ เถง วั้ว เต้า ตอน ธ้วด บั๋ว เห่ว กาด.

12เลอา เญย โน่ว เป์ย, สินปา, แอ๋ง ยู์ง ตุ๊ ตะเหญ่ย เต้า ตอน ปุน ยาโค้บ.

13เลอา ก๊อง, “เยีย เฌียน-โย่ว ไห่ อ๊ะ. หฒวัง มเซียะ ตอน หย่า อ๋อย ก๊อง เยีย เฌียน-โย่ว ไห่.” นิ่น ฯฒฯ เถง วั้ว เต้า ตอน ธ้วด บั๋ว เห่ว อาเซ.

14ก๊าด เบย้า วิด เญย เฒี่ยง โห่, ลูเบน มี่ง ซาว วั้ว เด่ย, ปวัด ฒู่ง ดูดาอิม เจี้ย. นิ่น ฯฒฯ ต้อ ต้าย ปุน นิ่น เญย มา เลอา. ลาเซน ก๊อง บั๋ว นิ่น เญย ต่อ, “โท้ ปุน เต๋ย ต่อ เญย ตอน เญย ดูดาอิม เจี้ย เยีย ม่าะ!”

15เลอา เตา, “เยีย เญย โหฆ เม่ย ฒู้ง แฑง มี่ง อ๊ะ. หธ่อ ไม้ แก้ง เก๋า? เม่ย แอ๋ง อ๋อย แฑง เยีย เญย ตอน เญย ดูดาอิม เจี้ย?” ลาเซน ก๊อง, “เม่ย ปุน เต๋ย เม่ย เญย ตอน เญย ดูดาอิม เจี้ย เยีย นอ, อี้ ม์วน เยีย ปุน ยาโค้บ เหธา เม่ย เปว๋ย.”

16หฮมวัง เต๋ย, ยาโค้บ เยียม เด่ย หฑวน, เลอา มี่ง ฒิบ. นิ่น ก๊อง, “อี้ ม์วน เม่ย อ๋อย หฒุ เหธา เยีย เปว๋ย. เยีย ต้อ เยีย เญย ตอน เญย ดูดาอิม เจี้ย เหยี่ยน เม่ย หมี่ อ๊ะ.” วั้ว ม์วน ยาโค้บ ฯฒฯ เหธา เลอา เปว๋ย.

17ทิน-ฮู่ง เตา เลอา โจ้ว นิ่น เญย หว่า. เลอา แอ๋ง ม่าย เจี๊ยน ซิน, ยู์ง ตุ๊ ตะฮม์ เต้า ตอน ปุน ยาโค้บ.

18เลอา ก๊อง, “เหว่ย หฒุ เยีย ปุน เยีย เญย โน่ว เป์ย เยีย เญย โหฆ หล่ง, ทิน-ฮู่ง ปุน ฒี่ง เหญ่ย เยีย.” นิ่น ธ้วด วั้ว เต้า ตอน เญย บั๋ว เห่ว อิดสาคา.

19เลอา แอ๋ง ม่าย เจี๊ยน ซิน, ยู์ง ตุ๊ ตะหลัวะ เต้า ตอน ปุน ยาโค้บ.

20เลอา ก๊อง, “ทิน-ฮู่ง ปุน หลง ไห่ เญย ฒี่ง เหญ่ย เยีย. อี้ หฒั่น เยีย เญย โหฆ ด่ง หาย หย่า อ๋อย ท่าย เยีย เหว่ย หฒุ เยีย ยู์ง ตุ๊ จุ๊ เต้า ตอน ปุน นิ่น.” นิ่น ธ้วด นิ่น เญย ตอน เญย บั๋ว เห่ว เสบูลุน.

21ฆะฮ้า เลอา แอ๋ง ยู์ง ตุ๊ เต้า เซียะ หย่า ธ้วด บั๋ว เห่ว ดีนา.

22โหฒว เกา, ทิน-ฮู่ง จั๋ง เถา ลาเซน, แอ๋ง เตา นิ่น โจ้ว เญย หว่า, ปุน นิ่น ไฮ่ ม่าย กู้งว์า.

23นิ่น ฯฒฯ ม่าย เจี๊ยน ซิน, ยู์ง ตุ๊ เต้า ตอน. นิ่น ก๊อง, “ทิน-ฮู่ง ปุน เต้า ตอน เยีย, เถง เยีย ปวัง เฮมียน, ไม้ หฒุ เตี๊ย ไญ้.

24โท้ ทิน-ฮู่ง แอ๋ง ปุน เต้า ตอน เยีย.” นิ่น ฯฒฯ ธ้วด บั๋ว เห่ว โยเซ้บ.

25ลาเซน ตุ๊ ลิ์ว โยเซ้บ, ฆะฮ้า ยาโค้บ ก๊อง บั๋ว นิ่น เญย อง-ตา, ลาบาน, “โท้ ปุน เยีย หฑวน เยีย เญย ป๊วน-เต่ย ต๋อง อ๊ะ โอ่.

26เตีย ฮิ้ว ตุ๊ เยีย ต้าย เถง เม่ย โหฒว กง เปี๊ยด ดุ๊ด เยีย เญย เอ๊า-เจว๊ย หมี่ อ๊ะ. โท้ ปุน เยีย ต้อ เจี๊ยน หฑวน อ๊ะ.”

27มป่า ลาบาน ก๊อง, “สี ก๊อง เม่ย ปวั๊ง เฮญี้ยว, โท้ แอ๋ง เหธา เยีย เยียม. เยีย สัม ตุ๊ ธ้วด, ฮิ้ว ตุ๊ เซ เหว่ย เม่ย, เฒี้ยว หธีง เหธย ฟุ ปุน เยีย.

28เม่ย เญย กง-ฒิ่น อ๋อย หล่ง บัวะ เหฒีย กุ๊น ก๊อง บั๋ว เยีย ม่าะ! เยีย ฯฒฯ ปุน.”

29ยาโค้บ เตา นิ่น เญย อง-ตา, “เตีย ฮิ้ว ตุ๊ เยีย โหฒว เญย กง ด่ง หาย หลง, หย่า ฮิ้ว ตุ๊ เม่ย เญย แซง-คู้ ด่ง หาย ธั้ม.

30เยีย ไม้ แก้ง ต้าย เญย เฒี่ยง โห่, เตีย ม่าย เต๋ย ป๊า ฮนั้ง. อี้ หฒั่น ม่าย ธั้ม ไห่ อ๊ะ. เยีย โหฒว เถา หาย, เฒี้ยว เหธย ฟุ ปุน เม่ย. มป่า เถา หาย หฒั่น เยีย หธีง เหลียบ ตุ๊ เยีย เญย จา-ตี้ง?”

31ลาบาน หน่าย ก๋า นิ่น, “วั้ว หญู่ง, เยีย อ๋อย หฒุ ปุน หาย หญู่ง เม่ย?” ยาโค้บ เตา, “เตีย ไม้ หฒุ ปุน หาย หญู่ง เยีย. สี ก๊อง เตีย อ๋อย ฮนั้ง น้าย นอ เถง เยีย, เยีย แอ๋ง โก๋ว เจี๊ยน เม่ย เญย ปะกี ยู่ง เหธา ยู่ง กวั้น มี่ง.

32อี้ ฮนอย เยีย อ๋อย มี่ง ติ๊ม หมั่ง เม่ย เญย เหยียด ฒู้ง ปะกี ยู่ง เหธา ยู่ง กวั้น. ตะฟ่าน ปะกี ยู่ง ม่าย เตี๊ยม โธว, เตี๊ยม หม่วน เญย, เหธา ปะกี ยู่ง ตอน เจี๊ยะ, เหธา เต้าๆ ยู่ง ม่าย เตี๊ยม โธว ไฟ เตี๊ยม หม่วน เญย, เยีย หล่ง โหฒว เยีย เญย กง-ฒิ่น.

33ฮนั้ง น้าย นอ, ฆะฮ้า ฮี้ง เยีย โหฒว เฮญี้ยว หฒะ ไฟ ไม้ หฒะ, เตีย ฯฒฯ ฮิ้ว เญย. หาย หฒั่น มี่ง หมั่ง เยีย เญย กง-ฒิ่น, ปวัด หาย เต้า ยู่ง ไม้ เปน หย่า ไม้ ม่าย เตี๊ยม, ไฟ ปวัด หาย เต้า ปะกี ยู่ง ตอน ไม้ เจี๊ยะ นอ, ฯฒฯ ฮิ้ว ตุ๊ เยีย ผิน ต้าย อ๊ะ.”

34ลาบาน เตา, “หลง อ๊ะ. ฮนั้ง เม่ย ก๊อง นอ โหฒว.”

35ต้ง วั้ว ฮนอย ลาบาน มี่ง ติ๊ม หมั่ง นิ่น เญย ยู่ง. ยู่ง โก๊ว เปน เญย, ม่าย เตี๊ยม เญย, นิ่น กิ๊น ธ้วด. ยู่ง เญ์ย ม่าย เตี๊ยม โธว เตี๊ยม หม่วน เหธา เต้าๆ ม่าย แปะ หฒอบ เจี๊ยน, เหธา เหยียด ฒู้ง ปะกี ยู่ง ตอน เจี๊ยะ นิ่น หย่า กิ๊น ธ้วด. น้าย เต๋ย เหยียด ฒู้ง นิ่น จิว ปุน นิ่น กั้น เญย ตอน บัว โก๋ว,

36หย่า ฮ่อง เจี๊ยน มี่ง เล่ย ยาโค้บ ปัว ฮนอย เญย เจ๊า. ยาโค้บ แอ๊ะ, หธ่อ โก๋ว เจี๊ยน ลาบาน เหฒ่ง เหฌี่ย เญย ปะกี ยู่ง เหธา ยู่ง กวั้น.

37ยาโค้บ มี่ง จั๊ม ปอบล่า, อันมัน เหธา พะเลน เดี๋ยง-ฆว่า เญี์ยม ต้าย เหฆน ฉง แฆะ ฉง เดี๋ยง-ด๊บ กวั่ง, ปุน เดี๋ยง-อ๊อ ธ้วด ต้าย แปะ เญย, เปน เญย.

38นิ่น ฯฒฯ ต้อ น้าย เต๋ย โหฒว เปน เญย เดี๋ยง-ฆว่า อัน เจี๊ยน แซง-คู้ เญย หฑะเฮมียน, ววม-โฒ่ กะญั์ว. แซง-คู้ แซง เญย เฒี่ยง โห่ ต้าย ฮบ ววม,

39นิ่น บัว ฯฒฯ เยียม น้าย เต๋ย เดี๋ยง เญย หฑะเฮมียน แหมง ต๊าบ ฒวั้ง. นิ่น บัว หย่า เหฌี่ย ตอน เปน เญย, ม่าย เตี๊ยม โธว ไฟ เตี๊ยม หม่วน เญย.

40ยาโค้บ เฒาะ ยู่ง เหธา ปะกี ยู่ง ตอน ปุน ฆอย กั้น หธะเหล่ง อัน นอม ต๋อง. ปะกี ยู่ง เหธา ยู่ง นิ่น ปุน หูง มี่ง ลาบาน เญย ปะกี ยู่ง เจี๊ยะ เหธา เปน วั้ว ปูง. นิ่น ฮนั้ง น้าย นอ โหฒว ปุน กั้น เญย ปะกี ยู่ง หฮยาง. นิ่น เญย ป่วน ยู่ง เหธา ปะกี ยู่ง กั้น หธะเหล่ง อัน นอม ต๋อง, ไม้ ปุน หฒอบ ลาบาน เญย.

41หาย หฒั่น เฮ้น เญย วั้ว เต๋ย แซง-คู้ ต๊าบ ฒวั้ง นิ่น เฒาะ วั้ว เต๋ย เดี๋ยง-ฆว่า ตน เจี๊ยน หฑะเฮมียน แหมง, ววม-โฒ่ กะญั์ว. นิ่น บัว เยียม น้าย เต๋ย เดี๋ยง เญย กะเฮลน ต๊าบ ฒวั้ง,

42มป่า ไม้ เฮ้น วั้ว เต๋ย ต๊าบ ฒวั้ง นิ่น ไม้ เฒาะ น้าย เต๋ย เดี๋ยง-ฆว่า ตน หฑะเฮมียน แหมง. ฮนั้ง หน่าย, ไม้ เฮ้น วั้ว เต๋ย เป๋น ลาบาน เญย. เฮ้น วั้ว เต๋ย เป๋น เหฑ่ง ยาโค้บ เญย.

43ยาโค้บ กุ๊น โหฒว กุ๊น ปุ๊ด ฒ่อย. ม่าย ยู่ง, ม่าย ปะกี ยู่ง, ม่าย โน่ว เก๊า โน่ว เป์ย, ม่าย ล่อ ท่อ, ม่าย ล่อ. หญู่งๆ ฒู้ง ม่าย ธั้ม.

← Chapter 29 Jump to: Chapter 31 →