Genesis 15

Mien Bible (Thai Script) © Thailand Bible Society, 2007

← Chapter 14 Jump to: Chapter 16 →

1น้าย เต๋ย สี่ เจี๋ย ลิ์ว, ฆะฮ้า อับลาม ปวัด หล่าว ย่าง เญย เจ๊า ธ้วด ต้าย หย่า ไฮ์ เฒี้ยว ก๊อง บั๋ว นิ่น, “อับลาม อ่า, เม่ย ไม้ ตู๋ง กั้ม เหฑีย โอ่. เยีย โหฒว เม่ย เญย ท้อง-ป้าย เปว เจี๊ยน เม่ย, อ๋อย ปุน ต้ม ฒี่ง เหญ่ย เม่ย.”

2มป่า อับลาม ก๊อง, “เฒี้ยว ทิน-ฮู่ง อ้า! เม่ย อ๋อย ปุน หาย หญู่ง ฒี่ง เหญ่ย เยีย? เยีย เลี่ยม ไม้ ม่าย เหยียด เต้า ฝุเจว๊ย. ขูง ม่าย ดามัดกัด ฒี่ง เญย เอลีเยเซ ตุ๊ หฑิบ เยีย เญย จา-ตี้ง ฮนั้ง.

3เม่ย ไม้ ปุน เหยียด เต้า ฝุเจว๊ย เยีย, ขูง ม่าย เหยียด เต้า เยียม เยีย เญย เปย๊า ยู์ง ต้าย เญย โปว ตุ๊ หฑิบ เยีย เญย จา-ตี้ง ฮนั้ง.”

4อับลาม แอ๋ง ไฮ์ เฒี้ยว บั๋ว นิ่น, “เม่ย เญย โปว, เอลีเยเซ, ไม้ ตุ๊ หฑิบ เม่ย เญย จา-ตี้ง เหลาะ. เม่ย กั้น เญย เธียน ตอน อ๋อย ตุ๊ หฑิบ.”

5เฒี้ยว ฯฒฯ ต้อ อับลาม ธ้วด แก้ง ขะเดา. นิ่น ก๊อง, “หมั่ง ก๋า กู้ หงว่าย ลู่ง! เม่ย ซ้าว ตุ๊ เหฮลย เหฑ่ง เญย นอ, ซ้าว หมั่ง ก๋า ม่าะ! เม่ย ฒู้ง อ๋อย ม่าย เฒ้ย-ฟุน ด่ง น้าย ธั้ม.”

6อับลาม เสียน เฒี้ยว. เหว่ย นิ่น เสียน, เฒี้ยว ฝุน อับลาฮัม เหธา นิ่น หอบ เฮญี้ยว.

7เฒี้ยว แอ๋ง ก๊อง บั๋ว นิ่น, “เยีย เซ เฒี้ยว, ต้ง ต้อ เม่ย ธ้วด เคนเดีย เต่ย-ปูง เญย อูอา ฒี่ง เหว่ย เฒาะ น้าย นอม เต่ย-ปูง จิว ปุน เม่ย หฑิบ.”

8อับลาม แอ๋ง หน่าย, “เฒี้ยว ทิน-ฮู่ง อ้า! เยีย ฮนั้ง หาย นอ ไฮ่ ฮิ้ว ตุ๊ ตี่ง เยีย ตุ๊ หฑิบ น้าย นอม เต่ย-ปูง?”

9เฒี้ยว เตา, “อ๋อย หฒุ ต้อ เต้า ปัว หฮญัง เญย ยั่ง ง่ง เญ์ย, เหธา เต้า ปัว หฮญัง เญย ยู่ง เญ์ย, เหธา เต้า ปัว หฮญัง เญย ปะกี ยู่ง โก๊ว, เหธา นอม เหนาะ โฆ, เหธา นอม แปะ ก๊บ หลุน เญย ต้าย ปุน เยีย.”

10อับลาม ฯฒฯ เฒาะ น้าย เต๋ย แซง-คู้ ต้าย ปุน ทิน-ฮู่ง, เต้าๆ พิ โหฒว อี แหมง, เหยียด แหมง อัน เหยียด ปูง ต๋อย เหฒียง เญย. เหนาะ แอ๊ะ, ไม้ พิ.

11ต้ม จ๊าง-ง่ง เหฌี่ย ต้าย หฑบ เจี๊ยน วั้ว เต๋ย อ๊อ มป่า อับลาม แฮะ เปย๋า หมี่ อ๊ะ.

12โหฒว เกา, บะฮนอย อ๊า ลั่ม ม้วด วั้ว หฒั่น, อับลาม เปว๋ย มฌ่อม โด เญย. นิ่น เลี่ยม เฒ่ย ไฮ์ เฮญี้ยว ฮวาง, กั้ม เหฑีย ไห่.

13เฒี้ยว ก๊อง บั๋ว นิ่น, “เม่ย อ๋อย หฒุ ฮิ้ว ตุ๊ เม่ย เญย ฟุน-ฟะ ฒู้ง หฒุ ธ้วด มี่ง เยียม กั้น นอม กั๊วะ. วั้ว นอม กั๊วะ เญย เมี่ยน อ๋อย ห่อย นิ่น บัว โหฒว โน่ว, เหฒย นิ่น บัว เฝย แป๊ะ หฮญัง.

14มป่า เยีย อ๋อย ตี่ง ห่อย นิ่น บัว โหฒว โน่ว วั้ว นอม กั๊วะ เญย เมี่ยน เญย ฒุ์ย. ฒั้ว เม่ย เญย ฟุน-ฟะ ธ้วด วั้ว นอม กั๊วะ เญย เฒี่ยง โห่, นิ่น บัว ฒู้ง อ๋อย ต้อ ฒิ่น ฒ่อย ธั้ม เญย ธ้วด.

15เม่ย กั้น แอ๊ะ, อ๋อย เฒี่ยง ตุ๊ เสี่ยว ญ่วน ด๊าว, แป้ง ออน เญย เกวย เสย, หฒัง เจี๊ยน.

16เจี๋ย ลิ์ว เปยย ต่อย เมี่ยน, เม่ย เญย ฟุน-ฟะ หธีง ตุ๊ หฑวน น้าย เยียม, เหว่ย หฒุ อาโมไล เมี่ยน เญย ฒุ์ย ไม้ แก้ง ปวั๊ง โสว โหม่ว.”

17บะฮนอย ม้วด, ลู่ง หฮมวัง เหฑ่ง หมี่ อ๊ะ. ม่าย นอม โต์ว-โล่ว ธ้วด โต์ว-เสียว เหธา กว๋า โต์ว-ป๊า ธ้วด ต้าย กัน เจี๊ยน วั้ว เต๋ย อี ปูง อ๊อ บุด๋ง เจี๋ย.

18ต้ง วั้ว ฮนอย ทิน-ฮู่ง เหธา อับลาม เหลียบ แหง่ง หว่า. ทิน-ฮู่ง ก๊อง, “น้าย นอม เต่ย-ปูง เยีย แล์ง ปุน เม่ย เญย เฒ้ย-ฟุน. เยียม อียิบ ด้าย มี่ง เถา ยูเฟติด วั้ว ติ้ว ต้ม ด้าย เยีย จิว ปุน นิ่น บัว เหฑ่ง.

19เลี่ยม น้าย เต๋ย ธั้ม-ฝีง เมี่ยน เญย เต่ย-ปูง เยีย จิว ปุน นิ่น บัว เหฑ่ง, เซ เคไน เมี่ยน, เคนัด เมี่ยน, ขัดโมไน เมี่ยน,

20ฮิดไท เมี่ยน, เปลิดซี เมี่ยน, เลฟาอิม เมี่ยน,

21อาโมไล เมี่ยน, คานาอัน เมี่ยน, เกกาซี เมี่ยน, เหธา เยบุด เมี่ยน เญย เต่ย-ปูง.”

← Chapter 14 Jump to: Chapter 16 →