Genesis 31

Mien Bible (Thai Script) © Thailand Bible Society, 2007

1ยาโค้บ ไฮ์ ก๊อง ลาบาน เญย ตอน งบ. นิ่น บัว ก๊อง, “ยาโค้บ แฑง เหฑ่ง อา เตีย เญย จา-ตี้ง กะน้าย. นิ่น ปุ๊ด ฒ่อย ต้าย ม่าย เญย หญู่งๆ เซ เยียม บัว เญย เตีย ต้าย.”

2ยาโค้บ หย่า เฒียะ ตุ๊ ลาบาน เญย เอ๋ย เล์ย ไม้ ฮนั้ง ฒิ่น ด่าง วั้ว นอ, เผียว ธั้ม ไห่ อ๊ะ.

3เฒี้ยว ก๊อง บั๋ว ยาโค้บ, “หฑวน เม่ย เญย เธียน-เธะ เญย เต่ย-ปูง วั้ว โอ่. เยีย อ๋อย เหธา เม่ย เยียม.”

4ยาโค้บ ฯฒฯ ปุน หว่า มี่ง บั๋ว ลาเซน เหธา เลอา ต้าย นิ่น เญย ปะกี ยู่ง เยียม เญย เธี้ยง.

5ยาโค้บ ก๊อง บั๋ว นิ่น เญย เอ๊า บัว, “เยีย ปวัด เม่ย เญย เตีย เญย เอ๋ย เล์ย เหธา เยีย ไม้ ฮนั้ง ฒิ่น ด่าง. มป่า เยีย เญย เตีย เญย ทิน-ฮู่ง เหธา เยีย เยียม.

6เม่ย บัว หย่า ฮิ้ว ตุ๊ เยีย หล่ง เหฑ่ง ชะ เถง เม่ย บัว เญย เตีย โหฒว กง.

7มป่า เม่ย บัว เญย เตีย หธ่อ เผียน เยีย. นิ่น ทิ้ว เยีย เญย กง-ฒิ่น ตุ๊ เหฒียบ หฑุ่น อ๊ะ. มป่า ทิน-ฮู่ง ไม้ ปุน นิ่น โหฒว หาย หญู่ง ห่อย เยีย.

8สี ก๊อง นิ่น ก๊อง, ‘ยู่ง ม่าย เตี๊ยม เญย อ๋อย หฒุ ฝุน เม่ย เญย กง-ฒิ่น,’ เหยียด ฒู้ง ยู่ง เหฌี่ย ตอน ม่าย เตี๊ยม เญย ฮนั้ง. สี ก๊อง นิ่น ก๊อง, ‘ยู่ง เปน อ๋อย หฒุ ฝุน เม่ย เญย กง-ฒิ่น,’ เฒี่ยง กวั้น ยู่ง ฯฒฯ ขูง เหฌี่ย ตอน เปน เญย ฮนั้ง.

9ฮนั้ง หน่าย, ทิน-ฮู่ง เฒาะ เม่ย เญย เตีย เญย ป่วน แซง-คู้ ปุน เยีย เหฑ่ง หมี่ อ๊ะ.

10“ยู่ง แซง เญย เฒี่ยง โห่, เยีย เบ๋ย ปวัด ถิว ยู่ง เญ์ย เญย ยู่ง โก๊ว, ม่าย เต๋ย เปน เญย, ม่าย เต๋ย ม่าย เตี๊ยม โธว เญย, ม่าย เต๋ย ม่าย เตี๊ยม หม่วน เญย.

11เบ๋ย ปวัด เจี๊ยน เญย เฒี่ยง โห่, ทิน-ฮู่ง เญย ฟิน-เมี่ยน เห่ว เยีย, ‘ยาโค้บ อ่า.’ เยีย เตา, ‘โอ๋ย! เยีย เยียม น้าย โอ่.’

12นิ่น ก๊อง, ‘หมั่ง ก๋า ม่าะ! ถิว ยู่ง เญ์ย เญย เหยียด ฒู้ง ยู่ง โก๊ว ม่าย เต๋ย เปน เญย, ม่าย เต๋ย เตี๊ยม หม่วน เญย, ม่าย เต๋ย เตี๊ยม โธว เญย, เหว่ย หฒุ ลาบาน โหฒว ปุน เม่ย เญย เหยียด ฒู้ง เยีย ปวัด เหฑ่ง.

13เยีย เซ ทิน-ฮู่ง, ต้ง เยียม เบดเอน หิ่น ธ้วด ปุน เม่ย ปวัด วั้ว เต้า. เยียม เบดเอน เม่ย เหลียบ นอม หละเปย๊ย ตน เจี๊ยน โต๋ โย่ว ฝูง ปุน เยีย, หย่า เยียม วั้ว แล์ง เจี์ย แหง่ง หว่า. มี่ง อ๊ะ. อี้ หฒั่น ธ้วด น้าย นอม เต่ย-ปูง หฑวน เม่ย ธ้วด เสย เญย เต่ย-ปูง.’”

14ลาเซน เหธา เลอา เตา ยาโค้บ, “เยีย บัว เญย เตีย เญย จา-ตี้ง อี้ หฒั่น ฒู้ง ไม้ ม่าย เยีย บัว หฑิบ เญย ป่วน.

15นิ่น โหฒว ปุน เยีย บัว ฮนั้ง เป๋น กั้น ฝีง เมี่ยน นอ. นิ่น หย่า หม่าย เยีย บัว เญย มฆ้อง ต้าย หย่า นะ เหฑ่ง หมี่ อ๊ะ.

16ทิน-ฮู่ง ปุน เม่ย ตุ๊ เยีย บัว เญย เตีย เญย กะน้าย เซ เป๋น เยีย บัว เญย หย่า เป๋น เยีย บัว เญย ฝุเจว๊ย เญย. อี้ หฒั่น ทิน-ฮู่ง ฮนั้ง หาย นอ บั๋ว เม่ย, กุ๊น ฮนั้ง วั้ว นอ โหฒว.”

17ยาโค้บ ฯฒฯ เบ่น เหฒียง กะน้าย. นิ่น ปุน นิ่น เญย เอ๊า-เจว๊ย เก้ เจี๊ยน ล่อ ท่อ,

18หย่า หฒุ่น เจี๊ยน แซง-คู้ มี่ง ด่าง. แอ๋ง ต้อ เจี๊ยน นิ่น เยียม ปัดดานอาลัม หฒ่อน ตุ๊ ต้าย เญย เหยียด ฒู้ง กะน้าย ธ้วด เจ๊า หฑวน คานาอัน เต่ย-ปูง, นิ่น เญย เตีย, อีสัก, วั้ว.

19วั้ว หฒั่น ลาบาน ธ้วด มี่ง จั๊บ นิ่น เญย ปะกี ยู่ง เปยย. ลาเซน ปั่ง วั้ว นอม เฒี่ยง โห่ หนิ่ม นิ่น เญย เตีย เยียม เปย๊า หฒั่ง เญย หมิ่ว-ฝัง.

20ยาโค้บ หย่า ดั๊ว นิ่น เญย อง-ตา, อาลัม เมี่ยน, ลาบาน, เหว่ย หฒุ นิ่น ปี๋ง เจี๊ยน เปย๋า, ไม้ บั๋ว.

21นิ่น ต้อ เจี๊ยน นิ่น ม่าย เญย เหยียด ฒู้ง กะน้าย เปย๋า เจี๋ย หฒิ ยูเฟติด ด้าย, หูง เจี๊ยน กิเลอาด เญย บง-ไอ๊ ต๋อง มี่ง.

22ยาโค้บ เปย๋า มี่ง ตุ๊ ปัว ฮนอย, ลาบาน หธีง ฮิ้ว ตุ๊.

23นิ่น ฯฒฯ ต้อ เจี๊ยน นิ่น เญย ก๋อ-โย์ว มี่ง หฒุ่น. หฒุ่น เสี่ย ฮนอย ฯฒฯ หฒุ่น หฒ่าย เยียม กิเลอาด เญย บง-ไอ๊ ต๋อง.

24วั้ว ม์วน ลาบาน เบ๋ย ปวัด ทิน-ฮู่ง ต้าย ก๊อง บั๋ว นิ่น, “ไฝ ฟิม โอ่. ไม้ กุ๊น หลง ไฟ เธี้ยว, ไม้ ตู๋ง ก๊อง หาย หญู่ง ปุน ยาโค้บ.”

25ลาบาน หฒุ่น หฒ่าย ยาโค้บ วั้ว หฒั่น, ยาโค้บ ธอง เจี๊ยน ด๊บ-ลิ่ว เยียม กิเลอาด เญย บง-ไอ๊ ต๋อง. ลาบาน เหธา กัน นิ่น มี่ง เญย ก๋อ-โย์ว หย่า ธอง เจี๊ยน นิ่น บัว เญย ด๊บ-ลิ่ว วั้ว.

26ลาบาน ก๊อง บั๋ว ยาโค้บ, “เม่ย ฝู่ง ฮนั้ง น้าย โหฒว? เม่ย ดั๊ว เยีย แอ๋ง กว๊าย เจี๊ยน เยีย เญย เซียะ เปย๋า ฮนั้ง เบ๊าะ จ๋า ธ้าง ตุ๊ ต้าย เญย มเซียะ ตอน นอ.

27เม่ย ฝู่ง ฮนั้ง น้าย นอ ดั๊ว เยีย, ปี๋ง เจี๊ยน เปย๋า หย่า ไม้ บั๋ว เหยียด โจ๋ว เยีย? สี ก๊อง เยีย ฮิ้ว นอ, เยีย โหฒว เหน่า หญิด ปุน เมี่ยน ป๋าว ฑูง, เบ๊าะ ล่อ เบ๊าะ โฑ์, พัด ต้าน ป้า, ฝูง เม่ย บัว เฌียน-โย่ว เญย ธ้วด เจ๊า.

28เม่ย เลี่ยม ไม้ ปุน เยีย ตุ๊ ฒม เยีย เญย ฟุน เหธา เยีย เญย เซียะ. น้าย เม่ย โหฒว เญย เจ๊า หฒะเก้ง หฮงง ไห่.

29อี้ หฒั่น เม่ย เยียม เยีย เญย ปั์ว-เดี๊ย. เยีย อ๋อย โหฒว หาย หญู่ง ห่อย เม่ย เซ โหฒว ตุ๊ เญย. มป่า อะหฮมวัง เม่ย เญย เตีย เญย ทิน-ฮู่ง โป๋ เบ๋ย บั๋ว เยีย, ‘ไม้ กุ๊น หลง ไฟ เธี้ยว, ไม้ ตู๋ง ก๊อง หาย หญู่ง ปุน ยาโค้บ.’

30เยีย ฮิ้ว ตุ๊ เม่ย เญย เฮญี้ยว อ๋อย หฑวน เม่ย เญย เตีย เญย เปย๊า หธีง ต้าย เปย๋า. มป่า เม่ย เหว่ย หาย ติ่ว หนิ่ม เยีย เยียม เปย๊า หฒั่ง เญย หมิ่ว-ฝัง?”

31ยาโค้บ เตา ลาบาน, “เยีย กั้ม เหฑีย เม่ย อ๋อย เฒาะ เม่ย เญย เซียะ หฑวน.

32มป่า เม่ย เญย หมิ่ว-ฝัง แอ๊ะ, สี ก๊อง ล์อ ปวัด เยียม หาย เต้า, ไม้ ตู๋ง เลี่ยว นิ่น เญย แหม่ง อ๊ะ. ตอง เจี๊ยน เยีย บัว เญย หฒวัง ก๋อ-โย์ว โซว ธ้วด เม่ย เญย หาย หญู่ง กะน้าย, กุ๊น เฒาะ หฑวน อ๊ะ.” ยาโค้บ ไม้ ฮิ้ว ตุ๊ ลาเซน หนิ่ม นิ่น เญย เตีย เญย หมิ่ว-ฝัง.

33ลาบาน ฯฒฯ เปียะ ยาโค้บ เญย ด๊บ-ลิ่ว เหธา เลอา เญย ด๊บ-ลิ่ว เหธา วั้ว เต๋ย อี เต้า โน่ว เป์ย เญย ด๊บ-ลิ่ว โซว มป่า โซว ไม้ ธ้วด นิ่น เญย หมิ่ว-ฝัง. นิ่น เยียม เลอา เญย ด๊บ-ลิ่ว ธ้วด ต้าย แอ๋ง เปียะ ลาเซน เญย ด๊บ-ลิ่ว.

34ลาเซน เฒาะ วั้ว เต๋ย เยียม เปย๊า หฒั่ง เญย หมิ่ว-ฝัง ตั๊บ เจี๊ยน ล่อ ท่อ เญย ต๋อ. นิ่น กั้น แอ๊ะ, เฒว์ย เจี๊ยน กู้ หงว่าย. ลาบาน โซว เหฑ่ง ลาเซน เญย ด๊บ-ลิ่ว มป่า ล์อ ไม้ ปวัด.

35ลาเซน ก๊อง บั๋ว นิ่น เญย เตีย, “อา เตีย อ่า, เม่ย ไม้ ตู๋ง โน์ว เยีย โอ่. เยีย หอบ หฒุ เจี์ย ซิน ฒิบ เตีย, มป่า เยีย เญย ซิน-เหยี่ยน เถา, เยีย เจี์ย ไม้ ตุ๊ ซิน.” ลาบาน โซว เหฑ่ง กะน้าย หย่า ล์อ ไม้ ปวัด นิ่น เยียม เปย๊า หฒั่ง เญย หมิ่ว-ฝัง.

36ยาโค้บ เฉีย เจี์ย ไห่ ฯฒฯ ก๊อง ลาบาน, “เยีย โหฒว หาย หญู่ง ต่อง เม่ย, หฒิ ฒุ์ย เม่ย, เม่ย หธีง ชะ หฒุ่น เจี๊ยน เยีย ต้าย?

37เม่ย โซว เหฑ่ง เยีย เญย กะน้าย เม่ย ปวัด หาย หญู่ง เฒ์ย เม่ย เญย กะน้าย? เฒาะ ธ้วด ต้าย อัน เจี๊ยน น้าย ม่าะ! ปุน เม่ย เญย เมี่ยน เหธา เยีย เญย เมี่ยน ล่ม ฑ่อย หมั่ง. นิ่น บัว ฯฒฯ ฮิ้ว ตุ๊ เยีย เหธา เม่ย, หาย เต้า โหฒว หอบ.

38“เยีย เหธา เม่ย เยียม ตุ๊ หญี่ เหฒียบ หฮญัง อ๊ะ. เม่ย เญย ปะกี ยู่ง เหธา ยู่ง ไม้ บาง เจี๋ย ตอน. เหยียด เต้า เม่ย เญย ปะกี ยู่ง โก๊ว ไฟ ยู่ง โก๊ว เยีย ไม้ หญั่น เจี๋ย.

39สี ก๊อง เฮยี่ย กะน้าย หงาด, เยีย ไม้ ต้อ มี่ง ปุน เม่ย หมั่ง. เยีย กั้น แล์ง ด๊อด ฮนั้ง. จั๋น-หฒะ หนิ่ม หาย หญู่ง, ไม้ กุ๊น ลู่ง ฮนอย หฒั่น ไฟ ลู่ง ม์วน หฒั่น, เม่ย ฒู้ง เห่ว เยีย กั้น ทิบ.

40ลู่ง ฮนอย หฒั่น เยีย เตี๊ย หญุด พุย, เตี๊ย ยัวะ. ลู่ง ม์วน หฒั่น หย่า เตี๊ย จวั๊ง, กวั่ง มฌ่อม จ๋า.

41เยีย ฮนั้ง น้าย นอ เหธา เม่ย เยียม ปวั๊ง หญี่ เหฒียบ หฮญัง. เยีย โหฒว กง เหฒียบ เฝย หฮญัง เปี๊ยด เม่ย เญย อี เต้า เซียะ หล่ง. แอ๋ง โหฒว จุ๊ หฮญัง เปี๊ยด เม่ย เญย แซง-คู้. เม่ย หธ่อ ทิ้ว เยีย เญย กง-ฒิ่น ตุ๊ เหฒียบ หฑุ่น หมี่ อ๊ะ.

42สี ก๊อง ไม้ เฒ์ย เยีย เญย เตีย เญย ทิน-ฮู่ง, อับลาฮัม เญย ทิน-ฮู่ง, ต้ง อีสัก หฒั่ง เญย ทิน-ฮู่ง, เหธา เยีย เยียม นอ, เม่ย ฒู้ง ปุน เยีย ขูง-ปั์ว แปะ เหฒา เญย ธ้วด ฮนั้ง. มป่า ทิน-ฮู่ง ปวัด เยีย เญย โค้ว-ฒี่ง เหธา เยีย เญย ปั์ว โหฒว เญย กง. อะหฮมวัง นิ่น ฯฒฯ ป๊า เจี๊ยน เม่ย.”

43ลาบาน เตา ยาโค้บ, “น้าย เต๋ย เซียะ เซ เยีย เญย เซียะ. น้าย เต๋ย ฝุเจว๊ย หย่า เยีย เญย. น้าย เต๋ย ยู่ง กวั้น เหธา ปะกี ยู่ง กวั้น หย่า เยีย เญย. เม่ย ปวัด เจี๊ยน เญย เหยียด ฒู้ง เซ เยีย เญย. อี้ ฮนอย เยีย ไฮ่ โหฒว หาย หญู่ง เถง เยีย เญย เซียะ เหธา นิ่น บัว เญย ฝุเจว๊ย?

44ต้าย ม่าะ! เม่ย เหธา เยีย อ๋อย หฒุ เหลียบ เจี์ย แหง่ง หว่า เหว่ย เถง บัว อี เต้า โหฒว ฒอง-เหฒง.”

45ยาโค้บ ฯฒฯ เฒาะ นอม หละเปย๊ย เหลียบ เจี์ย ต้าย ตน เจี๊ยน โหฒว จั๋ง-โห่,

46แอ๋ง บั๋ว นิ่น เญย เมี่ยน, “เฑ์า หละเปย๊ย ต้าย ม่าะ!” นิ่น บัว ฯฒฯ เฑ์า หละเปย๊ย ต้าย ดุย เจี๊ยน อ๊ะ. ดุย ลิ์ว, นิ่น บัว ฯฒฯ ล่ม ฑ่อย เยียม วั้ว หละเปย๊ย-ดุย เญย กะเฮลน หญั่น หฮนาง.

47ลาบาน ธ้วด วั้ว นอม ต๋อง เญย บั๋ว เห่ว เยกาสาหาดูทา, มป่า ยาโค้บ ธ้วด บั๋ว เห่ว กาเลเอด.

48ลาบาน ก๊อง, “อี้ ฮนอย น้าย ดุย หละเปย๊ย โหฒว บัว อี เต้า เญย ฒอง-เหฒง.” เหว่ย น้าย วั้ว นอม ต๋อง เห่ว กาเลเอด.

49แอ๋ง ตุ๊ บั๋ว เห่ว มิดปา, เหว่ย หฒุ ลาบาน ก๊อง, “บัว เล่ย ฆอย ต่อย มป่า โท้ เฒี้ยว เยียม เม่ย เหธา เยีย บัว บุด๋ง ฒั้ว เจี๊ยน.

50สี ก๊อง เม่ย โหฒว โตะ เยีย เญย เซียะ, ไฟ ธ้วด ลิ์ว เยีย เญย เซียะ เม่ย แอ๋ง กั้น หล่ง เต้า เอ๊า, ไม้ กุ๊น เยีย ไม้ ฮิ้ว, จั๋ง เจี๊ยน โอ่, ม่าย ทิน-ฮู่ง เถง เม่ย เหธา เยีย โหฒว ฒอง-เหฒง.”

51ลาบาน แอ๋ง ก๊อง บั๋ว ยาโค้บ, “หมั่ง ก๋า, น้าย เซ เยีย ดุย เญย หละเปย๊ย เหธา ตน เจี๊ยน เญย หละเปย๊ย-ต่ง เยียม เม่ย เหธา เยีย บุด๋ง.

52น้าย ดุย หละเปย๊ย เหธา น้าย นอม หละเปย๊ย-ต่ง โหฒว ฒอง-เหฒง เถง บัว จั๋ง หฒุ, เยีย ไม้ เจี๋ย เม่ย วั้ว ปูง โหฒว หาย หญู่ง ห่อย เม่ย. เม่ย หย่า ไม้ เจี๋ย น้าย ปูง โหฒว หาย หญู่ง ห่อย เยีย.

53โท้ อับลาฮัม เญย ทิน-ฮู่ง เหธา นาโฮ เญย ทิน-ฮู่ง, ต้ง นิ่น บัว เญย เตีย เญย ทิน-ฮู่ง, เถง บัว ตุ๋น สี่.” ยาโค้บ ฯฒฯ เฒี้ยง เจี๊ยน ต้ง นิ่น เญย เตีย, อีสัก, หฒั่ง เญย ทิน-ฮู่ง เญย บั๋ว แล์ง เจี์ย แหง่ง หว่า.

54นิ่น หย่า เยียม วั้ว นอม บง-ไอ๊ หล่ง แซง-คู้ เหฒี่ย ปุน ทิน-ฮู่ง หย่า เห่ว นิ่น เญย ก๋อ-โย์ว ต้าย ล่ม ฑ่อย หญั่น หฮนาง. หญั่น ลิ์ว, นิ่น บัว เฒี่ยง ม์วน เยียม วั้ว นอม บง.

55ตะเหญ่ย ดอม เฑี้ยว เญย, ลาบาน ฒม นิ่น เญย เซียะ เหธา นิ่น เญย ฟุน หย่า ปวัง หว่า นิ่น บัว, ฯฒฯ ธ้วด เจ๊า หฑวน เปย๊า อ๊ะ.

← Chapter 30 Jump to: Chapter 32 →