Genesis 22

Mien Bible (Thai Script) © Thailand Bible Society, 2007

← Chapter 21 Jump to: Chapter 23 →

1น้าย เต๋ย สี่ เจี๋ย ลิ์ว, ฆะฮ้า ทิน-ฮู่ง เสย อับลาฮัม. ทิน-ฮู่ง ก๊อง บั๋ว นิ่น, “อับลาฮัม อ่า.” อับลาฮัม เตา, “โอ๋ย! เยีย เยียม น้าย โอ่.”

2ทิน-ฮู่ง ก๊อง, “เม่ย อ๋อย หฒุ ต้อ เม่ย เญย ตอน, เซ เม่ย เญย โดะ ตอน, อีสัก, ต้ง เม่ย ฮนั้ม วั้ว เต้า, มี่ง โมลิยา เต่ย. เถา วั้ว เยีย ฯฒฯ บั๋ว เม่ย อ๋อย หฒุ ฝาว หาย นอม บง หล่ง เม่ย เญย ตอน โหฒว ปั๊ว เหฒี่ย เญย กะน้าย.”

3ตะเหญ่ย ดอม เฑี้ยว เญย, อับลาฮัม เจี์ย ซิน ต้าย ปุ่ย เจี๊ยน นิ่น เญย ล่อ, ต้อ อี เต้า นิ่น เญย โปว เหธา นิ่น เญย ตอน, อีสัก, มี่ง. นิ่น แก๊ะ ฒ่าง เก๋า นิ่น อ๋อย ปั๊ว เหฒี่ย เญย กะน้าย ฯฒฯ ธ้วด เจ๊า มี่ง ทิน-ฮู่ง บั๋ว นิ่น มี่ง วั้ว นอม ต๋อง.

4เถา ตะฟาม ฮนอย อับลาฮัม เธา เฮมียน หมั่ง ปวัด วั้ว นอม ต๋อง มป่า หธ่อ โก เญย.

5อับลาฮัม ก๊อง บั๋ว นิ่น เญย โปว, “เม่ย บัว เหธา ล่อ เยียม น้าย ฒั้ว โอ่. เยีย บัว อี ตอน-เตี๋ย อ๋อย มี่ง วั้ว หฒั่ง เฒี้ยว, ฆะฮ้า เยีย บัว แอ๋ง หฑวน เม่ย บัว น้าย.”

6อับลาฮัม เฒาะ หล่ง ปั๊ว เหฒี่ย เญย ฒ่าง ปุน นิ่น เญย ตอน, อีสัก, เหญีย เจี๊ยน. นิ่น กั้น ต้อ โต์ว เหธา หฑุ. นิ่น บัว อี ตอน-เตี๋ย มี่ง อ๊ะ.

7อีสัก เหธา นิ่น เญย เตีย, อับลาฮัม, ก๊อง, “อา เตีย อ้า!” อับลาฮัม เตา, “อา ตอน อ่า, โหฒว หาย หญู่ง?” อีสัก ก๊อง, “ม่าย โต์ว, ม่าย ฒ่าง เญย, มป่า หล่ง ปั๊ว เหฒี่ย เญย ปะกี ยู่ง ตอน เยียม หาย?”

8อับลาฮัม เตา, “อา ตอน อ่า, ทิน-ฮู่ง กั้น อ๋อย หลิ่ว เล์ย เหฒียง ปั๊ว เหฒี่ย เญย ปะกี ยู่ง ตอน.” อี ตอน-เตี๋ย แอ๋ง ยั่ง เจี๊ยน มี่ง.

9มี่ง เถา ทิน-ฮู่ง บั๋ว นิ่น วั้ว นอม ต๋อง, อับลาฮัม เหธย นอม เหฒี่ย-ต้อง ต้าย, เฒาะ ฒ่าง เฒว่ย เยี้ยด เฒว่ย เหญ่ย ไบ้ เจี๊ยน เหฒี่ย-ต้อง กู้ หงว่าย. นิ่น หย่า เฒาะ นิ่น เญย ตอน, อีสัก, โด้ เจี๊ยน อัน เจี๊ยน เหฒี่ย-ต้อง, ฒ่าง ดุย กู้ หงว่าย.

10นิ่น ฯฒฯ ฮญา ปั์ว เฒาะ หฑุ เหว่ย ไต๋ นิ่น เญย ตอน.

11มป่า เฒี้ยว เญย ฟิน-เมี่ยน เยียม กู้ หงว่าย ลู่ง ค้าด อับลาฮัม ก๊อง, “อับลาฮัม อ้า! อับลาฮัม!” อับลาฮัม เตา, “โอ๋ย! เยีย เยียม น้าย โอ่.”

12ฟิน-เมี่ยน ก๊อง, “ไม้ ตู๋ง ห่อย น้าย เต้า ตอน. ไม้ ตู๋ง โหฒว หาย หญู่ง ปุน นิ่น. อี้ หฒั่น เยีย ฮิ้ว ตุ๊ เม่ย กั้ม เหฑีย หย่า ท่าย ทิน-ฮู่ง เหว่ย หฒุ เม่ย ไม้ แฑง เม่ย เญย ตอน, หญุ่น เฒาะ เม่ย เญย โดะ ตอน ฝูง ปุน เยีย.”

13อับลาฮัม เธา เฮมียน ฮวิน หฑวน หมั่ง ฆะฮ้า ฆาง, ปวัด ม่าย เต้า ปะกี ยู่ง โก๊ว, จอง ขวัง เจี๊ยน หล่ม-เบยาะ. นิ่น ฯฒฯ มี่ง เฒาะ ต้าย โหฒว ปั๊ว เหฒี่ย เญย กะน้าย ตี๊ นิ่น เญย ตอน.

14วั้ว นอม ต๋อง อับลาฮัม เถง ธ้วด บั๋ว เห่ว “ เฒี้ยว กั้น อ๋อย หลิ่ว เล์ย เหฒียง.” อี้ จ๋า ฮนอย เมี่ยน หธ่อ ก๊อง, “เยียม เฒี้ยว เญย บง, เฒี้ยว กั้น หลิ่ว เล์ย เหฒียง ปุน.”

15เฒี้ยว เญย ฟิน-เมี่ยน เยียม กู้ หงว่าย ลู่ง แอ๋ง เห่ว ตะเหญ่ย หฑุ่น ก๊อง บั๋ว อับลาฮัม,

16“ เฒี้ยว ก๊อง, ‘เยีย เฒี้ยง เจี๊ยน เยีย กั้น แล์ง หว่า เหว่ย หฒุ เม่ย ฮนั้ง น้าย โหฒว. เม่ย ไม้ แฑง เม่ย เญย ตอน, เซ เม่ย เญย โดะ ตอน.

17เยีย ด่ง หาย ฒู้ง อ๋อย เหธย ฟุ ปุน เม่ย. เยีย อ๋อย ปุน เม่ย เญย เฒ้ย-ฟุน หฮยาง เจี๊ยน ฝาว ด่ง ลู่ง เญย เหฮลย ธั้ม หย่า ด่ง ค้อย-เฮลน เญย ซา-เฒียว ธั้ม. เม่ย เญย เฒ้ย-ฟุน หย่า อ๋อย ตุ๊ นิ่น บัว เญย วิน-วั้ง เญย ฒี่ง โหฒว นิ่น บัว หฑิบ เญย ป่วน.

18ลู่ง เดี๊ย หม่าน กั๊วะ เมี่ยน เหว่ย เม่ย เญย เฒ้ย-ฟุน อ๋อย ตุ๊ ฟุ, เหว่ย หฒุ เม่ย หมวัง เยีย เญย หว่า.’”

19อับลาฮัม แอ๋ง ต๋าว ซิน หฑวน เถา นิ่น เญย โปว วั้ว. นิ่น บัว ล่ม ฑ่อย หฑวน เบเอเชบา. อับลาฮัม แอ๋ง เยียม วั้ว เบเอเชบา.

20น้าย เต๋ย สี่ เจี๋ย ลิ์ว, ฆะฮ้า ม่าย เมี่ยน ต้าย บั๋ว อับลาฮัม, “มินคา หย่า ยู์ง ตุ๊ ฝุเจว๊ย ปุน เม่ย เญย โย์ว, นาโฮ, หมี่ อ๊ะ.

21ตอน-โฮล เห่ว อูด. นิ่น เญย โย์ว เห่ว บุด, เคมูเอน (เซ อาลัม เญย เตีย,)

22เคเสด, ฮาโซ, ปินดาด, ยิดล้าบ, เหธา เบทูเอน.”

23เบทูเอน โหฒว เลเบคา เญย เตีย. มินคา ยู์ง ตุ๊ น้าย เต๋ย เหฮยียด เต้า ตอน ปุน อับลาฮัม เญย โย์ว, นาโฮ.

24แอ๋ง ม่าย นาโฮ เญย เอ๊า-ตอน, เลอูมา, ยู์ง ตุ๊ เทบา, กาฮัม, ทาหาด เหธา มาอาคา.

← Chapter 21 Jump to: Chapter 23 →