Genesis 39

Mien Bible (Thai Script) © Thailand Bible Society, 2007

← Chapter 38 Jump to: Chapter 40 →

1อิสะมาเอน เมี่ยน ต้อ โยเซ้บ มี่ง อียิบ เต่ย-ปูง หม่าย ปุน เต้า อียิบ เมี่ยน, เซ ฟาโล ฮู่ง เญย ต้ม เจียน, ต้ง โก๋ว ฮู่ง ติ่น เญย ต้ม แปง-เปย๊ย, โปทิฟา.

2นิ่น เยียม นิ่น เญย อียิบ เมี่ยน เปย๊า-เฒี้ยว เญย เปย๊า. เฒี้ยว เหธา โยเซ้บ เยียม, ปุน นิ่น ตุ๊ หลง.

3วั้ว เต้า เปย๊า-เฒี้ยว ปวัด เฒี้ยว เหธา โยเซ้บ เยียม. เฒี้ยว หย่า ปุน โยเซ้บ เยียม นิ่น โหฒว เญย หญู่งๆ ตุ๊ หลง.

4โยเซ้บ โหฒว ตุ๊ หอบ โปทิฟา เญย เฮญี้ยว หย่า ตุ๊ โหฒว นิ่น เญย เหล่ง เจ๊ย โปว. โปทิฟา ฯฒฯ ปุน นิ่น โก๋ว เปย๊า ฒง เหธา จา-ตี้ง เหยียด ฒู้ง กะน้าย.

5เยียม โปทิฟา พ้าย โยเซ้บ โก๋ว เจี๊ยน นิ่น เญย เปย๊า ฒง เหยียด ฒู้ง จา-ตี้ง, เฒี้ยว เหว่ย โยเซ้บ เหธย ฟุ ปุน วั้ว เต้า อียิบ เมี่ยน เญย จา-ตี้ง. ตะฟ่าน เยียม เปย๊า เยียม เด่ย เญย เหยียด ฒู้ง ฯฒฯ ธั้ม เจี๊ยน ฝาว.

6โปทิฟา เญย เหยียด นอม จา-ตี้ง หญู่งๆ กะน้าย นิ่น จิว ปุน โยเซ้บ โก๋ว เหฑ่ง. ธ้วด ลิ์ว นิ่น กั้น เญย หญั่น ฮบ, นิ่น ไม้ หฒุ เฑ่า หาย หญู่ง. โยเซ้บ เญย ซิน-เพย เฒี่ยง ตุ๊ หลง, เฮมียน-เหมว่ย หย่า เหฑว่ย.

7เยียม เกา, นิ่น เญย เฒี้ยว เญย เอ๊า หมั่ง โยเซ้บ ไฮ์ หั่น ไห่, ฯฒฯ หยัวะ นิ่น ก๊อง, “เม่ย ต้าย เหธา เยีย เปว๋ย โอ่.”

8มป่า โยเซ้บ ไม้ หมวัง. นิ่น ก๊อง บั๋ว นิ่น เญย เฒี้ยว เญย เอ๊า, “เยีย เญย เฒี้ยว ไม้ หฒุ เฑ่า เยียม เปย๊า กะญั์ว เญย หาย หญู่ง. เหยียด ฒู้ง จา-ตี้ง นิ่น จิว ปุน เยีย โก๋ว.

9เยียม น้าย เปย๊า เยีย ม่าย หัด ม์า ด่ง นิ่น โฮล. เยีย เญย เฒี้ยว ไม้ แฑง หาย หญู่ง ธ้วด ลิ์ว เม่ย เหว่ย หฒุ เม่ย โหฒว นิ่น เญย เอ๊า. เยีย ฝู่ง ไฮ่ โหฒว หว่าย สี่ ด่ง หน่าย โฮล, ป์าม ฒุ์ย ต่อง ทิน-ฮู่ง?”

10ไม้ กุ๊น วั้ว เต้า เอ๊า ฮนอยๆ หยัวะ โยเซ้บ, โยเซ้บ ไม้ คั้ง เหธา นิ่น เปว๋ย, เลี่ยม ไม้ เหธา นิ่น เยียม เหยียด นอม ต๋อง.

11ม่าย ฮนอย นอ, โยเซ้บ เปียะ เปย๊า โหฒว นิ่น หอบ หฒุ โหฒว เญย กง, หย่า ไม้ ม่าย เหยียด เต้า เปย๊า เญย โปว เยียม วั้ว.

12โปทิฟา เญย เอ๊า เญา เจี๊ยน โยเซ้บ เญย ลุย ก๊อง, “ต้าย เหธา เยีย เปว๋ย ม่าะ!” มป่า โยเซ้บ กวั่ง เจี๊ยน นิ่น เญย ลุย เยียม วั้ว เต้า เอ๊า เญย ปั์ว, เปย๋า ธ้วด กะเหญี่ย หฒิ เปย๊า มี่ง.

13วั้ว เต้า เอ๊า ปวัด โยเซ้บ กวั่ง เจี๊ยน นิ่น เญย ลุย เปย๋า ธ้วด กะเหญี่ย,

14นิ่น ฯฒฯ เหน่าๆ เญย เห่ว เยียม นิ่น เญย เปย๊า วั้ว เต๋ย มจั่ง โปว ต้าย. นิ่น ก๊อง, “หมั่ง ก๋า หน่าย! เยีย เญย โหฆ ต้อ น้าย เต้า ฮิบลู เมี่ยน ต้าย. อี้ หฒั่น นิ่น หมั่ง เผีย เยีย บัว. นิ่น เปียะ ต้าย อ๋อย เยีย เหธา นิ่น เปว๋ย, มป่า เยีย ชะ เหน่า.

15นิ่น ไฮ์ เยีย เห่ว, นิ่น ฯฒฯ กวั่ง เจี๊ยน นิ่น เญย ลุย เยียม เยีย น้าย แอ๋ง เปย๋า ธ้วด เปย๊า หมี่ อ๊ะ.”

16วั้ว เต้า เอ๊า เฒาะ โยเซ้บ เญย ลุย อัน เจี๊ยน นิ่น เญย กะเฮลน ฒั้ว โยเซ้บ เญย เฒี้ยว หฑวน ต้าย.

17นิ่น ฯฒฯ ฮนั้ง น้าย นอ ก๊อง, “ต้ง เม่ย ต้อ ต้าย บัว น้าย วั้ว เต้า ฮิบลู โน่ว เก๊า เปียะ ต้าย หมั่ง เยีย ไม้ เจี์ย, อ๋อย เหธา เยีย.

18เยีย ชะ เห่ว, นิ่น ฯฒฯ กวั่ง นิ่น เญย ลุย เยียม เยีย น้าย เปย๋า ธ้วด แก้ง ขะเดา หมี่ อ๊ะ.”

19โยเซ้บ เญย เฒี้ยว ไฮ์ นิ่น เญย เอ๊า ก๊อง, “เม่ย เญย โน่ว ฮนั้ง น้าย นอ โหฒว ปุน เยีย,” นิ่น ฯฒฯ เฉีย เจี์ย! ไห่,

20เฒาะ โยเซ้บ หววน เจี๊ยน โล่, ต้ง หววน ฮู่ง เตี๋ย เญย ฒุ์ย-เมี่ยน วั้ว นอม โล่. โยเซ้บ หฒุ หววน เจี๊ยน วั้ว

21มป่า ทิน-ฮู่ง เหธา นิ่น เยียม, หย่า โหฒว หลง ปุน นิ่น, ปุน นิ่น โหฒว ตุ๊ หอบ โก๋ว โล่ วั้ว เต้า เจียน เญย เฮญี้ยว.

22โก๋ว โล่ เจียน ฯฒฯ ปุน โยเซ้บ โก๋ว เหยียด ฒู้ง เยียม โล่ เญย ฒุ์ย-เมี่ยน. ตะฟ่าน เยียม โล่ กะญั์ว เญย สี่, โยเซ้บ กั้น กุ๊น เหฑ่ง.

23โยเซ้บ โก๋ว เจี๊ยน เญย เหยียด ฒู้ง สี่, โก๋ว โล่ เจียน ไม้ หฒุ เฑ่า เหว่ย หฒุ เฒี้ยว เหธา โยเซ้บ เยียม. นิ่น โหฒว เญย หญู่งๆ เฒี้ยว เถง นิ่น โหฒว ตุ๊ หลง.

← Chapter 38 Jump to: Chapter 40 →