Genesis 35

Mien Bible (Thai Script) © Thailand Bible Society, 2007

← Chapter 34 Jump to: Chapter 36 →

1ทิน-ฮู่ง ก๊อง บั๋ว ยาโค้บ, “อี้ หฒั่น เม่ย อ๋อย หฒุ ซุ้ย มี่ง เยียม เบดเอน. เยียม วั้ว อ๋อย หฒุ เหธย นอม เหฒี่ย-ต้อง เหว่ย เยีย, ต้ง ฒิ่น ด่าง เม่ย เปย๋า เม่ย เญย ก๋อ, เอซาว, วั้ว หฒั่น หิ่น ธ้วด ต้าย ปุน เม่ย ปวัด เญย ทิน-ฮู่ง.”

2ยาโค้บ ฯฒฯ บั๋ว นิ่น เญย ฮมวั้ง ต่อย แอ๋ง เหธา นิ่น เยียม วั้ว เต๋ย เมี่ยน, “เม่ย บัว ม่าย กั้น ฝีง เญย หาย หญู่ง หมิ่ว-ฝัง อ๋อย หฒุ กวั่ง เถา เหฑ่ง. อ๋อย หฒุ สา เหฑ่ง หวุย, เหยี่ยน ลุย-โหว.

3บัว อ๋อย หฒุ เล่ย ฆอย น้าย นอม ต๋อง มี่ง เยียม เบดเอน. เถา วั้ว เยีย อ๋อย เหธย นอม เหฒี่ย-ต้อง เหว่ย ทิน-ฮู่ง, ต้ง ฒิ่น ด่าง เยีย ปวั้ง หฒุ โค้ว หน่าน นิ่น เถง เยีย, เยีย มี่ง เถา หาย นิ่น หย่า เหธา เยีย มี่ง, วั้ว เต้า ทิน-ฮู่ง.”

4นิ่น บัว เหยียด ฒู้ง ฯฒฯ เฒาะ นิ่น บัว ม่าย เญย กั้น ฝีง เมี่ยน เญย หมิ่ว-ฝัง เหธา ตั้ง เจี๊ยน เญย มน่อม ฮยุน, จิว ปุน ยาโค้บ. ยาโค้บ ฯฒฯ ปย๊บ เจี๊ยน ต้ม บะอง เฒวย เดี๋ยง-กอน เดี๊ย, เล่ย เซเคม ฒี่ง ไม้ หนั่ง โก.

5ยาโค้บ เหธา กัน นิ่น เญย หฒวัง เมี่ยน ธ้วด เจ๊า มี่ง วั้ว หฒั่น, ทิน-ฮู่ง ปุน ฮวีง หฑวน วั้ว เต๋ย ฒี่ง เญย เมี่ยน กั้ม เหฑีย ไห่, ฯฒฯ ไม้ หฒุ่น ยาโค้บ เญย ตอน บัว.

6ยาโค้บ เหธา เหยียด ฒู้ง กัน นิ่น เญย เมี่ยน มี่ง เถา คานาอัน เต่ย-ปูง, ลู้ด ฒี่ง, (เซ เบดเอน ฒี่ง.)

7เถา วั้ว นิ่น เหธย นอม เหฒี่ย-ต้อง ต้าย แอ๋ง ธ้วด วั้ว นอม ต๋อง เญย บั๋ว เห่ว เอนเบดเอน, เหว่ย หฒุ เปย๋า นิ่น เญย ก๋อ, เอซาว, วั้ว หฒั่น, ทิน-ฮู่ง เยียม วั้ว หิ่น ธ้วด ปุน นิ่น ปวัด.

8ต้ง ฒิ่น ด่าง ต้อ เลเบคา โฮล ต้าย วั้ว เต้า โปว, เดโบลา, เกวย เสย หมี่ อ๊ะ. นิ่น บัว ฯฒฯ หฒัง เจี๊ยน เยียม เบดเอน เญย น่าม ปูง, เหยียด ติ้ว ต้ม บะอง เฒวย เดี๋ยง-กอน เฮลน. วั้ว ติ้ว เดี๋ยง นิ่น บัว ธ้วด นอม บั๋ว เห่ว อันโลนบาคุด.

9ยาโค้บ เยียม ปัดดานอาลัม เต่ย หฑวน ต้าย, ทิน-ฮู่ง แอ๋ง หิ่น ธ้วด หฑุ่น, ปวัง หว่า ปุน นิ่น.

10ทิน-ฮู่ง บั๋ว นิ่น, “เม่ย เญย บั๋ว เห่ว ยาโค้บ มป่า ยั่ง น้าย เจี๋ย เม่ย เญย บั๋ว อ๋อย หฒุ ก๊อย เห่ว อิสะลาเอน.” ฮนั้ง น้าย นิ่น ฯฒฯ ตุ๊ บั๋ว เห่ว อิสะลาเอน.

11ทิน-ฮู่ง แอ๋ง ก๊อง, “เยีย เซ เน่น เจี๋ย เญย ทิน-ฮู่ง. เม่ย อ๋อย หฒุ ม่าย ฝุเจว๊ย ธั้ม. เม่ย เญย เฒ้ย-ฟุน อ๋อย หฮยาง ต้าย เป๋น เหยียด ฝีง เหธา ธั้ม-กั๊วะ เญย ฝีง. ม่าย เต๋ย เม่ย เญย เฒ้ย-ฟุน หย่า อ๋อย ตุ๊ โหฒว ฮู่ง.

12เยีย จิว ปุน อับลาฮัม เหธา อีสัก เญย เต่ย-ปูง, เยีย หย่า จิว ปุน เม่ย เหธา เม่ย เญย โฮ์ ต่อย เฒ้ย-ฟุน.”

13ก๊อง ลิ์ว, ทิน-ฮู่ง ฯฒฯ เยียม วั้ว นอม ต๋อง ฝาว มี่ง หมี่ อ๊ะ.

14ยาโค้บ เฒาะ นอม หละเปย๊ย ตน เจี๊ยน ทิน-ฮู่ง เหธา นิ่น ก๊อง หว่า เญย ต๋อง, หย่า เฒาะ อะหงุ่น ติ๊ว เธี้ย ต่ง กู้ หงว่าย, หย่า เฒาะ กะลั้น โย่ว โต๋ เจี๊ยน.

15นิ่น แอ๋ง ธ้วด วั้ว นอม ต๋อง เญย บั๋ว เห่ว เบดเอน.

16ยาโค้บ บัว เยียม เบดเอน ธ้วด เจ๊า มี่ง. หธ่อ เล่ย เอฟาลาทา มู้ง โก เต๋ย เญย, ลาเซน เถา เฒี่ยง โห่ ดุ๊ด ซิน. นิ่น มุน โค้ว, อะ ตุ๊ ยู์ง ไห่.

17มุน โค้ว เจี๋ย เญย เฒี่ยง โห่, โก๋ว นิ่น วั้ว เต้า มเซียะ ตอน ก๊อง, “เม่ย ไม้ ตู๋ง กั้ม เหฑีย โอ่. น้าย เต้า กู้งว์า เซ ตอน.”

18ลาเซน อ๊า ลั่ม ไต่ วั้ว หฒั่น, นิ่น แอ๋ง เท้า ธ้วด หฑุ่น เฉีย, เถง นิ่น เญย ตอน ธ้วด บั๋ว เห่ว เบนโอนี. มป่า ยาโค้บ ธ้วด บั๋ว เห่ว เบนยามิน.

19ลาเซน ไต่ หมี่ อ๊ะ, หฒัง เจี๊ยน มี่ง เอฟาลาทา เญย เจ๊า-เฮลน. (เอฟาลาทา แอ๋ง ม่าย นอม บั๋ว เห่ว เบดเลเฮม.)

20ยาโค้บ เฒาะ นอม หละเปย๊ย ตน เจี๊ยน ลาเซน เญย โฒ้ว โหฒว จั๋ง-โห่. วั้ว นอม หละเปย๊ย เยียม เถา อี้ จ๋า ฮนอย.

21อิสะลาเอน บัว แอ๋ง ซุ้ย มี่ง ธอง ด๊บ-ลิ่ว เยียม เอเด ฟั่น ท้าบ เญย วั้ว ด่าง แหมง.

22เยียม เกา วั้ว นอม เต่ย-ปูง, อิสะลาเอน เญย ตอน, ลูเบน, เหธา นิ่น เญย มา-ไฝ, บินฮา, ม่าย เจ๊า. นิ่น เญย เตีย ฮิ้ว หมี่ อ๊ะ. ยาโค้บ ม่าย เหฒียบ เหญ่ย เต้า ตอน.

23เลอา เญย ตอน ม่าย ลูเบน. ลูเบน เซ ยาโค้บ เญย ตอน-โฮล. แอ๋ง ม่าย สิเมโอน, เลวี, ยูดา, อิดสาคา, เหธา เสบูลุน.

24ลาเซน เญย ตอน ม่าย โยเซ้บ เหธา เบนยามิน.

25ลาเซน เญย โน่ว เป์ย, บินฮา, เญย ตอน ม่าย ดาน เหธา นับทาลี.

26เลอา เญย โน่ว เป์ย, สินปา, เญย ตอน ม่าย กาด เหธา อาเซ. น้าย เต๋ย เหยียด ฒู้ง ตอน, ยาโค้บ เยียม ปัดดานอาลัม ตุ๊ ต้าย.

27ยาโค้บ หฑวน เถา นิ่น เญย เตีย, อีสัก, เยียม มัมเล, นิด คีลิย้าดอานบา, (เซ เฮโบโลน, ต้ง ฒิ่น ด่าง อับลาฮัม เหธา อีสัก เยียม เญย ต๋อง.)

28อีสัก เฒี่ยง ตุ๊ เหยียด แป๊ะ เป๊ด เหฒียบ หฮญัง.

29นิ่น เฒี่ยง ตุ๊ เสี่ยว ญ่วน ด๊าว, หฮญัง-เจ๊ย โก๋ ไห่, ฯฒฯ ตั๋ง เฉีย, เกวย เสย หมี่ อ๊ะ. นิ่น เญย อี เต้า ตอน, เอซาว เหธา ยาโค้บ, ต้อ นิ่น เญย เซย มี่ง หฒัง.

← Chapter 34 Jump to: Chapter 36 →