Genesis 48

Mien Bible (Thai Script) © Thailand Bible Society, 2007

← Chapter 47 Jump to: Chapter 49 →

1ฆะฮ้า ไม้ หนั่ง เล่า, ม่าย เมี่ยน บั๋ว โยเซ้บ, “เม่ย เญย เตีย ไม้ หลง.” โยเซ้บ ฯฒฯ ต้อ เจี๊ยน นิ่น เญย อี เต้า ตอน, มะนัดเส เหธา เอฟาอิม, มี่ง หมั่ง นิ่น เญย เตีย.

2เมี่ยน บั๋ว ยาโค้บ, “เม่ย เญย ตอน, โยเซ้บ, ต้าย หมั่ง เม่ย อ๊ะ.” ยาโค้บ ฯฒฯ แหธง เจี์ย ซิน ต้าย เฒว์ย เจี๊ยน วั้ว โหธว.

3ยาโค้บ ก๊อง บั๋ว โยเซ้บ, “เน่น เจี๋ย เญย ทิน-ฮู่ง เยียม คานาอัน เต่ย-ปูง, ลู้ด เต่ย, หิ่น ธ้วด ต้าย ปวัง หว่า เตีย.

4นิ่น ก๊อง, ‘เยีย อ๋อย ปุน เม่ย ม่าย ตอน-เจว๊ย ฟุน-ฟะ ธั้ม, หฮยาง ต้าย โหฒว ธั้ม-ฝีง เมี่ยน. เยีย หย่า อ๋อย เฒาะ น้าย นอม เต่ย-ปูง จิว ปุน เม่ย เญย โฮ์ ต่อย เฒ้ย-ฟุน เหยียด ลิ์ว หฑิบ.’”

5ยาโค้บ แอ๋ง ก๊อง, “โยเซ้บ อ่า, ต้ง เยีย ไม้ แก้ง ต้าย, เม่ย เยียม น้าย อียิบ เต่ย-ปูง ตุ๊ วั้ว เต๋ย อี เต้า ตอน, เอฟาอิม เหธา มะนัดเส, อ๋อย หฒุ ฝุน เป๋น เยีย เญย ป่วน ตอน ฮนั้ง ลูเบน เหธา สิเมโอน นอ.

6ฆะฮ้า เม่ย แอ๋ง ตุ๊ ฝุเจว๊ย นอ, ฯฒฯ ฝุน เป๋น เม่ย กั้น เญย ป่วน. นิ่น บัว หฑิบ เญย ป่วน เซ กัน นิ่น บัว เญย ก๋อ เญย บั๋ว หฑิบ ฮนั้ง.

7เยีย เยียม ปัดดานอาลัม หฑวน วั้ว หฒั่น, เยียม คานาอัน เต่ย-ปูง เล่ย เอฟาลาทา มู้ง ไม้ หนั่ง โก, เม่ย เญย มา, ลาเซน, เกวย เสย, ปุน เยีย เฑ่า ไห่. เยีย หฒัง นิ่น มี่ง เอฟาลาทา มู้ง วั้ว ติ้ว เจ๊า เญย กะเฮลน.” (เอฟาลาทา แอ๋ง ม่าย นอม บั๋ว เห่ว เบดเลเฮม.)

8อิสะลาเอน ปวัด โยเซ้บ เญย ตอน บัว, นิ่น หน่าย ก๋า, “น้าย หาย เต้า?”

9โยเซ้บ บั๋ว นิ่น เญย เตีย, “น้าย เซ ทิน-ฮู่ง ปุน เยีย เยียม น้าย ตุ๊ ต้าย เญย ตอน.” อิสะลาเอน ก๊อง, “ต้อ ต้าย เยีย น้าย เหว่ย ปุน เยีย ปวัง หว่า นิ่น บัว.”

10อิสะลาเอน เญย หฮญัง-เจ๊ย โก๋ ไห่, มฒีง บั๊ว, หมั่ง ไม้ หนั่ง เฒียน. โยเซ้บ ฯฒฯ ต้อ นิ่น เญย ตอน มี่ง เถา นิ่น เญย เตีย วั้ว, นิ่น เญย เตีย ชัม เจี๊ยน ฒม.

11อิสะลาเอน ก๊อง บั๋ว โยเซ้บ, “เยีย ฮนั้ม ต้าย เหยียด ลิ์ว ไม้ ตุ๊ ปวัด เม่ย, มป่า ทิน-ฮู่ง ปุน เยีย เลี่ยม เม่ย เญย ตอน ตุ๊ ปวัด.”

12โยเซ้บ ฮล้อบ นิ่น เญย ตอน เหฌี่ย อิสะลาเอน เญย ธั่ม ฒุ่ย หย่า เยียม นิ่น เญย หฑะเฮมียน พัวะ เหฌี่ย เถา เดา.

13โยเซ้บ เคน เจี๊ยน นิ่น เญย อี เต้า ตอน, บย่าว เจี๊ยะ ปั์ว เคน เอฟาอิม มี่ง เยียม อิสะลาเอน เญย หฒาย ปูง. หฒาย เจี๊ยะ ปั์ว เคน มะนัดเส มี่ง เยียม อิสะลาเอน เญย บย่าว ปูง.

14มป่า อิสะลาเอน จิ๊ว เจี๊ยน ปั์ว. บย่าว เจี๊ยะ มาน เจี๊ยน เอฟาอิม เญย มฆ้อง ไม้ กุ๊น นิ่น โหฒว ตอน-ไฝ. หฒาย เจี๊ยะ แอ๋ง มาน เจี๊ยน มะนัดเส เญย มฆ้อง ไม้ กุ๊น มะนัดเส โหฒว ตอน-โฮล.

15นิ่น ฯฒฯ ปวัง หว่า โยเซ้บ อ๊ะ. นิ่น ก๊อง, “โท้ เยีย เญย อง, อับลาฮัม, เหธา เยีย เญย เตีย, อีสัก, ปัวะ หฒั่ง เญย ทิน-ฮู่ง เหธย ฟุ น้าย เต๋ย อี เต้า ตอน. โท้ เหยียด เสย ต้อ เยีย เถา อี้ ฮนอย เญย ทิน-ฮู่ง เหธย ฟุ ปุน นิ่น บัว.

16โท้ เหฌียว เยีย เล่ย ดุ๊ด เหยียด ฒู้ง ไฮ่ ห่อย เยีย เญย เหฒะ หน่าน วั้ว เต้า ฟิน-เมี่ยน เหธย ฟุ ปุน น้าย เต๋ย อี เต้า ตอน. โท้ ปุน น้าย เต๋ย อี เต้า ตอน หฑิบ เยีย เญย บั๋ว เหธา เยีย เญย อง, อับลาฮัม, เหธา เยีย เญย เตีย, อีสัก, เญย บั๋ว. โท้ ปุน นิ่น บัว เยียม น้าย ลู่ง เดี๊ย หฮยาง เจี์ย ต้าย ธั้ม.”

17โยเซ้บ ปวัด นิ่น เญย เตีย ฮนั้ง น้าย นอ เฒาะ บย่าว เจี๊ยะ ปั์ว มาน เจี๊ยน เอฟาอิม เญย มฆ้อง, นิ่น ไม้ หอบ เฮญี้ยว. นิ่น ฯฒฯ เฒาะ นิ่น เตีย เญย ปั์ว เยียม เอฟาอิม เญย มฆ้อง วาน ฆอย, อ๋อย ปุน นิ่น มาน มะนัดเส เญย มฆ้อง.

18นิ่น ก๊อง บั๋ว นิ่น เญย เตีย, “เตีย อ้า! ไม้ เฒ์ย ฮนั้ง น้าย เหลาะ. ตอน-โฮล ต้ง น้าย เต้า. อ๋อย หฒุ หล่ง เม่ย เญย บย่าว เจี๊ยะ ปั์ว มาน น้าย เต้า เญย มฆ้อง.”

19มป่า นิ่น เญย เตีย ไม้ คั้ง. นิ่น ก๊อง, “ตอน อ้า! เยีย ฮิ้ว เญย. มะนัดเส เญย เฒ้ย-ฟุน หย่า อ๋อย เป๋น เหยียด ฝีง. นิ่น หย่า ตุ๊ โหฒว โฮล. มป่า นิ่น เญย โย์ว อ๋อย ตุ๊ โหฒว เก้า โฮล. โย์ว เญย เฒ้ย-ฟุน อ๋อย เป๋น ธั้ม-ฝีง โฮล เญย.”

20วั้ว ฮนอย ยาโค้บ ปวัง หว่า นิ่น บัว. นิ่น ก๊อง, “อิสะลาเอน เมี่ยน อ๋อย ต้อ เม่ย เญย บั๋ว มี่ง ปวัง หว่า. นิ่น บัว อ๋อย ก๊อง, ‘โท้ ทิน-ฮู่ง ปุน เม่ย ฮนั้ง เอฟาอิม เหธา มะนัดเส นอ.’” อิสะลาเอน ฯฒฯ ฮนั้ง น้าย นอ ปุน เอฟาอิม ตุ๊ โหฒว เก้า โฮล มะนัดเส.

21ปวัง ลิ์ว หว่า, อิสะลาเอน ก๊อง บั๋ว โยเซ้บ, “เยีย เกวย เสย เญย เฒี่ยง โห่ อ๊า ลั่ม เถา อ๊ะ. มป่า ทิน-ฮู่ง ฒู้ง เหธา เม่ย บัว เยียม, หย่า อ๋อย ต้อ เม่ย บัว หฑวน เม่ย บัว เญย อง-ถาย เญย เต่ย-ปูง.

22เยีย เฒาะ ต้ง เยีย หล่ง หฑุ ด๊าว เหธา จวัง-หฒิน ธ้าง ตุ๊ อาโมไล เมี่ยน เญย วั้ว นอม ฒอง จิว ปุน เม่ย, ไม้ เฒ์ย ปุน เม่ย เญย ก๋อ บัว.”

← Chapter 47 Jump to: Chapter 49 →