Genesis 43

Mien Bible (Thai Script) © Thailand Bible Society, 2007

← Chapter 42 Jump to: Chapter 44 →

1เยียม คานาอัน เต่ย-ปูง ม่าย ต้ม ฮวาง ต้ม หง่อ โค้ว ไห่.

2ยาโค้บ เญย ฮมวั้ง ต่อย หญั่น เหฑ่ง มี่ง อียิบ เต่ย-ปูง ม์าย ต้าย เญย เบย้า หมี่ อ๊ะ. ยาโค้บ ฯฒฯ ก๊อง บั๋ว นิ่น เญย ตอน, “เม่ย บัว อ๋อย หฒุ แอ๋ง มี่ง ม์าย เต๋ย เบย้า ม่าะ!”

3ยูดา ก๊อง บั๋ว นิ่น เญย เตีย, “วั้ว ล่าน เมี่ยน ก๊อง เฮนี้ย เญย บั๋ว เยีย บัว, สี ก๊อง เยีย บัว ไม้ ต้อ เยีย บัว เญย โย์ว-ลาย เหธา เจี๊ยน มี่ง นอ, เยีย บัว เลี่ยม ไม้ ตุ๊ ปวัด นิ่น เญย เฮมียน.

4สี ก๊อง เตีย ปุน โย์ว-ลาย เหธา เยีย บัว มี่ง, เยีย บัว ฯฒฯ มี่ง เถง เตีย ม์าย เบย้า.

5มป่า สี ก๊อง ไม้ ปุน โย์ว-ลาย เหธา เยีย บัว มี่ง, เยีย บัว ไม้ ไฮ่ มี่ง อ๊ะ. เหว่ย หฒุ วั้ว ล่าน เมี่ยน บั๋ว เยีย บัว, ‘เม่ย บัว ไม้ ต้อ โย์ว-ลาย ต้าย นอ, เม่ย บัว เลี่ยม ไม้ ตุ๊ ปวัด เยีย เญย เฮมียน.’”

6อิสะลาเอน ก๊อง, “เม่ย บัว โหฒว หาย หญู่ง ห่อย เยีย ด่ง น้าย โค้ว? เหว่ย หาย ติ่ว บั๋ว วั้ว ล่าน เมี่ยน เม่ย บัว แอ๋ง ม่าย เต้า โย์ว?”

7นิ่น เญย ตอน บัว เตา, “วั้ว ล่าน เมี่ยน หน่าย หม่วน เถา เยีย บัว เหธา เยีย บัว เญย ฮมวั้ง ต่อย. นิ่น หน่าย ก๋า, ‘เม่ย บัว เญย เตีย หธ่อ เยียม เญย ไฟ? แอ๋ง ม่าย โย์ว เญย?’ เยีย บัว ขูง หฒิว นิ่น หน่าย เญย หว่า เตา ฮนั้ง. เยีย บัว ฝู่ง ฮิ้ว ตุ๊ นิ่น อ๋อย ก๊อง, ‘อ๋อย หฒุ ต้อ โย์ว-ลาย ต้าย?’”

8ยูดา ก๊อง บั๋ว นิ่น เญย เตีย, อิสะลาเอน, “โท้ ปุน วั้ว เต้า ตอน เหธา เยีย มี่ง ม่าะ! เยีย บัว ฯฒฯ ธ้วด เจ๊า มี่ง อ๊ะ. เตีย เหธา เยีย บัว เหธา เยีย บัว เญย ฝุเจว๊ย หย่า ไม้ หฒุ หง่อ ไต่.

9เยีย หล่ง เยีย กั้น เญย แหม่ง โหฒว ดาม-ต้าว. เตีย เห่ว เยีย กั้น เปว น้าย เต้า ตอน ตุ๊ เญย. สี ก๊อง เยีย ไม้ ต้อ นิ่น หฑวน เถา เม่ย น้าย, เยีย แล์ง เหยียด เสย ดาม-ตอง.

10สี ก๊อง ไม้ ฮนั้ง น้าย ฒั้ว เล่า, เยีย บัว ฒู้ง มี่ง ตุ๊ อี หฑุ่น หฑวน ต้าย อ๊ะ.”

11อิสะลาเอน ก๊อง บั๋ว นิ่น เญย ตอน บัว, “สี ก๊อง หฒะเก้ง อ๋อย หฒุ ต้อ นิ่น มี่ง นอ, เม่ย บัว อ๋อย หฒุ ฮนั้ง น้าย นอ โหฒว. อ๋อย หฒุ ต้อ เต๋ย น้าย นอม เต่ย-ปูง เก้า หลง เจี๋ย เญย กะน้าย มี่ง โหฒว ฒี่ง เหญ่ย ปุน วั้ว ล่าน เมี่ยน. เฒาะ เต๋ย เดี๋ยง-ฒูง ดาง เหธา เต๋ย เมว์ย-ต้อง, เดีย-ดาง, มูหย่อ เหธา หญู่ง เปี๊ยว-งั่น ดาง เหธา อันมัน เปี๊ยว, ตั๊บ เจี๊ยน กะน้าย ต้อ มี่ง.

12เม่ย บัว หย่า อ๋อย หฒุ ต้อ ญ่าน เก้า ธั้ม มี่ง ด่าง วั้ว หฑุ่น อี โก๊ว. อ๋อย หฒุ ต้อ ต้ง เยียม บัวะ วั้ว เต๋ย ญ่าน ถุย หฑวน, เหฑีย นิ่น บัว ตั๊บ ต่อง มเปย.

13กุ๊น ต้อ เจี๊ยน เม่ย บัว เญย โย์ว มี่ง ล์อ วั้ว ล่าน เมี่ยน.

14โท้ เน่น เจี๋ย เญย ทิน-ฮู่ง ปุน เม่ย บัว เยียม วั้ว ล่าน เมี่ยน เญย หฑะเฮมียน ตุ๊ นิ่น ค้อ-เลี่ยน เม่ย บัว, ปุน เม่ย บัว ตุ๊ เบนยามิน เหธา สิเมโอน ต้อ หฑวน. เยีย กั้น แอ๊ะ, ไม้ กุ๊น อ๋อย หฒุ กวั่ง เยีย เญย ฝุเจว๊ย หย่า ธิ่น นิ่น อ๊ะ.”

15นิ่น บัว มั์ว-ต่อย ฯฒฯ ธ้วด เจ๊า มี่ง อียิบ เต่ย-ปูง, แอ๋ง ต้อ เจี๊ยน ฒี่ง เหญ่ย เหธา ญ่าน เก้า ธั้ม มี่ง ด่าง วั้ว หฑุ่น เญย อี โก๊ว, หย่า ต้อ เจี๊ยน เบนยามิน มี่ง. มี่ง เถา อียิบ เต่ย-ปูง, นิ่น บัว เปียะ มี่ง ล์อ โยเซ้บ.

16โยเซ้บ ปวัด เบนยามิน เหธา เจี๊ยน ต้าย ฯฒฯ บั๋ว โก๋ว นิ่น เญย เปย๊า เญย ต้ม โปว, “ต้อ น้าย เต๋ย เมี่ยน มี่ง เยีย เญย เปย๊า. อ๋อย หฒุ ไต๋ เต้า แซง-คู้ เบ่น ต้าย หญั่น เหว่ย หฒุ น้าย เต๋ย เมี่ยน อ๋อย หฒุ เหธา เยีย หญั่น ลู่ง อ๋าน.”

17วั้ว เต้า โปว เอย เจี๊ยน โยเซ้บ เญย หว่า โหฒว, ต้อ เจี๊ยน วั้ว เต๋ย มั์ว-ต่อย มี่ง โยเซ้บ เญย เปย๊า.

18โปว ต้อ เจี๊ยน นิ่น บัว เปียะ โยเซ้บ เญย เปย๊า วั้ว หฒั่น, นิ่น บัว กั้ม เหฑีย ไห่, เยียม เฮญี้ยว ฮนั้ม, “นิ่น ต้อ เยีย บัว ต้าย น้าย เซ หลาย ต้าว หฑุ่น ตั๊บ เจี๊ยน เยีย บัว เญย บัวะ ฑุ่ย วั้ว เต๋ย ญ่าน. อี้ หฒั่น นิ่น บัว อ๋อย ล์อ สี่ ปุน เยีย บัว, เฒาะ เยีย บัว โหฒว โน่ว, แอ๋ง เฒาะ เยีย บัว เญย ล่อ มเปย.”

19เถา แก้ง ด่าง นิ่น บัว ฯฒฯ ก๊อง บั๋ว โก๋ว โยเซ้บ เญย เปย๊า วั้ว เต้า ต้ม โปว,

20“ต้ม ก๋อ อ่า, เยีย บัว โท้ บั๋ว โจ๋ว หว่า เม่ย โอ่. เยีย บัว ต้าย ม์าย ต้าว หฑุ่น เบย้า.

21หฑวน แหมง, เถา เยีย บัว ฮิด เญย ต๋อง, เยีย บัว คอย บัวะ ปวัด เก๊าะ-เมี่ยน ม์าย เบย้า เญย ญ่าน เหยียด ฒู้ง เยียม เก๊าะ-เมี่ยน เญย บัวะ ฑุ่ย. ญ่าน เญย เฮนี้ย-ต้าว หย่า ฟี่ ฮนั้ง เญย. น้าย เต๋ย เหยียด ฒู้ง ญ่าน เยีย บัว แอ๋ง ต้อ เจี๊ยน ต้าย ถุย หฑวน.

22เยีย บัว กั้น หธะเหล่ง ต้อ เจี๊ยน ญ่าน ต้าย ม์าย เบย้า. ฒิ่น ด่าง วั้ว หฑุ่น เญย ญ่าน, ไม้ ฮิ้ว ตุ๊ หาย เต้า ตั๊บ เยีย บัว เญย บัวะ กะญั์ว.”

23วั้ว เต้า โปว เตา, “ไม้ ตู๋ง เฑ่า, ไม้ ตู๋ง กั้ม เหฑีย. ต๋าย เม่ย บัว เญย ทิน-ฮู่ง, เม่ย บัว เญย เตีย เญย ทิน-ฮู่ง, เฒาะ น้าย เต๋ย ญ่าน ตั๊บ บัวะ ปุน เม่ย บัว. เม่ย บัว ม์าย ต้าว หฑุ่น เบย้า เญย ญ่าน เยีย ตุ๊ เซียว หมี่ อ๊ะ.” ก๊อง ลิ์ว, นิ่น แอ๋ง ต้อ สิเมโอน ต้าย.

24วั้ว เต้า โปว ต้อ วั้ว เต๋ย มั์ว-ต่อย เปียะ เปย๊า ล์อ ววม ปุน นิ่น บัว หฑาว เหฒา หย่า ล์อ เมี้ย ปุน นิ่น บัว เญย ล่อ หญั่น.

25วั้ว เต๋ย มั์ว-ต่อย เบ่น เหฒียง นิ่น บัว เญย ฒี่ง เหญ่ย ฒั้ว เจี๊ยน โยเซ้บ หฑวน, เหว่ย หฒุ นิ่น บัว ฮิ้ว ตุ๊ นิ่น บัว อ๋อย หฒุ เหธา นิ่น เยียม วั้ว หญั่น ลู่ง อ๋าน.

26โยเซ้บ เถา เปย๊า, นิ่น บัว เฒาะ นิ่น บัว ต้อ ต้าย เญย ฒี่ง เหญ่ย เยียม วั้ว เปย๊า ปุน โยเซ้บ, หย่า พัวะ เถา เดา ป๋าย.

27โยเซ้บ หน่าย นิ่น บัว, “เม่ย บัว เยียม หลง เญย ซ่าะ?” แอ๋ง หน่าย นิ่น บัว, “ฒิ่น ด่าง เม่ย บัว ก๊อง เม่ย บัว เญย เตีย โก๋ ไห่ อ๊ะ. นิ่น หธ่อ เยียม เญย ไฟ? นิ่น หลง เญย ซ่าะ?”

28นิ่น บัว เตา, “เม่ย เญย โปว, เยีย บัว เญย เตีย, เยียม หลง เญย.” นิ่น บัว แอ๋ง โด๊ะ เหฌี่ย ป๋าย.

29โยเซ้บ ปวัด เหธา นิ่น จวั่ง มา วั้ว เต้า โย์ว, เบนยามิน, นิ่น ฯฒฯ หน่าย, “ฒิ่น ด่าง เม่ย บัว ก๊อง บั๋ว เยีย, เม่ย บัว ม่าย เต้า โย์ว-ลาย, ต้ง น้าย เต้า ซ่าะ? ตอน อ่า, โท้ ทิน-ฮู่ง เหธย เอน ปุน เม่ย.”

30ก๊อง ลิ์ว, โยเซ้บ อ๋อย หฒุ เปย๋า. นิ่น ไฮ์ ฮนั้ม! ไห่ นิ่น เญย โย์ว, เญี์ยน ไม้ เจี๊ยน ววม-เหมว่ย, ฯฒฯ เปียะ วั้ว เปย๊า เกน เญี้ยม.

31หฑาว ลิ์ว เฮมียน, นิ่น ธ้วด ต้าย เญี์ยน เจี๊ยน ววม-เหมว่ย, แอ๋ง เห่ว นิ่น เญย โปว เบ่น หฮนาง.

32โปว เหว่ย โยเซ้บ กั้น เบ่น นอม เตี้ย, เหว่ย วั้ว เต๋ย มั์ว-ต่อย แอ๋ง กั้น เบ่น นอม เตี้ย. แอ๋ง ม่าย เหธา โยเซ้บ หญั่น หฮนาง วั้ว เต๋ย อียิบ เมี่ยน กั้น หธะเหล่ง เบ่น นอม เตี้ย, เหว่ย หฒุ อียิบ เมี่ยน ไฮ์ ไม้ คู่ เหธา ฮิบลู เมี่ยน จวั่ง เตี้ย หญั่น หฮนาง.

33โยเซ้บ ปุน หฒวัง มั์ว-ต่อย เฒว์ย เจี๊ยน เฮมียน ฮวิน มี่ง โยเซ้บ เญย เตี้ย วั้ว ปูง, หย่า หฒิว นิ่น บัว เญย หฮญัง-เจ๊ย เฒว์ย ไบ้ เยียม ตอน-โฮล ไบ้ มี่ง เถา ตอน-ไฝ. นิ่น บัว กั้น ปวัด ฮนั้ง น้าย นอ เฒว์ย เจี๊ยน, นิ่น บัว บัวะ ฮ่อง ไห่, ล่าน หมั่ง ล่าน.

34นิ่น บัว หญั่น เญย กะน้าย, โปว เยียม โยเซ้บ เญย เตี้ย เฒาะ ต้าย ปุน นิ่น บัว. มป่า เบนยามิน ตุ๊ ธั้ม ปยา โก๊ว. นิ่น บัว เหธา โยเซ้บ เฌียน-โย่ว เญย หญั่น, เฌียน-โย่ว เญย ฮบ.

← Chapter 42 Jump to: Chapter 44 →