Genesis 50

Mien Bible (Thai Script) © Thailand Bible Society, 2007

← Chapter 49 Jump to:

1โยเซ้บ ปวัด นิ่น เญย เตีย ตั๋ง เฉีย, นิ่น ฯฒฯ พัวะ เจี๊ยน นิ่น เญย เตีย กู้ หงว่าย ชะ เญี้ยม หย่า ฒม นิ่น เญย เตีย เญย เฮมียน.

2นิ่น พ้าย เถง นิ่น โหฒว กง วั้ว เต๋ย เดีย-ไซ หล่ง เดีย-ววม เหฒียม เจี๊ยน นิ่น เญย เตีย, อิสะลาเอน, เญย เซย ปุน เซย ไม้ ไฮ่ ฮู้, ไม้ ไฮ่ เหฒวย.

3เดีย-ไซ ฯฒฯ หล่ง เฝย เหฒียบ ฮนอย โหฒว, เหว่ย หฒุ น้าย เต๋ย กง เฉียม หฒุ เฝย เหฒียบ ฮนอย. อียิบ เมี่ยน หย่า เถง เจี๊ยน เฑ่า เญี้ยม เธี้ยด เหฒียบ ฮนอย.

4น้าย เต๋ย เฑ่า เญี้ยม เญย เฒี่ยง โห่ เจี๋ย ลิ์ว, โยเซ้บ ก๊อง บั๋ว ฟาโล ฮู่ง เญย เจียน, “สี ก๊อง เยีย โหฒว ตุ๊ หอบ เม่ย บัว, โท้ เม่ย บัว ต้อ เยีย น้าย เต๋ย หว่า มี่ง บั๋ว ฟาโล ฮู่ง โอ่.

5บั๋ว นิ่น, ‘เยีย เญย เตีย อ๋อย เกวย เสย วั้ว หฒั่น, นิ่น อ๋อย เยีย แล์ง เจี์ย แหง่ง หว่า ต้อ นิ่น เญย เซย มี่ง คานาอัน เต่ย-ปูง หฒัง เจี๊ยน นิ่น กั้น หฒุ เหฒียง เญย โฒ้ว-โม่ว.’ ฮนั้ง น้าย, โท้ ปุน เยีย ต้อ เยีย เญย เตีย มี่ง หฒัง. หฒัง ลิ์ว, เยีย แอ๋ง หฑวน น้าย.”

6ฟาโล ฮู่ง เตา, “กุ๊น ต้อ เม่ย เญย เตีย มี่ง หฒัง หฒิว เม่ย เหธา นิ่น แล์ง เจี์ย เญย หว่า.”

7โยเซ้บ ฯฒฯ ต้อ นิ่น เญย เตีย มี่ง หฒัง อ๊ะ. ฟาโล ฮู่ง เญย เหยียด ฒู้ง เจียน หย่า เหธา เจี๊ยน มี่ง. เซ เยียม ฮู่ง ติ่น โหฒว เก้า โฮล วั้ว เต๋ย เจียน, เหธา เยียม อียิบ เต่ย-ปูง หาย เต้า โหฒว โฮล เญย เมี่ยน, หย่า กัน เจี๊ยน โยเซ้บ มี่ง.

8โยเซ้บ เญย ฮมวั้ง ต่อย เหธา นิ่น เญย มั์ว-ต่อย แอ๋ง เหธา นิ่น เญย เตีย เญย เปย๊า ฒง เมี่ยน เหยียด ฒู้ง กัน เจี๊ยน มี่ง. ขูง เหฒ่ง ฝุเจว๊ย-ไฝ เหธา ปะกี ยู่ง, ยู่ง เหธา ง่ง เยียม วั้ว โกเซน ฮนั้ง.

9ม่าย ม์า-เธีย, ม่าย เมี่ยน เก้ ม์า เหธา เจี๊ยน มี่ง. น้าย เต๋ย เมี่ยน เหยียด ฒู้ง เป๋น เหยียด กวั้น ธั้ม เญย.

10มี่ง เถา จอแดน ด้าย เญย ตง ปูง แหมง, อาท้าด เญย เบ๊าะ เบย้า เธี้ยง, นิ่น บัว ชะ เญี้ยม บุย เญย. โยเซ้บ หย่า เยียม หน่าย เหว่ย นิ่น เญย เตีย เฑ่า เญี้ยม เสี่ย ฮนอย.

11เยียม วั้ว นอม ต๋อง เญย คานาอัน เมี่ยน ปวัด เมี่ยน เยียม อาท้าด เบ๊าะ เบย้า เญย เธี้ยง เฑ่า เญี้ยม, นิ่น บัว ก๊อง, “น้าย เต๋ย อียิบ เมี่ยน เฑ่า เญี้ยม, โหฒว นอม จั๋น-ไต่ ยิ่น โฮล เญย.” เหว่ย น้าย นิ่น บัว ฯฒฯ ธ้วด บั๋ว เห่ว วั้ว นอม ต๋อง อาเบนมิดลาอิม. วั้ว นอม ต๋อง เยียม จอแดน ด้าย เญย ตง ปูง แหมง.

12ยาโค้บ เญย ตอน บัว ฯฒฯ เอย เจี๊ยน นิ่น บัว เญย เตีย พ้าย เญย หว่า โหฒว.

13นิ่น บัว ต้อ เซย มี่ง คานาอัน เต่ย-ปูง, หฒัง เจี๊ยน เยียม มักเปลา วั้ว ฑง เดา เญย แบ๋ง-ค้วด, เล่ย มัมเล ไม้ โก. ต้ง ฒิ่น ด่าง อับลาฮัม เถง ฮิดไท เมี่ยน, เอโฟโลน, ม์าย โหฒว โฒ้ว-เก้ม วั้ว ฑง เดา.

14หฒัง ลิ์ว นิ่น เญย เตีย, โยเซ้บ เหธา นิ่น เญย มั์ว-ต่อย แอ๋ง เหธา นิ่น มี่ง เญย เมี่ยน เหยียด ฒู้ง หฑวน อียิบ เต่ย-ปูง อ๊ะ.

15นิ่น บัว เญย เตีย เกวย เสย หมี่ อ๊ะ, โยเซ้บ เญย ก๋อ บัว ก๊อง, “เหฑีย โยเซ้บ อ๋อย ฑอง บัว มเปย, หฒิว บัว ฒิ่น ด่าง โหฒว ห่อย นิ่น เญย สี่ อ๋อย วิ่น ปุน บัว.”

16นิ่น บัว ฯฒฯ ปุน เมี่ยน มี่ง บั๋ว โยเซ้บ, “บัว เญย เตีย ไม้ แก้ง เกวย เสย วั้ว หฒั่น นิ่น ก๊อง,

17‘อ๋อย หฒุ บั๋ว โยเซ้บ, โท้ กวั่ง ฆอย เม่ย เญย ก๋อ บัว โหฒว ต่อง ห่อย เม่ย วั้ว เต๋ย สี่.’ อี้ หฒั่น เยีย บัว, เม่ย เญย เตีย เญย ทิน-ฮู่ง เญย โปว, โท้ เม่ย กวั่ง ฆอย เยีย บัว โหฒว ต่อง เม่ย เญย ฒุ์ย.” โยเซ้บ ไฮ์ ธ้วด น้าย เต๋ย หว่า นิ่น ฯฒฯ เญี้ยม อ๊ะ.

18นิ่น เญย ก๋อ บัว ฯฒฯ มี่ง เถา โยเซ้บ เญย หฑะเฮมียน เกว่ย เหฌี่ย เดา ป๋าย แอ๋ง ก๊อง, “เยีย บัว เยียม เม่ย เญย หฑะเฮมียน โท้ โหฒว เม่ย เญย โน่ว.”

19มป่า โยเซ้บ ก๊อง บั๋ว นิ่น เญย ก๋อ บัว, “ไม้ ตู๋ง กั้ม เหฑีย. เยีย เซ ไม้ เฒ์ย ทิน-ฮู่ง.

20เม่ย บัว ต๊า หฒะเอ๋ย ห่อย เยีย, มป่า ทิน-ฮู่ง หล่ง วั้ว หญู่ง หฒะเอ๋ย โหฒว หลง เญย สี่. ฮนั้ง อี้ หฒั่น บัว ปวัด เจี๊ยน นอ, นิ่น หล่ง น้าย หญู่ง หฒะเอ๋ย เหฌียว เมี่ยน ธั้ม เญย แหม่ง.

21ฮนั้ง หน่าย, ก๋อ บัว ไม้ ตู๋ง กั้ม เหฑีย. เยีย หย่า อ๋อย โก๋ว เม่ย บัว เหธา เม่ย บัว เญย ฮมวั้ง ต่อย.” นิ่น ก๊อง หว่า หลง เญย ปุน นิ่น บัว, ออน นิ่น บัว เญย เฮญี้ยว.

22โยเซ้บ เหธา นิ่น เญย เตีย เญย ฮมวั้ง ต่อย เยียม อียิบ เต่ย-ปูง, นิ่น เฒี่ยง ตุ๊ เหยียด แป๊ะ เหฒียบ หฮญัง,

23หย่า ตุ๊ ปวัด เอฟาอิม เญย ฝุเจว๊ย เถา ตะฟาม ต่อย. แอ๋ง ตุ๊ ฒิบ มะนัดเส เญย ตอน, มาคี, เญย ฝุเจว๊ย เปียะ นิ่น เญย เมี่ยน โฮ์ว.

24โยเซ้บ ก๊อง บั๋ว นิ่น เญย มั์ว-ต่อย, “เกวย เสย เญย เฒี่ยง โห่ อ๊า ลั่ม เต๋ย เถา อ๊ะ. มป่า ทิน-ฮู่ง ฒู้ง อ๋อย ต้าย เถง เม่ย บัว, ต้อ เม่ย บัว ธ้วด น้าย นอม เต่ย-ปูง, มี่ง เถา ฒิ่น ด่าง นิ่น แล์ง เจี์ย แหง่ง หว่า ปุน อับลาฮัม, อีสัก เหธา ยาโค้บ, วั้ว นอม เต่ย-ปูง.”

25โยเซ้บ แอ๋ง เห่ว อิสะลาเอน เญย ตอน แล์ง แหง่ง หว่า. นิ่น ก๊อง, “ทิน-ฮู่ง ฒู้ง อ๋อย ต้าย เถง เม่ย บัว. เม่ย บัว อ๋อย หฒุ ต้อ เจี๊ยน เยีย เญย บู๊ง เปี้ยน เจี๊ยน มี่ง.”

26โยเซ้บ เฒี่ยง เหยียด แป๊ะ เหฒียบ หฮญัง เยียม วั้ว อียิบ เต่ย-ปูง เกวย เสย หมี่ อ๊ะ. นิ่น บัว เฒาะ เซย เหฒียม เจี๊ยน เดีย-ววม ปุน ไม้ ไฮ่ ฮู้, ไม้ ไฮ่ เหฒวย, เยียม วั้ว อียิบ เต่ย-ปูง ตั๊บ เจี๊ยน เป๊น อ๊ะ.

← Chapter 49 Jump to: