Genesis 45

Mien Bible (Thai Script) © Thailand Bible Society, 2007

← Chapter 44 Jump to: Chapter 46 →

1โยเซ้บ ไฮ์ เญี์ยน ไม้ เจี๊ยน, ววม-เหมว่ย อ๋อย ธ้วด ไห่ อ๊ะ, ฯฒฯ เป๊ะ โซ้ว นิ่น เญย กะเฮลน เญย เมี่ยน, “เม่ย บัว เหยียด ฒู้ง ธ้วด มี่ง ม่าะ!” โยเซ้บ ปุน นิ่น เญย มั์ว-ต่อย ฮิ้ว ตุ๊ นิ่น วั้ว หฒั่น, ไม้ ม่าย เหยียด เต้า กะเฮลน เมี่ยน เยียม.

2โยเซ้บ ชะ เญี้ยม บุย เญย, อียิบ เมี่ยน ฯฒฯ ไฮ์ หมี่ อ๊ะ, แอ๋ง ซีง มี่ง เถา ฮู่ง ติ่น วั้ว.

3โยเซ้บ บั๋ว นิ่น เญย มั์ว-ต่อย, “เยีย เซ โยเซ้บ. เยีย เญย เตีย หธ่อ เยียม เญย ไฟ?” นิ่น เญย มั์ว-ต่อย ไฮ์ นิ่น ฮนั้ง น้าย นอ ก๊อง, นิ่น บัว เฮญี้ยว หว่าย เหฑ่ง, ฒู้ง ไม้ ไฮ่ เตา.

4โยเซ้บ ฯฒฯ บั๋ว นิ่น บัว, “โท้ เม่ย บัว ต้าย ฟัด เต๋ย ม่าะ!” นิ่น บัว ฯฒฯ มี่ง ฟัด. โยเซ้บ ก๊อง, “เยีย เซ เม่ย บัว เญย โย์ว, โยเซ้บ, ต้ง ก๋อ บัว หม่าย มี่ง อียิบ เต่ย-ปูง วั้ว เต้า.

5เม่ย บัว ไม้ ตู๋ง เฮญี้ยว มุน, หวิน กั้น โหฒว ต่อง หลาย หม่าย เยีย ต้าย น้าย. เซ ทิน-ฮู่ง พ้าย เยีย ต้าย ด่าง เม่ย บัว เหว่ย เหฌียว เมี่ยน ธั้ม เญย แหม่ง.

6เต่ย-ปูง หง่อ ตุ๊ อี หฮญัง อ๊ะ. หธ่อ แอ๋ง ม่าย ปยา หฮญัง ไม้ ไฮ่ หฒวัง, ไม้ ไฮ่ เซียว.

7ทิน-ฮู่ง พ้าย เยีย ต้าย ด่าง เม่ย บัว, เหว่ย เม่ย บัว เลี่ยว เต๋ย เมี่ยน เยียม น้าย ลู่ง เดี๊ย, หย่า หล่ง น้าย หญู่ง ต้ม หฒะเอ๋ย เหฌียว ก๋อ บัว ธ้วด.

8“ฮนั้ง น้าย เซ ไม้ เฒ์ย ก๋อ บัว ปุน เยีย ต้าย น้าย. เซ ทิน-ฮู่ง กั้น พ้าย เยีย ต้าย. นิ่น ปุน เยีย ฮนั้ง ฟาโล ฮู่ง เญย เตีย, โหฒว นิ่น เญย เปย๊า ฒง เญย เฒี้ยว, หย่า กุ๊น เหฑ่ง อียิบ เต่ย-ปูง.

9อี้ หฒั่น ก๊าน หฑวน มี่ง บั๋ว เยีย เญย เตีย, นิ่น เญย ตอน, โยเซ้บ, ฮนั้ง น้าย นอ ก๊อง, ‘ทิน-ฮู่ง ปุน เยีย โหฒว อียิบ เต่ย-ปูง เญย เฒี้ยว. เตีย อ๋อย หฒุ เซี้ยบๆ เญย ต้าย เยีย น้าย, ไม้ ตู๋ง ไง่.

10เตีย ไฮ่ เยียม น้าย, โกเซน เต่ย, นิด ฟัด เต๋ย เยีย, เตีย กั้น เหธา เตีย เญย ตอน-เจว๊ย ฟุน-ฟะ, ง่ง กวั้น, ปะกี ยู่ง กวั้น, ยู่ง กวั้น, เลี่ยม เหยียด ฒู้ง ม่าย เญย กะน้าย.

11ฮนั้ง น้าย เยีย ไฮ่ โก๋ว เตีย, เหว่ย หฒุ แอ๋ง ม่าย ปยา หฮญัง ต้ม หง่อ. ไม้ เฒ์ย นอ แอ๊ะ, เตีย เหธา เตีย เญย เปย๊า ฒง เมี่ยน เหธา เตีย ม่าย เญย เหยียด ฒู้ง ด๊อด หน่าน โค้ว.’”

12โยเซ้บ แอ๋ง ก๊อง, “เม่ย บัว เต้าๆ ก๋อ แอ๋ง เหธา เยีย เญย โย์ว, เบนยามิน, เฒียะ ตุ๊ อี้ หฒั่น เหธา เม่ย บัว ก๊อง หว่า เซ เยีย, โยเซ้บ.

13ก๊อง บั๋ว เตีย, เยีย เยียม อียิบ เต่ย-ปูง ตุ๊ เญย เหยียด ฒู้ง ฌัง-หล่าง. ก๊อง เหฑ่ง เม่ย บัว ปวัด เญย เจ๊า-โหล่ว ปุน เตีย หมวัง. หย่า อ๋อย หฒุ ก๊าน เจี๊ยน ต้อ เยีย เญย เตีย ต้าย น้าย.”

14โยเซ้บ ชัม เจี๊ยน นิ่น เญย โย์ว, เบนยามิน, เญี้ยม. เบนยามิน หย่า ชัม เจี๊ยน นิ่น เญย ก๋อ เญี้ยม.

15โยเซ้บ แอ๋ง ฒม นิ่น เญย เต้าๆ ก๋อ แอ๋ง เญี้ยม. ฆะฮ้า นิ่น เญย มั์ว-ต่อย เหธา นิ่น ก๊อง หว่า.

16โยเซ้บ เญย มั์ว-ต่อย ต้าย เญย เฝียน ซีง เถา ฮู่ง ติ่น. ฟาโล ฮู่ง เหธา นิ่น เญย หฒวัง เจียน อะเฮน้ย ไห่ อ๊ะ.

17ฟาโล ฮู่ง ก๊อง บั๋ว โยเซ้บ, “บั๋ว เม่ย เญย มั์ว-ต่อย, ‘อ๋อย หฒุ ฮนั้ง น้าย นอ โหฒว. เฒาะ กะน้าย ปุน เม่ย บัว เญย ล่อ ทอ เจี๊ยน หฑวน คานาอัน เต่ย-ปูง.

18เปี้ยน เม่ย บัว เญย เตีย เหธา เม่ย บัว เญย ฮมวั้ง ต่อย ต้าย เยีย น้าย. เยีย อ๋อย ปุน อียิบ เต่ย-ปูง เก้า หลง เจี๋ย เญย กะน้าย นิ่น บัว. น้าย นอม เต่ย-ปูง ม่าย หาย หญู่ง หลง เจี๋ย นิ่น บัว ตุ๊ หญั่น อ๊ะ.’

19“เม่ย หย่า อ๋อย หฒุ บั๋ว นิ่น บัว, ‘เม่ย บัว อ๋อย หฒุ ฮนั้ง น้าย นอ โหฒว. ต้อ อียิบ เต่ย-ปูง เญย ง่ง เธีย มี่ง เปี้ยน เม่ย บัว เญย ฝุเจว๊ย เหธา เม่ย บัว เญย เอ๊า, หย่า อ๋อย หฒุ ต้อ เม่ย บัว เญย เตีย ต้าย.

20เม่ย บัว ไม้ ตู๋ง ค้อ-ฟิ เม่ย บัว เญย กะน้าย เหว่ย หฒุ อียิบ เต่ย-ปูง ม่าย เก้า หลง เจี๋ย เญย กะน้าย เซ เป๋น เม่ย บัว เญย.’”

21อิสะลาเอน เญย ตอน บัว ฯฒฯ เอย เจี๊ยน โหฒว. โยเซ้บ หย่า เอย เจี๊ยน ฟาโล ฮู่ง พ้าย เญย หว่า ปุน ง่ง เธีย นิ่น บัว, หย่า ปุน เจี๊ยน ด๊าม-เจ๊า เญย เปี้ยน ฝุย.

22นิ่น เญย ก๋อ บัว, นิ่น ปุน เหยียด เต้า เหยียด เหยี่ยม ลุย-โหว เหยี่ยน. มป่า เบนยามิน นิ่น ปุน อี จ้อย เธี้ยด ลู์ง ญ่าน เหธา ปยา เหยี่ยม ลุย-โหว.

23โยเซ้บ ฝูง เหฒียบ เต้า ล่อ ทอ เจี๊ยน อียิบ เต่ย-ปูง หลง เจี๋ย เญย กะน้าย มี่ง ปุน นิ่น เญย เตีย. แอ๋ง ฝูง เหฒียบ เต้า ล่อ เญ์ย ทอ เบย้า เหธา ฌั้ว เหธา ปุน นิ่น เญย เตีย เยียม ด๊าม-เจ๊า หญั่น เญย เปี้ยน ฝุย.

24โยเซ้บ ฯฒฯ ฝูง นิ่น เญย มั์ว-ต่อย ธ้วด เจ๊า หฑวน. อ๋อย มี่ง วั้ว หฒั่น นิ่น ก๊อง, “ด๊าม-เจ๊า เม่ย บัว ไม้ ตู๋ง ตะเฮ้า โอ๋!”

25วั้ว เต๋ย มั์ว-ต่อย ฯฒฯ เยียม อียิบ เต่ย-ปูง หฑวน เถา คานาอัน เต่ย-ปูง, นิ่น บัว เญย เตีย วั้ว.

26นิ่น บัว บั๋ว นิ่น บัว เญย เตีย, “อา เตีย อ้า! โยเซ้บ หธ่อ เยียม เญย แอ๋! อี้ หฒั่น นิ่น กุ๊น เหฑ่ง เหยียด นอม อียิบ เต่ย-ปูง.” ยาโค้บ โม่ว เม่ง โม่ว แปะ เญย, ไม้ เสียน นิ่น บัว เญย หว่า.

27นิ่น เญย ตอน บัว ก๊อง เหฑ่ง โยเซ้บ เญย หว่า ปุน นิ่น หมวัง. ยาโค้บ หย่า ปวัด โยเซ้บ ปุน ต้าย ฒิบ นิ่น มี่ง อียิบ วั้ว เต๋ย ง่ง เธีย, นิ่น เญย เฮญี้ยว ฯฒฯ ฟี้ง ต้าย อ๊ะ.

28อิสะลาเอน ก๊อง, “ปวั๊ง เฮญี้ยว อ๊ะ. เยีย เญย ตอน, โยเซ้บ, เยียม เญย. เยีย ไม้ แก้ง ไต่, เยีย อ๋อย มี่ง ปวัด เหยียด เหมว่ย นิ่น.”

← Chapter 44 Jump to: Chapter 46 →