Judges 13

Kamba (Mbivilia) 1956

← Chapter 12 Jump to: Chapter 14 →

1Na ana ma Isilaeli meeka ũla Yeova wonaa wĩ ũthũku ĩngĩ; na Yeova amanengane mokonĩ ma Avilisiti myaka mĩongo ĩna.

2Na kwaĩ mũndũ ũmwe wa ku Nzola, wa mũvĩa wa Andani, ũla wetawa syĩtwa yake Manoa; na mũka wake aĩ ngũngũ, na ndasyaaa.

3Na mũlaĩka wa Yeova amumĩlĩla ũ mũndũ mũka, na amwĩa, Sisya yu, wĩ ngũngũ, na ndũsyaaa; ĩndĩ ũkaitava, na ũkĩsyaa mwana.

4Kwondũ wa ũu ĩndĩ ĩsũvĩe, nĩngũkwĩsũva, na ndũkaanyw’e mbinyu o na kĩla kĩtoonasya, na ndũkaaye kĩndũ kĩvuku o na kĩva;

5nũndũ, sisya, ũkaitava, na ũkĩsyaa mwana; na wenzi ndũkaavike mũtwe wake; nũndũ kana kau kakeethĩwa Mũnasili kwa Ngai kuma ke ĩvunĩ: nake akambĩlĩlya kũtangĩĩa Isilaeli kuma mokonĩ ma Avilisiti.

6Na ĩndĩ ũ mũndũ mũka ooka na atavya mũũme, akĩmwĩa, Mũndũ wa Ngai ooka vala nĩĩĩ, na ũthyũ wake wĩĩilyĩ ta ũthyũ wa mũlaĩka wa Ngai, wa kũtĩsya mũno; na ndinamũkũlya kũla wauma, o nake ndanandavya syĩtwa yake:

7ĩndĩ ambĩa, Sisya, ũkaitava, na ũkasyaa mwana; na yu ĩndĩ ndũkaanyw’e mbinyu o na kĩla kĩtoonasya, na ndũkaaye kĩndũ kĩvuku o na kĩva; nũndũ kana kakeethĩwa Mũnasili kwa Ngai kuma ke ĩvunĩ kũvika mũthenya wa kĩkw’ũ kyake.

8Nĩvo ĩndĩ Manoa wamũvoyie Yeova, na amwĩa, Ame Yeova, nĩngũũvoya, eka mũndũ wa Ngai ũla ũnatũmĩte oke ĩngĩ kwitũ, na aitũmanyĩsya ũndũ twĩĩkana na kana kala kesyawa.

9Na Ngai eethukĩĩsya wasya wa Manoa; na ũla mũlaĩka wa Ngai amũkĩa ũla mũndũ mũka ĩngĩ ailyĩ mũũndanĩ: ĩndĩ Manoa mũũme wake ndaĩ nake.

10Na ũ mũndũ mũka eekalaata, na asemba, na atavya mũũme, na amwĩa, Sisya, ũla mũndũ nĩwanumĩlĩla, o ũla ũnambũkĩe mũthenya ũla ũngĩ.

11Na Manoa ookĩla, na amũatĩĩa mũka, na avika vala ve ũla mũndũ, na amũkũlya, Nue ũnaneenie na mũndũ mũka ũũ? Nake asũngĩa, Ninyie.

12Na Manoa asya, Ndeto syaku yu nĩsyĩthĩwe: mwĩkalĩle wa kana ũkeethĩwa ũilyĩ ata, na tũkeekana nako ata?

13Na mũlaĩka wa Yeova amwĩa Manoa, Maũndũ onthe ala nĩnatavisye mũndũ mũka, nĩesũvĩe.

14Ndakaaye kĩndũ o na kĩva kyumĩte mũsavivũnĩ, o na ndakaanyw’e mbinyu kana kĩla kĩtoonasya, o na ndakaaye kĩndũ kĩvuku o na kĩva; onthe ala nĩnamwĩaĩe nasũvĩe.

15Na Manoa eea ũla mũlaĩka wa Yeova, Nĩngũkwĩsũva, eka tũkwĩkalangye, tũkũaĩe katena ka mbũi.

16Na mũlaĩka wa Yeova eea Manoa, O na mwambĩkalangya, ndiya lĩu waku; na ethĩwa nũkũmban’ya nthembo ya ũvĩvw’a, no mũvaka ũthembee Yeova. Nũndũ Manoa ndeesĩ kana nĩ mũlaĩka wa Yeova.

17Na Manoa akũlya mũlaĩka wa Yeova, Wĩtawa ata, nĩ kana, ndeto syaku syeanĩa, tũtonye kũkũtaĩa?

18Na mũlaĩka wa Yeova amwĩa, Wĩngũlya syĩtwa yakwa nĩkĩ, nayo nĩ ya ũseng’ya?

19Na ĩndĩ Manoa oosanĩsya katena ka mbũi na nthembo ya mũtu, na amũthembea Yeova ĩvianĩ ĩũlũ: na mũlaĩka eeka wa ũseng’ya; na Manoa na mũka masyaĩĩsya.

20Nũndũ kweethĩiwe, yĩla ũlĩlĩnzĩ wa mwaki wambataa ĩtunĩ kuma kĩthembeonĩ, mũlaĩka wa Yeova nĩwambatie ũlĩlĩnzĩnĩ wa kĩthembeo: na Manoa na mũka masyaĩĩsya; na mavalũka nthĩ na mothyũ moo.

21Ĩndĩ ũla mũlaĩka wa Yeova ndanaumĩlĩla Manoa kana mũka ĩngĩ. Nĩvo ĩndĩ Manoa wamanyie kana eĩ mũlaĩka wa Yeova.

22Na Manoa eea mũka, Nĩtũũkw’a, vate ndĩi, nũndũ nĩtwamwona Ngai.

23Ĩndĩ mũka amwĩa, Kethĩwa Yeova nũkwendaa kũtũaa, ndeĩ osa nthembo ya kũvĩvw’a na nthembo ya mũtu mokonĩ maitũ, o na ndeĩ atwon’ya maũndũ asu onthe, o na ndeĩ atavan’ya maũndũ ta asu ĩvinda yĩĩ.

24Na ũ mũndũ mũka asyaa mwana, na amwĩta syĩtwa yake Samusoni: na kana keana, na Yeova akaathima.

25Na Veva wa Yeova ambĩlĩlya kũmwĩkĩthya maũndũ ku Maane‐ndani, katĩ wa Nzola na Esitaoli.

← Chapter 12 Jump to: Chapter 14 →