Judges 7

Kamba (Mbivilia) 1956

← Chapter 6 Jump to: Chapter 8 →

1Nĩvo ĩndĩ Yelumbaali, ũla Ngiteoni, na andũ onthe ala maĩ nake, mookĩlile kĩoko tene, na mamba maeema vakuvĩ na mbuluti ya Alote: na mwako wa maeema wa Mitiani waĩ ngalĩ ya ĩũlũ woo mwandanĩ, vakuvĩ na kĩĩma kya Mole.

2Na Yeova amwĩa Ngiteoni, Andũ ala wĩ namo nĩ aingĩ mũno ũndũ ndatonya kũmanengane Amitiani mokonĩ moo, Isilaeli matikese kwĩkathĩĩa ĩũlũ wakwa, makyasya, Kw’oko kwakwa mwene nĩkũndangĩĩĩte.

3Yu ĩndĩ tavan’ya matũnĩ ma andũ, ũkĩmea, O ũla wĩ na w’ĩa na kũtetema, nasyoke aume kĩĩmanĩ kya Ngileati. Na kwasyoka ma andũ ngili mĩongo ĩlĩ na ilĩ; na kwatiala ngili ĩkũmi.

4Na Yeova amwĩa Ngiteoni, Andũ no aingĩ o na yu; matheesye vala ve kĩw’ũ, na nĩngũũtatĩa mo vo: na kũkeethĩwa, ũla nĩkũtavya ũndũ wake atĩĩ, Ũũ nũkũthi naku, o ũsu nathi naku; na o ũla nĩkũtavya ũndũ wake atĩĩ, Ũũ ndethi naku, o ũsu ndakathi.

5Na ĩndĩ atheesya andũ vala ve kĩw’ũ: na Yeova amwĩa Ngiteoni, Kĩla ũmwe ũla wĩlambalambya kĩw’ũ na ũĩmĩ, o tondũ ngitĩ ĩlambalambasya, ũsu wĩmũveta ũtee e weka; no ta ũu, kĩla ũmwe wĩtulya ndu anyw’e.

6Na ũtalo wa ala malambalambilye, makĩtwaa kanyw’anĩ na kw’oko, maĩ andũ maana atatũ: ĩndĩ andũ ala angĩ onthe matulya ndu manyw’e kĩw’ũ.

7Na Yeova amwĩa Ngiteoni, Ngamũtangĩĩa na andũ maana atatũ ala malambalambya, na kũmanengane Amitiani kw’okonĩ kwaku; na andũ ala angĩ onthe kĩla mũndũ nĩenũke kwake.

8Na ĩndĩ andũ asu makua lĩu na masoo moo na moko moo; na amea andũ onthe ma Isilaeli kĩla mũndũ enũke ĩeemanĩ yake, ĩndĩ ekala na ala andũ maana atatũ: na mwako wa maeema wa Mitiani waĩ mwandanĩ ĩtheo wake.

9Na kweethĩwa ũtukũ o ũsu Yeova amwĩa, Ũkĩla, ũtheee mwakonĩ wa maeema; nũndũ nĩnĩũnenganĩte kw’okonĩ kwaku.

10Ĩndĩ ethĩwa nũũkĩa kũtheea, theea wĩ na Vula mũthũkũmi waku mwakonĩ wa maeema:

11na ũkeew’a ũndũ meũneena; na ĩtina wa ũu moko maku nĩmeũya vinya nĩ kana ũtheee mwakonĩ wa maeema. Na ĩndĩ atheea e na Vula mũthũkũmi wake, mavikĩa ala meekĩe mĩĩo ya kaũ me ũtee wa mwako wa maeema.

12Na Amitiani na Aamaleki na ana ma ngalĩ ya wumĩlonĩ wa syũa menyaĩtye mwandanĩ me aingĩ ta ngie; na ngamĩle syoo ityaĩ italĩka, o ta kĩthangathĩ kĩla kĩ ũtee wa ũkanga ũndũ wa kwingĩva.

13Na yĩla Ngiteoni wavikie vo, sisya, kwaĩ mũndũ watavasya mũtindan’ya wake ndoto; na asya; Sisya, nĩnĩotie ndoto; na, sisya, kamũtũ ka mbaale kavingilitĩla mwako wa maeema wa Mitiani na kavika ĩeemanĩ, na kayĩkũna mũvaka yavalũka, na kayĩkũluman’ya, mũvaka ĩeema yeenyasya nthĩ.

14Na mũtindan’ya wake amũsũngĩa amwĩa, Ũu ti ũndũ ũngĩ ate o ũvyũ wa Ngiteoni mwana wa Yoasi, mũndũ wa Isilaeli: Ngai nũnenganĩte Mitiani, na nguthu yonthe, kw’okonĩ kwake.

15Na kweethĩwa, yĩla Ngiteoni wewie ndoto ĩkĩtavanw’a, na ũalyũlo wayo, athaitha; na asyoka mwakonĩ wa maeema wa Isilaeli, na asya, Ũkĩlai; nũndũ Yeova nũnenganĩte nguthu ya Mitiani mokonĩ menyu.

16Na aaan’ya ala andũ maana atatũ nguthu itatũ, na amanenga onthe masoo mokonĩ moo, na itete nthei, syĩ na mũĩ nthĩnĩ wasyo.

17Na amea, Nzisyai, na mũkĩka o ũndũ ngwĩka: na, sisyai, navika ũtee wa mwako wa maeema, nĩkwĩthĩwe o ũndũ nĩĩka, mwĩĩka o w’o.

18Yĩla nĩvuva soo, nyie na onthe ala nĩ namo, nĩvo ĩndĩ nenyu mwĩvuva masoo ngalĩ syonthe sya mwako wa maeema, na mũkyasya, Nĩ kwondũ wa Yeova na Ngiteoni.

19Na ĩndĩ Ngiteoni, na ala andũ ĩana maĩ nake, mavika ũtee wa mwako wa maeema ũsyaĩĩsyo wa katĩ ũkyambĩlĩla, o asyaĩĩsya makyuman’ya: na mavuva masoo, na mooaa ĩtete ila syaĩ mokonĩ moo.

20Na nguthu isu itatũ syavuva masoo, na syooaa itete, na syakwata mũĩ na moko moo ma aka, na masoo na moko moo ma aũme nĩ kana mavuve: na maneena na wasya mũnene, Ũvyũ wa Yeova na wa Ngiteoni.

21Na maũngama kĩla mũndũ vandũ vake melingĩle mwako wa maeema; na nguthu yonthe yasemba; na mausya ngemi, na mamalũngya.

22Na mavuva ala masoo maana atatũ, na Yeova atuma ũvyũ wa kĩla ũmwe welekela mũtindan’ya wake, na nguthu yonthe; na nguthu yakũka kũvika Mbethi‐sita yelekele Nzelela, o kũvika mũvakanĩ wa Aveli‐meola, vakuvĩ na Tavathu.

23Na andũ ma Isilaeli moombanĩte vamwe kuma Navitali, na kuma Aseli, na kuma Manase yonthe, na maatĩĩa Mitiani.

24Na Ngiteoni atũma atũmwa nthĩ yonthe yĩ iĩma ya Evalaimu, akyasya, Theeai mũkite na Mitiani, na mũkyamba kũkwata iw’ũ kwĩ mo, o kũvika Mbethi‐mbala, o Yolotani. Na ĩndĩ andũ onthe ma Evalaimu moombanite vamwe, na makwata iw’ũ kũvika Mbethi‐mbala, o Yolotani.

25Na makwata ala anene elĩ me mbee ũsumbĩnĩ ma Mitiani, Olevi na Nzeevu; na mamũaĩa Olevi ĩvianĩ ya Olevi, na Nzeevu mamũaĩa kĩangĩonĩ kya nzavivũ kya Nzeevu, na maatĩĩa Mitiani: na mamũetee Ngiteoni mĩtwe ya Olevi na Nzeevu mũingo wa Yolotani.

← Chapter 6 Jump to: Chapter 8 →