Revelation 1

Kamba (Mbivilia) 1956

Jump to: Chapter 2 →

1Ũvuan’yo wa Yesũ Klĩsto, ũla Ngai wamũnengie nĩ kana asyon’ye ngombo syake maũndũ ala matatĩa kwĩkĩka mĩtũkĩ; na atũma mũlaĩka wake amyon’ye ngombo yake Yoana;

2ũla wakũsĩĩe ndeto ya Ngai, na ũkũsĩ wa Yesũ Klĩsto, o na maũndũ onthe ala wonie.

3Nĩ mũathime ũla ũsomaa, na ala mew’aa ndeto sya wathani ũũ, na kũsũvĩa maũndũ ala maandĩkĩtwe vo: nũndũ ĩvinda nĩ ĩthengeeu.

4Yoana, valũa wakwa ũmavikĩe makanisa asu mũonza ale me nthĩ ya Asia: Mumo nĩwĩthĩwe nenyu na mũuo, kuma kwa ũla wĩ vo na ũla waĩ vo na ũla ũkoka; na kuma kwa ala Maveva mũonza ala me mbee wa kĩvĩla kya ũsumbĩ kyake;

5na kuma kwa Yesũ Klĩsto, ngũsĩ yĩ kĩthito, na mũsyawa wa mbee wa akw’ũ, na mũnene wa asumbĩ ma nthĩ. Kwa ũsu ũtwendete, na kũtũthasya na nthakame yake tume naĩnĩ sitũ;

6na atũtwie ũsumbĩ, twĩthĩwe athembi ma Ngai, Ĩthe wake; ndaĩa na ũtonyi nĩ syake kũvika tene na tene. Ameni.

7Sisyai, nĩwũkĩte na mathweo; na kĩla itho yĩkamwona, na ala mamũtonyie; na mbaĩ syonthe sya nthĩ ikaĩa kwondũ wake. Ĩĩ, Ameni.

8Nyie nĩ Aliva na Omeka, mwambĩlĩlyo na mũminũkĩlyo, easya ũu Mwĩaĩi Ngai, ũla wĩ vo na ũla waĩ vo na ũla ũkoka, Mwene Vinya W’onthe.

9Nyie Yoana, mwana‐a‐ĩthe wenyu na mwosi ũmwe nenyu wa mathĩna na ũsumbĩ na wũmĩĩsyo ala me nthĩnĩ wa Yesũ, naĩ kĩthamanĩ kĩtawa Vatimo, nũndũ wa ndeto ya Ngai na ũkũsĩ wa Yesũ.

10Naĩ nthĩnĩ wa Veva mũthenya wa Mwĩaĩi, na neew’a wasya mũnene ĩtina wakwa, ta wa soo,

11ũkyasya, Ũla ũkwona, andĩka ĩvukunĩ noĩmatwaĩa ala makanisa mũonza ala me nthĩ ya Asia: Eveso, na Simulina, na Velikamo, na Thiatila, na Salite, na Vilatelivia, na Laotisia.

12Na neethyũũa none wasya ũla waneena nakwa. Na neethyũũa noona syĩndũ mũonza sya thaavu ila syĩkĩawa mataa;

13na katĩ wa syĩndũ isu noona ũmwe ũilyĩ mwana wa mũndũ, ekĩĩte ngũa ĩvikĩte maũũnĩ make, na eevotoele ndavũ ya thaavu nondonĩ.

14Na mũtwe wake na nzw’ĩĩ syake syaĩ nzaũ ta w’ĩa mweũ wa ilondu, nzaũ ta ĩa; na metho make mailyĩ ũmũĩ wa mwaki;

15na nyaĩĩ syake syailyĩ ũthuku mũkute mũno ta ũtheew’e ikonĩ ĩnene yĩ mwaki; na wasya wake waĩ ta wasya wa iw’ũ nyingĩ.

16Nake aĩ na ndata mũonza kw’okonĩ kwake kwa aũme: na ũvyũ mũĩ ngalĩ syelĩ wauma kanyw’anĩ wake: na ũthyũ wake wailyĩ syũa yĩkĩtisa na vinya wayo.

17Na namwona, navalũka maũũnĩ make ta ũmwe mũkw’ũ. Nake ambilĩĩla kw’oko kwake kwa aũme, akyasya, Ndũkakĩe; ninyie mwambĩlĩlyo na mũminũkĩlyo,

18na nĩ Ũla wĩ thayũ; nakwa naĩ mũkw’ũ, na sisya, nĩ thayũ kũvika tene na tene, na nĩ na mbungũo sya kĩkw’ũ na sya vala maveva ma akw’ũ mekalaa.

19Andĩka ĩndĩ maũndũ ala wonie, na ala me vo, na maũndũ ala makekĩka ĩtina;

20na nzama ya ndata mũonza ila wonie kw’okonĩ kwakwa kwa aũme, na syĩndũ mũonza sya thaavu syĩkĩawa mataa. Ndata isu mũonza nĩ alaĩka ma ala makanisa mũonza: na ila syĩndũ mũonza nĩ makanisa mũonza.

Jump to: Chapter 2 →