Revelation 4

Kamba (Mbivilia) 1956

← Chapter 3 Jump to: Chapter 5 →

1Ĩtina wa maũndũ aa nĩnoonie, na sisya, mũomo ũvingũkĩte ĩtunĩ, na wasya wa mbee ũla neewie, ta wasya wa soo ũineena nakwa, ũmwe akyasya, Ambata kũũ, nakwa ngakwon’ya maũndũ ala mate ndĩi kwĩkĩka ĩtina.

2Na oyu naĩ nthĩnĩ wa Veva: na sisya, kwaĩ kĩvĩla kya ũsumbĩ kiĩtwe ĩtunĩ, na ũmwe ekalile kĩla kĩvĩla;

3na ũla wakĩkalĩle, ũkĩmũsisya ailyĩ kavila ka yasivi na ka salitũ; na kwaĩ ũtaathi ũthyũlũlũkĩte kĩvĩla kyu, ũisisya ũilyĩ kavila ka sumalatai.

4Na kwaĩ ivĩla sya ũsumbĩ mĩongo ĩlĩ na inya ithyũlũlũkĩte kĩla kĩvĩla kya ũsumbĩ: na ivĩlanĩ isu nĩnoonie atumĩa mĩongo ĩlĩ na ana masyĩkalĩle, mekĩe ngũa nzaũ; na mĩtwenĩ yoo kwaĩ ngovia sya ũsumbĩ sya thaavu.

5Na kĩvĩlanĩ kyu kwauma motisi na mawasya na itundumo. Na kwaĩ mataa mũonza ma mwaki makanĩte mbee wa kĩvĩla kyu kya ũsumbĩ, nao nĩ ala Maveva mũonza ma Ngai;

6na mbee wa kĩvĩla, kwaĩ kĩndũ kĩilyĩ ũkanga wa kĩsisyo kĩtisu; na kĩvĩlanĩ kyu katĩ, na kũthyũlũlũka kĩvĩla, kwaĩ syũmbe inya syĩ thayũ syusĩe metho mbee na ĩtina.

7Na kyũmbe kya mbee kyailyĩ mũnyambũ, na kya kelĩ ta kasaũ, na kya katatũ kyaĩ na ũthyũ ta wa mũndũ, na kĩla kya kana kyailyĩ ndiũ ĩũlũkĩte.

8Na syũmbe isu inya syĩ thayũ, kĩla kĩmwe kyethĩwa na nthwau thanthatũ, syusũĩte metho ndee syonthe na nthĩnĩ; nasyo itithũmũaa mũthenya na ũtukũ, ikyasya, Mũtheu, mũtheu, mũtheu, nĩ Mwĩaĩi Ngai, Mwene Vinya W’onthe, ũla waĩ vo, na ũla wĩ vo, na ũla wĩũka.

9Na yĩla ila syũmbe syĩ thayũ syĩmũnenga ndaĩa na nguma na mũvea ũla wĩkalaa kĩvĩlanĩ kya ũsumbĩ, ũla wĩ thayũ kũvika tene na tene,

10ala atũmĩa mĩongo ĩlĩ na ana makavalũka mbee wa ũla wĩkalĩte kĩvĩlanĩ kya ũsumbĩ, na makamũthaitha ũla wĩ thayũ kũvika tene na tene, na makekya ngovia syoo sya ũsumbĩ mbee wa kĩvĩla kya ũsumbĩ, makyasya,

11Nĩwaĩle we, Mwĩaĩi waitũ na Ngai waitũ, kwosa ndaĩa na nguma na vinya: nĩkwĩthĩwa nĩwoombie syĩndũ syonthe, na kwondũ wa kwenda kwaku syaĩ kw’o, na ĩngĩ syoombwa.

← Chapter 3 Jump to: Chapter 5 →