Revelation 10

Kamba (Mbivilia) 1956

← Chapter 9 Jump to: Chapter 11 →

1Na noona mũlaĩka ũngĩ wĩ na vinya aitheea kuma ĩtunĩ, evw’ĩkĩte ĩthweo; na ũtaathi waĩ mũtwenĩ wake, na ũthyũ wake wailyĩ syũa, na nyaĩĩ syake syailyĩ ituĩ sya mwaki;

2na kw’okonĩ kwake aĩ na kavuku kanini kavuan’ye: nake akinya na kũũ kwake kwa aũme ũkanganĩ, na kũla kwa aka akinya nthĩ;

3na akũthũka, o ũndũ mũnyambũ ũlumaa: na akũthũka, itundumo mũonza syaumya mawasya masyo.

4Na itundumo mũonza syaumya mawasya masyo, nakilĩlye kũandĩka: na neew’a wasya ũkyuma ĩtunĩ ũkyasya, Siĩla maũndũ asu maneenwa nĩ itundumo mũonza, na ndũkamaandĩke.

5Na mũlaĩka ũla noonie aũngeme ũkanganĩ na nthĩ ookĩlya kw’oko kwake kwa aũme elekelye ĩtunĩ,

6na eevĩta na ũla wĩ thayũ kũvika tene na tene, ũla wombie ĩtu na syĩndũ ila syĩ vo, na nthĩ na syĩndũ ila syĩ vo, na ũkanga na syĩndũ ila syĩ vo, kana kũikethĩwa kweteela ĩngĩ:

7ĩndĩ mĩthenya ya wasya wa mũlaĩka ũsu wa mũonza, o yĩla wĩvuva soo, nĩvo nzama ya Ngai ĩkeanĩw’a, kwĩanana na ũvoo mũseo ũla watavisye ngombo syake athani.

8Na wasya ũla neewie kuma ĩtunĩ, neew’a ũineena nakwa ĩngĩ, ũkyasya, Enda, wose ĩvuku yĩla ĩvuan’ye kw’okonĩ kwa mũlaĩka ũla ũũngeme ũkanganĩ na nthĩ.

9Nakwa naendie kwa mũlaĩka, namwĩa nanenge kala kavuku. Na ambĩa, Kose, ũkaye; na kakeekĩa ĩvu yaku ũũ, ĩndĩ kanyw’anĩ waku kakeethĩwa ke mũyo ta ũkĩ wa nzũkĩ.

10Na noosa kala kavuku kanini kw’okonĩ kwa mũlaĩka ũsu, nakaya; na kanyw’anĩ wakwa kaĩ mũyo ta ũkĩ wa nzũkĩ: na nakaya, ĩvu yakwa yeekĩwa ũũ.

11Nao mambĩa, Mũvaka wathane ĩngĩ ũndũ wa ngo nyingĩ sya andũ na mbaĩ na ithyomo na asumbĩ.

← Chapter 9 Jump to: Chapter 11 →