Revelation 19

Kamba (Mbivilia) 1956

← Chapter 18 Jump to: Chapter 20 →

1Ĩtina wa maũndũ asu neew’a wasya mũnene wa nguthu nene ĩtunĩ, ũiasya, Aleluya; Ũtangĩĩo, na ndaĩa, na vinya, nĩ sya Ngai waitũ:

2nũndũ motw’ĩo make nĩ ma w’o na nĩ malũngalu; nũndũ nũsilĩle yĩla ĩlwaya ĩnene, yĩla yathũkisye nthĩ na ũlaalai wayo, nake nĩwaĩvanĩsye nthakame ya ngombo syake kw’okonĩ kwayo.

3Na masya ĩvinda ya kelĩ, Aleluya. Na syũki yayo yambataa kũvika tene na tene.

4Na ala atumĩa mĩongo ĩlĩ na ana na ila syũmbe inya syĩ thayũ mavalũka nthĩ na mamũthaitha Ngai ũla wĩkalaa kĩvĩlanĩ kya ũsumbĩ, maiasya, Ameni: Aleluya.

5Na wasya wauma kĩvĩlanĩ kya ũsumbĩ, ũiasya, Mũkumyei Ngaĩ waitũ, inyw’onthe ngombo syake, inyw’ĩ ala mũmũkĩaa, anini na anene.

6Na neew’a ta wasya wa nguthu nene, na ta wasya wa iw’ũ nyingĩ, na ta wasya wa itundumo ila syĩ vinya mũno, ũiasya, Aleluya: nĩkwĩthĩwa Mwĩaĩi Ngai waitũ, Mwene Vinya W’onthe, nũsumbĩkĩte.

7Tũtanei na kwĩw’a mũyo mũno, na tũimũnenga we ndaĩa: nĩkwĩthĩwa mũtwaano wa kala Katena nĩ mũviku, na mũka wake nĩwĩseũvĩtye.

8Nake anengwa kwĩkĩa ngũa ya katane nzeo, ndisu na ntheu: nũndũ ngũa ĩsu ya katane nzeo nĩ meko malũngalu ma atheu.

9Na ambĩa, Andĩka, Nĩ aathime ala metĩtwe mbokanĩ ya mũtwaano ya kala Katena. Na ambĩa, Ii nĩ ndeto sya w’o sya Ngai.

10Nakwa navalũka maũũnĩ make nĩmũthaithe. Nake ambĩa, Sisya, ndũkeke ũu: nyie nĩ ngombo vamwe naku na vamwe na ana‐a‐ĩthe maku ala makwataa ũkũsĩ wa Yesũ; thaitha Ngai: nũndũ ũkũsĩ wa Yesũ nĩw’o veva wa wathani.

11Na noona ĩtu yĩvingũkĩte; na sisya, mbalasi nzaũ, na ũla ũmĩtũlĩte, eetawa Mũkĩthito na Mũw’o; na asilaa na ũkwatya kaũ na ũlũngalu.

12Na metho make nĩ ũmũĩ wa mwaki, na mũtwenĩ wake ve ngovia nyingĩ sya ũsumbĩ; nake e na syĩtwa yĩandĩkĩtwe, yĩla yĩtesĩkĩwe nĩ mũndũ o na wĩva ate o we mwene.

13Nake eevw’ĩkĩte ngũa ĩminzangĩw’e nthakame: na syĩtwa yake eetawa Ndeto ya Ngai.

14Na ita ila syĩ ĩtunĩ syamũatĩĩa itũlĩte mbalasi nzaũ, syĩvw’ĩkĩte katane nzeo, nzaũ na ntheu.

15Na ũvyũ mũĩ wauma kanyw’anĩ wake, nĩ kana akũne mbaĩ naw’o: na akaisumbĩka na ndata ya kĩaa: nake ekinyangĩa kĩangĩonĩ kya mbinyu ya wai wa ũthilĩku wa Ngai, Mwene Vinya W’onthe.

16Na ngũanĩ yake na nthũnũnĩ yake e na syĩtwa yĩandĩkĩtwe, MŨSUMBĨ WA ASUMBĨ NA MWĨAĨI WA EAĨI.

17Na noona mũlaĩka ũmwe aũngeme syũanĩ; na aneena na wasya mũnene, aitavya nyũnyi syonthe ila ilũlũkaa ĩtunĩ katĩ, Ũkai mũmbane vamwe mbokanĩ ĩla nene ya Ngai;

18nĩ kana mũye nyama sya asumbĩ, na nyama sya anene ma asikalĩ ngili, na nyama sya andũ ala me na vinya, na nyama sya mbalasi na sya ala masyĩkalĩlaa, na nyama sya andũ onthe, ala mate ngombo na ngombo, anini na anene.

19Na noona ĩla nyamũ, na asumbĩ ma nthĩ, na ita syoo, mombanĩte makwatye kaũ na ũla wĩkalĩle ĩla mbalasi, na ita syake.

20Na ĩla nyamũ yakwatwa, na vamwe nayo ũla mwathani wa ũvũngũ ũla wekie syama mbee wayo, na kwondũ wasyo wamakengie ala mosete ũvano wa ĩla nyamũ na ala mathaithie mũvw’anano wayo: me elĩ mekiw’e me thayũ ĩianĩ ya mwaki ũla wakanaa na mũvĩlĩtĩ:

21na ala matialile mooaiwe na ũvyũ wa ũla wekalĩle ĩla mbalasi, naw’o nĩ ũvyũ ũla waumie kanyw’anĩ wake: na nyũnyi syonthe syavũnw’a nĩ nyama syoo.

← Chapter 18 Jump to: Chapter 20 →