Revelation 15

Kamba (Mbivilia) 1956

← Chapter 14 Jump to: Chapter 16 →

1Na noona kyama kĩngĩ ĩtunĩ, kĩnene na kya ũseng’ya, alaĩka mũonza makuĩte mothĩn’yo mũonza, nao nĩ ma mũminũkĩlyo, nĩkwĩthĩwa nthĩnĩ wamo ũthilĩku wa Ngai nũkwĩanĩa.

2Na noona kĩndũ kĩilyĩ ũkanga wa kĩsisyo ũvulene na mwaki; na ala makĩlĩtye vinya na kwĩyumya vala ve ĩla nyamũ, na mũvw’anano wayo, na namba ya syĩtwa yayo, maũngeme ũtee wa ũkanga wa kĩsisyo, me na mbeve sya Ngai.

3Nao meina wathi wa Mose ngombo ya Ngai, na wathi wa kala Katena, makyasya, Mawĩa maku nĩ manene na ma ũseng’ya, Mwĩaĩi Ngai, Mwene Vinya W’onthe; moendelo maku nĩ malũngalu na ma w’o, we Mũsumbĩ wa tene tene.

4Nũũ ũtakakĩa, Mwĩaĩi, na kũtaĩa syĩtwa yaku? Nũndũ nue weka mũtheu; nĩkwĩthĩwa mbaĩ syonthe ikooka na kũthaitha mbee waku; nũndũ meko maku ma ũlũngalu nĩmonanĩtw’e.

5Na ĩtina wa maũndũ asu noona, na ĩkalũ ya ĩeema ya ũkũsĩ ĩtunĩ yavingũwa:

6na ala alaĩka mũonza ala me na mothĩn’yo mũonza mauma ĩkalũnĩ, mevw’ĩkĩte mavia me thooa mũnene, matheu na matisu, na meevotoele nondonĩ syoo ndavũ sya thaavu.

7Na kĩmwe kya ila syũmbe inya syĩ thayũ kyamanenga alaĩka asu mũonza mbakũli mũonza sya thaavu syusĩe ũthilĩku wa Ngai, ũla wĩ thayũ kũvika tene na tene.

8Na ĩkalũ yausũa syũki yumĩte ũtheunĩ mũtisu wa Ngai, na vinyanĩ wake; na vaiaĩ mũndũ waatonya kũvota ĩkalũnĩ mũvaka mothĩn’yo mũonza ma alaĩka asu mũonza mathela.

← Chapter 14 Jump to: Chapter 16 →