Revelation 12

Kamba (Mbivilia) 1956

← Chapter 11 Jump to: Chapter 13 →

1Na kwooneka kyama kĩnene ĩtunĩ; mũndũ mũka evw’ĩkĩte syũa, na mwei waĩ ungu wa nyaĩĩ syake, na mũtwenĩ wake kwaĩ ngovia ya ũsumbĩ yĩ ndata ĩkũmi na ilĩ;

2nake aĩ ĩvu: na akaya, akyaũnya nĩ woo wa ũsyaa.

3Na kwooneka kyama kĩngĩ ĩtunĩ; na sisya, mũkũnga mũnene mũtune wĩ na mĩtwe mũonza na mbya ĩkũmi, na mĩtweni yaw’o ngovia sya ũsumbĩ mũonza.

4Na kĩsithe kyaw’o kyakusya kĩlungu kya katatũ kya ndata sya ĩtunĩ, na kyasyĩkya nthĩ: na mũkũnga ũsu mũnene waũngama mbee wa mũndũ mũka ũsu wakilĩlye ũsyaa, nĩ kana asyaa, ũtonye kũmelya kana kake.

5Nake asyaa mwana, mũndũ mũũme, ũla ũkasumbĩka mbaĩ syonthe na ndata ya kĩaa: na kana kake kavulw’a kũvika kwa Ngai, na kĩvĩlanĩ kyake kya ũsumbĩ.

6Na mũndũ mũka akĩa na athi weũnĩ, vandũ vala waseũvĩw’e nĩ Ngai, nĩ kana mamũĩthĩsye vo mĩthenya ngili na maana elĩ na mĩongo thanthatũ.

7Na kwaĩ kaũ ĩtunĩ: Mikaeli na alaĩka make maithi kũkita na ũla mũkũnga mũnene; na mũkũnga ũsu na alaĩka maw’o mokita;

8nao maiaakĩlya vinya, o na vaiaaoneka vandũ voo ĩtunĩ ĩngĩ.

9Na mũkũnga ũsu mũnene wekw’a nthĩ, naw’o nĩ nzoka ĩla ngũũ, yĩtawa Ndevili, na ĩngĩ Satani, mũkengani wa nthĩ yonthe; ekw’a nthĩ, na alaĩka make mekw’a nthĩ vamwe nake.

10Na neew’a wasya mũnene ĩtunĩ, ũkyasya, Yu ve ũtangĩĩo, na vinya, na ũsumbĩ wa Ngai waitũ, na ũkũmũ wa Klĩsto wake: nũndũ mũvinganĩsya wa ana‐a‐asa maitũ nĩwekw’a nthĩ, ũla ũmavinganĩasya mbee wa Ngai waitũ mũthenya na ũtukũ.

11Nao mamũkĩlya vinya nũndũ wa nthakame ya kala Katena ka ĩlondu na nũndũ wa ndeto ya ũkũsĩ woo; na matyaamenda mathayũ moo o na kũvika kĩkw’ũ.

12Kwondũ wa ũu tanai, inyw’ĩ matu, na inyw’ĩ ala mũtwĩe nthĩnĩ wamo. Woo nĩ wanthĩ na wa ũkanga: nũndũ ndevili nĩwamũtheeea inyw’ĩ, e na ũthilĩku mũnene, akĩmanya kana e na kavinda o kanini.

13Na ũla mũkũnga mũnene woona kana nĩwekw’a nthĩ, wathĩnisye mũndũ mũka ũla wasyaie ũla mwana mũũme.

14Na mũndũ mũka anengwa nthwau ilĩ sya ndiũ ĩla nene, nĩ kana aũlũke avike kwake weũnĩ, vala ũĩthĩaw’a ĩvinda, na mavinda, na nyunzu, ya ĩvinda, aume mbee wa nzoka ĩsu.

15Na ĩla nzoka nene yaumya kĩw’ũ ta ũsĩ kanyw’anĩ wayo yaatĩĩsya mũndũ mũka, nĩ kana atwawe nĩ ũsĩ.

16Na nthĩ yamũtetheesya mũndũ mũka, na nthĩ yaathamya kanyw’a wayo, na yamelya ũsĩ ũla mũkũnga mũnene waumya kanyw’anĩ waw’o.

17Na ũla mũkũnga mũnene wamũthatĩa mũndũ mũka mũno, na wathi wũkite na ũtialo wa ũsyao wake, ũla ũkwataa mĩao ya Ngai, na kũlũmya ũkũsĩ wa Yesũ: naw’o waũngama kĩthangathĩnĩ kya ũkanga.

← Chapter 11 Jump to: Chapter 13 →