Revelation 13

Kamba (Mbivilia) 1956

← Chapter 12 Jump to: Chapter 14 →

1Na noona nyamũ ĩkyuma ũkanganĩ, ĩ na mbya ĩkũmi na mĩtwe mũonza na mbyanĩ syayo kwaĩ ngovia sya ũsumbĩ ĩkũmi, na mĩtwenĩ yayo masyĩtwa ma kuũmana.

2Na nyamũ ĩla noonie yailyĩ ngo, na maũũ mayo maĩ ta ma nduva, na kanyw’a wayo waĩ ta kanyw’a wa mũnyambũ: na ũla mũkũnga mũnene wamĩnenga vinya waw’o, na kĩvĩla kya ũsumbĩ kyaw’o, na ũkũmũ mũnene.

3Na noona mũtwe ũmwe wayo ta ũkũnĩtwe kũvika kĩkw’ũ; na ĩkũnwa yayo ya kĩkw’ũ yavow’a: na nthĩ yonthe yaseng’a ĩatĩĩe ĩla nyamũ;

4na mathaitha ũla mũkũnga mũnene, nũndũ nũmĩnengete ĩla nyamũ ũkũmũ waw’o; na mamĩthaitha ĩla nyamũ, makyasya, Nũũ ũla ũvw’anene na nyamũ ĩno? Na nũũ ũla ũtonya kũkita nayo?

5Nayo yanengwa kanyw’a wa ũneena maũndũ manene na kũumana; na yanengwa ũkũmũ wa kwĩka maũndũ mayo myei mĩongo ĩna na ĩlĩ.

6Na yaathamya kanyw’a wayo ĩmũume Ngai, kũyĩuma syĩtwa yake, na ĩeema yake, o na ala matwĩe ĩtunĩ.

7Nayo yanengwa kũkita na ala atheu, na kũmakĩlya vinya: nayo yanengwa ũkũmũ ĩũlũ wa kĩla mũthemba wa andũ na ũko wa andũ na kĩthyomo na mbaĩ.

8Na onthe ala matwĩe nthĩ makamĩthaitha, kĩla mũndũ ũla syĩtwa yake yĩtaandĩkwa ĩvukunĩ ya thayũ ya Katena ka ĩlondu kooaiwe kuma mwambĩlĩlyo wa nthĩ.

9Ethĩwa mũndũ e na kũtũ, nĩew’e.

10Ethĩwa mũndũ o na wĩva akatava, akatavwa: ethĩwa mũndũ o na wĩva akooaana na ũvyũ, mũvaka we oawe na ũvyũ. Vaa nĩvo ve wũmĩĩsyo na mũĩkĩĩo wa ala atheu.

11Na noona nyamũ ĩngĩ ĩkyuma nthĩnĩ wa nthĩ; nayo yaĩ na mbya ilĩ iilyĩ sya katena ka ĩlondu, na yaneena ta mũkũnga.

12Nayo yĩkaa na ũkũmũ w’onthe wa ĩla nyamũ ya mbee ĩsyaĩtye. Na ĩtumaa nthĩ na ala matwĩe ĩũlũ wayo mathaitha nyamũ ĩla ya mbee, ĩla yavoiw’e ĩkũnwa yayo ya kĩkw’ũ.

13Nayo yeeka syama nene, o na kũtuma mwaki wuma ĩtunĩ ũkavika nthĩ, andũ mene.

14Na yamakenga ala matwĩe nthĩ nũndũ wa syama ĩnengetwe kwĩka o nyamũ ĩsu yene; ĩkĩmatavya ala matwĩe nthĩ, kana maseũvye mũvw’anano wa ĩla nyamũ, ĩla ĩ na ĩkũnwa ya ũvyũ na yavoa.

15Na yanengwa kwĩkĩa mũvw’anano ũsu wa nyamũ mĩthũmũ, nĩ kana mũvw’anano wa nyamũ ũneene, o na ũtume onthe ala matethaitha mũvw’anano ũsu wa nyamũ moawa.

16Na yatuma onthe, anini na anene, athwii na ngya, ala mate ngombo na ngombo, mekĩwa ũvano kw’okonĩ kwa aũme kwoo, kana itulyanĩ syoo;

17na nĩ kana mũndũ o na wĩva ndakatonye kũthooa kana kũthoosya, ate ũla wĩ na ũvano ũsu, naw’o nĩ syĩtwa ya nyamũ kana namba ya syĩtwa yayo.

18Vaa nĩvo ve ũĩ. Ũla wĩ na ũmanyi, natale namba ya nyamũ ĩsu; nũndũ nĩ namba ya mũndũ: na namba yake nĩ Maana thanthatũ na mĩongo thanthatũ na thanthatũ.

← Chapter 12 Jump to: Chapter 14 →