Revelation 21

Kamba (Mbivilia) 1956

← Chapter 20 Jump to: Chapter 22 →

1Na noona ĩtu yeũ na nthĩ nzaũ: nĩkwĩthĩwa ĩtu ya mbee na nthĩ ya mbee nĩ mbĩtu; na ũkanga ndwĩ vo ĩngĩ.

2Na noona ũla mũsyĩ mũtheu, Yelusaleme mweũ, ũitheea kuma ĩtunĩ kwa Ngai, ũmbanĩtw’e ta mũtwawa ũseũvĩw’e mũũme.

3Na neew’a wasya mũnene kuma kĩvĩlanĩ kya ũsumbĩ, ũiasya, Sisya, ĩeema ya Ngai yĩ vamwe na andũ, nake akatũa vamwe nao, namo makeethĩwa andũ make, na Ngai mwene akeethĩwa vamwe nao, Ngai woo:

4na akavyaĩa methoi onthe methonĩ moo; na kĩkw’ũ kĩikethĩwa vo ĩngĩ; o na kũikethĩwa ĩngĩ kũmeta, kana kũĩa, kana woo: maũndũ ma mbee nĩ mavĩtu.

5Na ũla wĩkalĩte kĩvĩlanĩ kya ũsumbĩ asya, Sisya, nĩngũtw’a maũndũ onthe meũ. Na asya, Andĩka: nĩkwĩthĩwa ndeto ii nĩ sya kĩthito na nĩ sya w’o.

6Na ambĩa, Nĩ kwĩke. Nyie nĩ Aliva na Omeka, mwambĩlĩyo na mũminũkĩlyo. Ngamũnenga ũla wĩ na waũni manzĩ ma nthongo ya manzĩ ma thayũ mana.

7Ũla ũkĩlasya akatiĩwa maũndũ asu; nakwa ngeethĩwa Ngai wake, nake akeethĩwa mwana wakwa.

8Ĩndĩ ala makĩaa, na ala matetĩkĩlaa, na ala mathatasya, na oaani, na ilaalai, na aoi, na athaithi ma mĩvw’anano, na onthe ala maneenaa ũvũngũ, kĩanda kyoo kĩkeethĩwa ĩianĩ yĩla yakanaa mwaki na mũvĩlĩtĩ; nayo nĩa kĩkw’ũ kya kelĩ.

9Na kwooka ũmwe wa alaĩka asu mũonza ala maĩ na mbakũli mũonza, ala makuĩte mothĩn’yo mũonza ma mũminũkĩlyo; na aneena nakwa, aiasya, Ũka vaa, nĩngũkwon’ya mũtwawa, mũka wa kala Katena.

10Na angua nĩ Vevanĩ kũvika kĩĩmanĩ kĩnene na kĩtũlu, na ambon’ya mũsyĩ ũla mũtheu Yelusaleme, ũitheea kuma ĩtunĩ kwa Ngai,

11wĩ na ũtheu mũtisu wa Ngai: kyeni kyaw’o kyailyĩ kavila ka thooa mũnene, ta kavila ketawa yasivi, katheu ta kĩsisyo:

12wĩ na ũvai mũnene na mũtũlu; wĩ na mbingĩlo ĩkũmi na ilĩ, na mbingĩlonĩ alaĩka ĩkũmi na elĩ; na masyĩtwa maandĩkĩtwe mbingĩlonĩ, nao nĩ masyĩtwa ma mbaĩ ĩkũmi na ilĩ sya ana ma Isilaeli:

13ngalĩ ya wumĩlonĩ wa syũa kwaĩ mbingĩlo itatũ; na ngalĩ ya ĩũlũ mbingĩlo itatũ; na ngalĩ ya ĩtheo mbingĩlo itatũ; na ngalĩ ya ũthũĩlonĩ wa syũa mbingĩlo itatũ.

14Na ũvai wa mũsyĩ waĩ na myambĩlĩlyo ĩkũmi na ĩlĩ, na ĩũlũ wayo masyĩtwa ĩkũmi na elĩ ma ala atũmwa ĩkũmi na elĩ ma kala Katena.

15Na ũla waneenie nakwa aĩ na kĩthimi kya mũangi wa thaavu nĩ kana athime mũsyĩ, na mbingĩlo syaw’o, na ũvai waw’o.

16Na mũsyĩ ũsu wĩanene ngalĩ inya, ũasa waw’o wĩanene na ũthanthau waw’o: na athima mũsyĩ na mũangi ũsu, na eethĩa nĩ maĩli ngili ĩmwe na maana atano: ũasa na ũthanthau na ũtũlu waw’o nĩsyĩanene.

17Na athima ũvai waw’o, mĩkono ĩana na mĩongo ĩna na ĩna, kũthima kwa mũndũ, nakw’o nĩ kwa mũlaĩka.

18Na ũvai waw’o waakĩtwe na yasivi: na mũsyĩ waĩ wa thaavu mũtheu, ta kĩsisyo kĩtheu.

19Myambĩlĩlyo ya ũvai wa mũsyĩ yanakavĩtw’e na mĩthemba yonthe ya tũvila twĩ thooa mũnene. Mwambĩlĩlyo wa mbee waĩ wa yasivi; wa kelĩ, savili; wa katatũ, kasitoni; wa kana, sumalatĩ;

20wa katano, salitonyi; wa thanthatũ, salitũ; wa mũonza, savaliyati; wa nyanya, nzamalati ntheu; wa kenda, tovasi; wa ĩkũmi, kilisovilise; wa ĩkũmi na ũmwe, samawi; na wa ĩkũmi na ĩlĩ, amethusito.

21Na mbingĩlo ĩkũmi na ilĩ syaĩ sya malũlũ ĩkũmi na elĩ; kĩla mbingĩlo yaĩ ya lũlũ ũmwe: na nzĩa ya mũsyĩ yaĩ thaavu mũtheu, ta kĩsisyo kĩtheu.

22Na ndyaaona ĩkalũ nthĩnĩ waw’o: nĩkwĩthĩwa Mwĩaĩi Ngai Mwene Vinya W’onthe, na kala Katena, nĩo ĩkalũ yaw’o.

23Na mũsyĩ ũsu ndwĩ vata wa syũa, kana mwei, kũkena ĩũlũ waw’o: nũndũ ũtheu mũtisu wa Ngai ũwĩkĩaa kyeni, na taa waw’o nĩ kala Katena.

24Na mbaĩ ikaendaa na kyeni kyaw’o: na asumbĩ ma nthĩ makaete ndaĩa yoo nthĩnĩ waw’o.

25Na mbingĩlo syaw’o itikavingwa o na ĩndĩĩ mũthenya (nũndũ kũikethĩwa ũtukũ kw’o):

26na makaete ndaĩa na nguma sya mbaĩ nthĩnĩ waw’o:

27na nthĩnĩ waw’o vaikavota nongi kĩndũ kĩvuku, kana ũla wĩkaa ũthũku na ũvũngũ; ĩndĩ no ala maandĩkĩtwe ĩvukunĩ ya thayũ ya kala Katena.

← Chapter 20 Jump to: Chapter 22 →