Revelation 5

Kamba (Mbivilia) 1956

← Chapter 4 Jump to: Chapter 6 →

1Na nĩnoonie kw’okonĩ kwa aũme kwa ũla wekalĩte kĩvĩlanĩ kya ũsumbĩ ĩvuku yĩandĩkĩtwe nthĩnĩ na ngalĩ ya ĩũlũ, yĩsiĩlĩtwe vyũ na masiĩlo mũonza.

2Na noona mũlaĩka wĩ na vinya aitavan’ya na wasya mũnene, Nũũ ũla waĩle kũvuũa ĩvuku, na kũmbũa mosiĩlo mayo?

3Na vaiaĩ mũndũ ũmwe o na wĩva ĩtunĩ, kana nthĩ, kana ungu wa nthĩ, waĩ atonya kũvũua ĩvuku yĩu, kana kũyĩsisya.

4Nakwa naĩa mũno, nĩkwĩthĩwa kũaiaaoneka ũmwe waĩlĩte kũvuũa ĩvuku yĩu, kana kũyĩsisya:

5na ũmwe wa atumĩa ambĩa, Ndũkaĩe; sisya, Mũnyambũ ũla wa mbaĩ ya Yuta, Kĩtina kya Ndaviti, nũkĩlĩtye atonye kũvuũa yĩla ĩvuku na kumbũa mosiĩlo mũonza mayo.

6Na noona katĩ wa kĩvĩla kyu kya ũsumbĩ na ila syũmbe inya syĩ thayũ, na katĩ wa ala atumĩa, Katena ka ĩlondu kaũngeme, kailyĩ ta koaĩtwe, ke na mbya mũonza, na metho mũonza, nao nĩ ala Maveva mũonza ma Ngai, ala matũmĩtwe mathi nthĩ yonthe.

7Nake ooka, na oosa yĩla ĩvuku kw’okonĩ kwa aũme kwa ũla wekalĩte kĩvĩlanĩ kya ũsumbĩ.

8Na oosa yĩla ĩvuku, ila syũmbe inya syĩ thayũ na ala atumĩa mĩongo ĩlĩ na ana mavalũka mbee wa kala Katena, na kĩla ũmwe woo aĩ na mbeve, na mbakũli sya thaavu syusũĩte ũvani, naw’o nĩ mboya sya ala atheu.

9Nao meina wathi weũ, makyasya, Nĩwaĩle we kwosa yĩla ĩvuku, na kũmbũa mosiĩlo mayo: nĩkwĩthĩwa nĩwooaiwe, na kũmũthooea Ngai na nthakame yaku andũ ma kĩla mbaĩ, na kĩthyomo, na ũko, na mĩthemba,

10na wamatwie ũsumbĩ na athembi kwa Ngai waitũ; nao nĩmasumbĩkĩte nthĩ.

11Nakwa noona, na neew’a wasya wa alaĩka aingĩ ndee syonthe sya kĩvĩla kyu kya ũsumbĩ na sya ila syũmbe syĩ thayũ na sya ala atumĩa; na ũtalo wamo waĩ ngili ĩkũmi kũndũ ngili ĩkũmi, na ngili kũndũ ngili;

12makyasya na wasya mũnene, Katena kala kooaiwe nĩwaĩle kwosa vinya, na ũthwii, na ũĩ, na ũtonyi, na nguma, na ndaĩa, na ũathimo.

13Na kĩla kyoombiwe kyonthe kĩla kĩ ĩtunĩ, na kĩla kĩ nthĩ, na kĩla kĩ ungu wa nthĩ, na kĩla kĩ ũkanganĩ ĩũlũ, na syĩndũ syonthe ila syĩ nthĩnĩ wasyo, neewie ikyasya, Ũathimo, na nguma, na ndaĩa, na ũtonyi, nĩ sya ũla wĩkalĩte kĩvĩlanĩ kya ũsumbi, na wa Katena, kũvika tene na tene.

14Na ila syũmbe inya syĩ thayũ syasya, Ameni. Na ala atumĩa mavalũka nthĩ, mathaitha.

← Chapter 4 Jump to: Chapter 6 →