Revelation 6

Kamba (Mbivilia) 1956

← Chapter 5 Jump to: Chapter 7 →

1Na noona Katena akyũmbũa ũmwe wa ala mosiĩlo mũonza, na neew’a kĩmwe kya ila syũmbe inya syĩ thayũ kĩkyasya na wasya ta wa kĩtundumo, Ũka.

2Na noona, na sisya, mbalasi nzaũ, na ũla ũmĩtũlĩte aĩ na ũta; na anengwa ngovia ya ũsumbĩ: na aumaala aikĩlan’ya, na nĩ kana akĩlan’ye.

3Na oombũa ũsiĩlo wa kelĩ, neew’a kyũmbe kya kelĩ kĩla kĩ thayũ kĩkyasya, Ũka.

4Na mbalasi ĩngĩ ndune yaumaala: na ũla ũmĩtũlĩte anengwa kũveta mũuo kũũ nthĩ, nĩ kana moaane ene kwa ene: na anengwa ũvyũ mũnene.

5Na oombũa ũsiĩlo wa katatũ, neew’a kyũmbe kya katatũ kĩla kĩ thayũ kĩkyasya Ũka. Na noona, na sisya, mbalasi nziũ; na ũla ũmĩtũlĩte aĩ na kĩthimi kw’okonĩ kwake.

6Na neew’a ta wasya katĩ wa ila syũmbe inya syĩ thayũ ũkyasya, Kĩvava kya nganũ nĩ silingi, na ivava itatũ sya mbaale nĩ silingi na mauta na mbinyu ndũkaithũkye.

7Na oombũa ũsiĩlo wa kana, neew’a wasya wa kyũmbe kya kana kĩ thayũ kĩkyasya, Ũka.

8Na noona, na sisya, mbalasi yĩ mũkũyũ: na ũla ũmĩtũlĩte, syĩtwa yake nĩ kĩkw’ũ; na vala maveva ma akw’ũ mekalaa vaatĩanĩa nake. Nao manengwa ũkũmũ ĩũlũ wa kĩlungu kya kana kya nthĩ, moae na ũvyũ, na yũa, na kĩkw’ũ, na nyamũ mbai sya nthĩ.

9Na oombũa ũsiĩlo wa katano, noona ungu wa kĩthembeo mathayũ ma ala mooaiwe kwondũ wa ndeto ya Ngai, na kwondũ wa ũkũsĩ ũla maĩ naw’o:

10nao manĩĩsya, makyasya, Nĩ kũvika ĩndĩĩ, ame Mwĩaĩĩ, ũla mũtheu na wa w’o, ũteũsila na kũĩvanĩsya nthakame yaitũ kwa ala matwĩe nthĩ?

11Nao manengwa kĩla ũmwe ngũa nzaũ ndasa; na matavw’a mathũmũange kavinda kanini, kũvika yĩla atethya ma wĩa vamwe nao na ana‐a‐asa moo, ala meũawa o ũndũ mo mooaiwe, methĩwe meanĩtye ũtalo woo.

12Na noona akyũmbũa ũsiĩlo wa thanthatũ, na kwaĩ kĩtetemo kĩnene kya nthĩ; na syũa yatw’ĩka yiũ ta ĩkunia ya w’ĩa, na mwei w’onthe watw’ĩka ta nthakame;

13na ndata sya ĩtunĩ syavalũka nthĩ, o tondũ kĩkũyũ kĩtĩkasya makũyũ makyo mate maviku yĩla kĩũthingithangw’a nĩ kĩseve kĩnene.

14Na ĩtu yavetwa ta ũa wa ũsomwa ũilingwa; na iĩma syonthe na ithama syonthe syaumw’a vandũ vasyo.

15Na asumbĩ ma nthĩ, na anene me mbee ũsumbĩnĩ, na anene ma asikalĩ ngili, na athwii, na ala me vinya, na ngombo syonthe na ala mate ngombo, meevitha ngunganĩ na mbainĩ sya iĩma;

16na maitavya iĩma na mbai, makyasya, Tũvalũkĩlei, na mũitũvitha ũthyũ wa ũla wĩkalĩte kĩvĩlanĩ kya ũsumbĩ, na ũthatu wa kala Katena:

17nũndũ mũthenya mũnene wa ũthatu woo nĩ mũku; na nũũ ũla ũtonya kũũngama?

← Chapter 5 Jump to: Chapter 7 →