Revelation 14

Kamba (Mbivilia) 1956

← Chapter 13 Jump to: Chapter 15 →

1Na noona, na sisya, kala Katena ka ĩlondu aũngeme kĩĩmanĩ kya Saioni, na vamwe nake andũ ngili ĩana na mĩongo ĩna na inya, me na syĩtwa yake, na syĩtwa ya Ĩthe wake, maandĩkĩtwe itulyanĩ syoo.

2Na neew’a wasya ũkyuma ĩtunĩ, ta wasya wa iw’ũ nyingĩ, na wasya wa kĩtundumo kĩnene: na wasya ũla neewie waĩ ta wasya wa aingi ma mbeve makĩinga mbeve syoo:

3na maina wathi weũ mbee wa kĩvĩla kya ũsumbĩ, na mbee wa ila syũmbe inya syĩ thayũ na ala atumĩa: na vai mũndũ waatonya kwĩmanyĩsya wathi ũsu, ate o ala ngili ĩana na mĩongo ĩna na inya, ala methooetwe kumw’a nthĩ.

4Aa nĩo ala matavukĩt’we nĩ aka; nũndũ nĩ atheu vyũ. Asu nĩo ala mavikĩlaa Katena ka ĩlondu o vala ũendaa. Aa mathooetwe kumw’a andũnĩ, methĩwe ũsyao wa mbee kwa Ngai na kwa kala Katena.

5Na makanyw’anĩ moo vaiaaoneka ũvũngũ: mati na ũndũ ũtaĩle.

6Na noona mũlaĩka ũngĩ akĩũlũka ĩtunĩ katĩ, e na ũvoo mũseo wa tene na tene wa ũtavan’ya kwa ala matwĩe nthĩ, na kwa kĩla mũthemba na mbaĩ na kĩthyomo na ũko wa andũ;

7na aneena na wasya mũnene, Kĩai Ngai, na mũtaĩei; nũndũ saa wa kũsilĩla kwake nĩ mũku: na mũthaithei ũla wombie ĩtu na nthĩ na ũkanga na nthongo sya manzĩ.

8Na mũlaĩka ũngĩ, wa kelĩ, aatĩĩa, akyasya, Nĩ mbalũku, nĩ mbalũkũ Mbaviloni ĩla ndũa nene, ĩla yatumie mbaĩ syonthe inyw’a mbinyu ya ũthilĩku wa ũlaalai wayo.

9Na mũlaĩka ũngĩ, wa katatũ, aatĩĩa asu, akyasya na wasya mũnene, Ethĩwa mũndũ o na wĩva nũnũũthaitha nyamũ ĩsu na mũvw’anano wayo, na akĩtĩkĩla kwĩkĩwa ũvano kĩtulyanĩ kyake, kana kw’okonĩ kwake,

10akanyw’a mbinyu ya ũthilĩku wa Ngai, ĩla ĩseũvĩtw’e ĩtavulenw’e kĩkombenĩ kya ũthatu wake; na akathĩnĩw’a na mwaki na mũvĩlĩtĩ mbee wa alaĩka atheu na mbee wa kala Katena:

11na syũki ya thĩna woo yambataa kũvika tene na tene; na maithũmũaa mũthenya na ũtukũ, asu mathaithaa ĩla nyamũ na mũvw’anano wayo, na o ũla wĩtĩkĩlaa kwĩkĩwa ũvano wa syĩtwa yayo.

12Vaa nĩvo ve wũmĩĩsyo wa atheu, ala makwataa mĩao ya Ngai, na mũĩkĩĩo wa Yesũ.

13Na neew’a wasya ũkyuma ĩtunĩ ũiasya, Andĩka, Nĩ aathime akw’ũ ala makusaa nthĩnĩ wa Mwĩaĩi kuma yu: ĩĩ, easya ũu Veva, kana mathũmũĩe mawĩa moo maito; nũndũ mawĩa moo nĩmaatĩanĩe nao.

14Na noona, na sisya, ĩthweo yeũ; na ĩũlũ wa ĩthweo noona ũmwe ailyĩ nthĩ ũtilyĩ mwana wa mũndũ, e na ngovia ya ũsumbĩ ya thaavu mũtwenĩ wake, na kw’okonĩ kwake e na kavyũ koĩ ke ngoto.

15Na mũlaĩka ũngĩ auma ĩkalũnĩ, akyanĩĩsya ũla ũilyĩ ĩũlũ wa ĩthweo, akĩmwĩa, Likya kavyũ kaku, ũkethe: nũndũ saa wa ũketha nĩ mũviku; nũndũ ngetha ya nthĩ nĩminĩte kũma.

16Na ũla wailyĩ ĩũlũ wa ĩthweo ekya nthĩ kavyũ kake; na nthĩ yakethwa.

17Na mũlaĩka ũngĩ auma ĩkalũnĩ yĩla yĩ ĩtunĩ, o nake e na kavyũ koĩ ke ngoto.

18Na mũlaĩka ũngĩ auma kĩthembeonĩ, ũla wĩ na vinya ĩũlũ wa mwaki; na anĩĩsya ũla wĩ na kala kavyũ koĩ, akyasya, Likya kavyũ kaku ũtile itũngo sya mũsavivũ wa nthĩ; nĩkwĩthĩwa nzavivũ syaw’o nĩ mbĩu ki.

19Na mũlaĩka ekya kavyũ nthĩ, na aketha ũsyao wa mũsavivũ wa nthĩ, na awĩkya kĩangĩonĩ, kĩangĩo kĩla kĩnene kya ũthilĩku wa Ngai.

20Na kĩangĩo kyangĩwa ũtee wa ndũa, na nthakame yauma kĩangĩonĩ, o na kũvika mĩkwa ya mĩtwe ya mbalasi, kũvika maĩli maana elĩ.

← Chapter 13 Jump to: Chapter 15 →