Revelation 9

Kamba (Mbivilia) 1956

← Chapter 8 Jump to: Chapter 10 →

1Na mũlaĩka wa katano avuva soo, na noona ndata yumĩte ĩtunĩ ĩvalũkĩte nthĩ: nake anengwa ũvungũo wa yĩla ĩima yĩte kĩtulu.

2Na ayĩvingũa yĩla ĩima yĩte kĩtulu; na syũki yambata kuma ĩimanĩ, ta syũki ya iko ĩnene mũno; na syũa na yayaya syeekĩwa kĩvindu nũndũ wa syũki yĩu ya yĩla ĩima.

3Na ngie syauma syũkinĩ yĩu syathi ĩũlũ wa nthĩ; nasyo syanengwa ũkũmũ, o ta ing’auũ sya nthĩ syĩ ũkũmũ.

4Na syatavw’a itikathũkye nyeki sya nthĩ, kana kĩndũ kiũ o na kĩva, kana mũtĩ o na wĩva, ĩndĩ no andũ asu ala mate na ũsiĩlo wa Ngai itulyanĩ syoo.

5Na syatw’ĩĩwa itikamoae, ĩndĩ nĩ kana imathĩn’ye myei ĩtano: na kũthĩn’ya kwasyo kwaĩ ta kũthĩn’ya kwa kĩng’auũ kĩũmĩte mũndũ.

6Na mĩthenya ĩsu andũ makamantha kĩkw’ũ, na maikakyona nongi; na makenda kũkw’a, ĩndĩ kĩkw’ũ kĩkamakĩa.

7Na mũmbĩlwe wa ngie wailyĩ mbalasi iseũvĩw’e kaũ; na mĩtwenĩ yasyo kwaĩ ta ngovia sya ũsumbĩ iilyĩ thaavu, na mothyũ masyo mailyĩ mothyũ ma andũ.

8Na syaĩ na nzw’ĩĩ sya aka, na maeo masyo mailyĩ maeo ma mĩnyambũ.

9Na syaĩ na ngao ithũinĩ, ta ngao sya iaa, na kĩuumo kya nthwau syasyo kyaĩ ta kĩuumo kya ngalĩ, na mbalasi mbingĩ isembete kaũnĩ.

10Na syĩ na isithe ta ila sya ing’auũ, na moa; na vinya wa ũmew’ĩthya andũ woo myei ĩtano wĩ isithenĩ syasyo.

11Na syĩ na mũsumbĩ ĩũlũ wasyo, ũla mũlaĩka wa yĩla ĩima yĩte kĩtulu: syĩtwa yake Kĩevelania nĩ Avatoni, na Kĩkiliki nĩ Avolioni.

12Woo wa mbee nĩwavĩta: sisya, nĩmokĩte Mawoo angĩ elĩ ĩtina.

13Na mũlaĩka wa thanthatũ avuva soo, na neew’a wasya ũmwe wumĩte mbyanĩ sya kĩthembeo kya thaavu kĩla kĩ mbee wa Ngai,

14ũmwe aimwĩa mũlaĩka ũsu wa thanthatũ ũla waĩ na soo, akyasya, Thasya ala alaĩka ana ala movetwe ũsĩnĩ ũnene ũla wĩtawa Euvalati.

15Na alaĩka asu ana mathaw’a ala maseũvĩtw’e kwondũ wa saa na mũthenya na mwei na mwaka, nĩ kana moae kĩlungu kya katatũ kya andũ.

16Na ũtalo wa ita sya ala matũlĩte mbalasi wai ngili mĩongo ĩlĩ kũndũ ngili ĩkũmi: nĩneewie ũtalo woo.

17Na ta ũu noona mbalasi woninĩ, na ala maitũlĩte, me na ngao ithũinĩ iilyĩ ta sya mwaki na sya samawi na sya mũvĩlĩtĩ: na mĩtwe ya mbalasi ĩilyĩ ta mĩtwe ya mĩnyambũ; na makanyw’a masyo maumawa nĩ mwaki na syũki na mũvĩlĩtĩ.

18Kĩlungu kya katatũ kya andũ kyooaiwe na mothĩn’yo asu atatũ, mwaki na syũki na mũvĩlĩtĩ, ila syaumie makanyw’anĩ masyo.

19Nũndũ vinya wa mbalasi wĩ makanyw’anĩ masyo, na isithenĩ syasyo; nũndũ isithe iilyĩ nzoka, na syĩ na mĩtwe; na nĩsyĩw’ĩthasya woo nasyo.

20Na ala matialĩte ma andũ, ala mataaũawa nĩ mothĩn’yo asu, matyaalyũla ngoo ũndũ wa mawĩa ma moko moo, maikathaithe ndaimoni, na mivw’anano ya thaavu, na ya vetha, na ya ũthuku, na ya ĩvia, na ya mũtĩ; ĩla ĩtatonya kwona, o na kwĩw’a, o na kũkinya:

21o na matyaaĩalyũla ũndũ wa maũaani moo, kana ũndũ wa maũoi moo, kana ũndũ wa ũlaalai woo, kana ũndũ wa mong’ei moo.

← Chapter 8 Jump to: Chapter 10 →