Revelation 18

Kamba (Mbivilia) 1956

← Chapter 17 Jump to: Chapter 19 →

1Na ĩtina wa maũndũ asu noona mũlaĩka ũngĩ aitheea kuma ĩtunĩ, e na ũkũmũ mũnene; na nthĩ yeekĩiwe kyeni nĩ ũtheu wake mũtisu.

2Nake aneena na wasya wĩ vinya mũno, aiasya, Nĩ mbalũku, nĩ mbalũku, Mbaviloni ĩla ndũa nene, na nĩtw’ĩkĩte ũtũo wa ndaimoni, na kolokolo wa kĩla veva mũvuku, na kolokolo wa kĩla nyũnyi, mbuku na mene.

3Nĩkwĩthĩwa mbaĩ syonthe nĩ mbalũku nũndũ wa mbinyu ya ũthatu wa ũlaalai wake; na asumbĩ ma nthĩ nĩmalaalaile nake, na atandĩthya ma nthĩ nĩmathuiw’e nĩ wingĩ wa wanango wake.

4Na neew’a wasya ũngĩ ũkyuma ĩtunĩ, ũiasya, Umai nthĩnĩ wake, andũ makwa, nĩ kana mũikethĩwe na mũamba na naĩ syake, na mũikose mothĩn’yo make:

5nũndũ naĩ syake nivikĩte o na ĩtunĩ, na Ngai nũlilikanĩte mothũku make.

6Mũĩvanĩsyei o ũndũ waĩvanĩasya, na mũimũĩvanĩsya kũndũ kwĩlĩ kwĩanana na meko make: kĩkombenĩ kĩla wavulanilye, mũvulanĩlyei kũndũ kwĩlĩ.

7O ũndũ we wetaĩe, na kwĩkala motanunĩ ma mwĩĩ, mũnenge mathĩna na kĩmeto o ta ũu: nĩkwĩthĩwa easya ngoonĩ yake, Nĩilyĩ nthi nĩ mũsumbĩ mũndũ mũka, na ndi ndiwa na ndikethĩwa na kĩmeto nongi.

8Kwondũ wa ũu mũthenya o ũmwe mothĩn’yo make makooka, kĩkw’ũ, na kĩmeto, na yũa; nake akavĩvw’a vyũ na mwaki; nĩkwĩthĩwa Mwĩaĩi Ngai ũla wamũsilĩle e na vinya.

9Na asumbĩ ma nthĩ, ala malaalaile nake na kwĩkala motanunĩ ma mwĩĩ vamwe nake, makamũĩĩa na kũmeta masisya syũki ya kũvya kwake,

10makĩũngama kũasa nũndũ wa w’ĩa wa thĩna wake, makyasya, Woo, woo, ndũa nene, Mbaviloni, ndũa ĩla yĩ vinya! Nĩkwĩthĩwa saa ũmwe ũsilĩlo waku nĩwooka.

11Na atandĩthya ma nthĩ nĩmeũmũĩĩa na kũmeta, nĩkwĩthĩwa vai mũndũ ũthooaa mĩio yoo ĩngĩ;

12mĩio ya thaavu, na vetha, na tũvila twĩ thooa mũnene, na malũlũ, na ngũa sya katane nzeo, na ila itilyĩ ta ndune, na sya alili, na ila ndune mũno; na mĩtĩ yonthe ĩla ĩnyungaa nesa, na mĩio yonthe ĩseũvĩtw’e na maeo ma nzou, na mĩio yonthe ĩseũvĩtw’e na mĩtĩ ĩ thooa mũnene, na ya ũthuku, na kĩaa, na mavia maseo;

13na mũtalasini, na ĩliki, na ũvani, na manukato, na ũvumba, na mbinyu, na mauta ma mũthata, na mũtu mũvinyu, na nganũ, na ng’ombe, na malondu, na mbalasi, na ngalĩ, na ngombo, na mathayũ ma andũ.

14Na mosyao ala ngoo yaku yendie nĩmakũtiie, na syĩndũ syonthe ila syaĩ nou na nzeo mũno nikwaĩe, na andũ maikasyona ĩngĩ nongi.

15Na atandĩthya ma mĩio ĩsu, ala mathuiw’e nĩwe, makaũngama kũasa mũno nũndũ wa w’ĩa wa thĩna wake, makĩĩa na kũmeta;

16makyasya, Woo, woo, ndũa nene, ĩla ĩneevw’ĩkĩte ngũa sya katane nzeo na ila itilyĩ ta ndune na ila ndune mũno, na kwanakavw’a na thaavu na tũvila twĩ thooa mũnene na lũlũ!

17Nũndũ saa ũmwe ũthwii wĩana ũu nĩwaminwa. Na kĩla mũnene wa ngalawa, na kĩla mũndũ ũendaa ũkanganĩ o na va, na atwai ma ngalawa, na onthe ala matwĩw’e nĩ wĩa wa ũkanganĩ, maũngama kũasa,

18na maneena na wasya mũnene makĩsisya syũki ya kũvya kwayo, makyasya, Nĩ ndũa yĩva ĩtilyĩ ndũa ĩsu nene?

19Na mekya kĩtoo mĩtwenĩ yoo, na maneena na wasya mũnene, makĩĩa na kũmeta, makyasya, Woo, woo, ĩla ndũa nene, ĩla ntnĩnĩ wayo onthe ala maĩ na ngalawa syoo ũkanganĩ mathuĩtw’e nũndũ wayo kũnenevya thooa! Nũndũ saa ũmwe nĩyatw’ĩka ĩanzo.

20Tanai ĩũlũ wayo, we ĩtu, na inyw’ĩ atheu, na inyw’ĩ atũmwa, na inyw’ĩ athani; nĩkwĩthĩwa Ngai nũsilĩlĩte ũsilĩlo wenyu ĩũlũ wayo.

21Na mũlaĩka wĩ vinya ookĩlya ĩvia yailyĩ ĩvia ĩnene ya ũthia na ayĩkya ũkanganĩ, aiasya, O ta ũu Mbaviloni, ĩla ndũa nene, ĩkekw’a nthĩ na ũvalũko mũnene, na ndĩkoneka ĩngĩ nongi.

22Na mawasya ma aingi ma mbeve na aini ma mbathi na avuvi ma nzumalĩ na avuvi ma masoo maikew’ĩka nthĩnĩ waku nongi; na vai ndũĩka, o na yĩva, ĩkoneka nthĩnĩ waku ĩngĩ nongi; na wasya wa ĩvia ya ũthia ndũkew’ĩka nthĩnĩ waku nongi;

23na kyeni kya taa kĩikakena nthini waku nongi: na wasya wa mũtwaani na wa mũtwawa ndũkew’ĩka nthĩnĩ waku ĩngĩ nongi: nĩkwĩthĩwa atandĩthya maku maĩ anene ma nthĩ; nũndũ mbaĩ syonthe nĩsyakengiwe nĩ ũoi waku.

24Na nthĩnĩ wayo kwoonekie nthakame ya athani na ala atheu, na ya onthe ala mooaiwe nthĩ.

← Chapter 17 Jump to: Chapter 19 →