Revelation 2

Kamba (Mbivilia) 1956

← Chapter 1 Jump to: Chapter 3 →

1Mũandĩkĩe mũlaĩka wa ĩkanisa yĩla yĩ Eveso atĩĩ: Maũndũ aa easya ũla ũkwataa ila ndata mũonza kw’okonĩ kwake kwa aũme, ũla ũendaa katĩ wa ila syĩndũ mũonza sya thaavu syĩkĩawa mataa:

2Nĩnĩmesĩ mawĩa maku, na thĩna wa wĩa waku, na wũmĩĩsyo waku, na kana ndũtonya kũmĩanĩsya na andũ athũku, na ĩngĩ nũmatatĩte asu mekwĩyĩta atũmwa, na ti w’o, na wamonie me akengani;

3nĩweelũlũmĩlye na nĩwũmĩĩsye kwondũ wa syĩtwa yakwa, na ndwaanoa.

4Ĩndĩ nĩ na ũndũ naku, nũndũ nũtiĩte wendo waku wa mbee.

5Lilikana ĩndĩ vala waumie ũkĩvalũka, na alyũla ngoo na ĩka mawĩa ala ma mbee; kana ethĩwa ndũkwĩka ũu ngooka kwaku, na ngaveta kĩndũ kyaku kya taa vandũ vakyo, walea kũalyũla ngoo.

6Ĩndĩ ũndũ ũũ wĩ naw’o, atĩ ũmenaa mawĩa ma Anikolai, ala nĩmenaa nakwa.

7Ũla wĩ na kũtũ, nĩew’e ũndũ Veva ũnũũtavya makanisa. Ũla ũkĩlasya, ngamũnenga we aye ũsyao wa mũtĩ wa thayũ, ũla wĩ mũũndanĩ wa Ngai.

8Na mũandĩkĩe mũlaĩka wa ĩkanisa yĩla yĩ Simulina atĩĩ: Maũndũ aa easya ũla wa mbee na ũla wa mũminũkĩlyo, ũla waĩ mũkw’ũ, na eethĩwa thayũ ĩngĩ:

9Nĩnĩsĩ ũnyamao waku, na ũkya waku (ĩndĩ wĩ mũthwii), na nĩnĩsĩ kũumana kwa asu meyĩtaa Ayuti, na ti w’o, ĩndĩ nĩ ĩsinakoke ya Satani.

10Ndũkakĩe maũndũ ala ũkilĩlye kũthĩnw’a nĩmo: sisya, ndevili nũkilĩlye kwĩkya amwe ma inyw’ĩ kolokolonĩ, nĩ kana mũtatwe; nenyu mũkeethĩwa na ũnyamao matukũ ĩkũmi. Ĩthĩwa wĩ na kĩthito kũvikĩa kĩkw’ũ, nakwa ngakũnenga ngovia ya ũsumbĩ ya thayũ.

11Ũla wĩ na kũtũ, nĩew’e ũndũ Veva ũnũũtavya makanisa. Ũla ũkĩlasya ndakakwatwa nĩ woo wa kĩkw’ũ kya kelĩ.

12Na mũandĩkĩe mũlaĩka wa ĩkanisa yĩla yĩ Velikamo atĩĩ: Maũndũ aa easya ũla wĩ na ũvyũ mũĩ ngalĩ syelĩ:

13Nĩnĩsĩ vala ũtwĩe, navo nĩ vala ve kĩvĩla kya ũsumbĩ kya Satani: naku ũyĩkwete mũno syĩtwa yakwa, o na ndwaakaĩa mũĩkĩĩo wakwa, o na ĩvinda ya Andiva ngũsĩ yakwa yĩ kĩthito, ũla woaĩwe kwenyu, vala Satani ũtwĩe.

14Ĩndĩ nĩ na maũndũ mavũthũ naku, nũndũ wĩ na amwe vu ala makwataa momanyĩsyo ma Mbalaamu, ũla wamũmanyĩsye Mbalaki kwĩkya ũlulutĩkyo mbee wa ana ma Isilaeli, nĩ kana maye syĩndũ ila syathembewe mĩvw’anano, na kũlaalaa.

15O ta ũu naku wĩ na andũ amwe ala makwataa momanyĩsyo ma Anikolai.

16Alyũla ngoo ĩndĩ; ethĩwa ndũkwĩka ũu ngooka kwaku mĩtũkĩ, na ngakwatya kaũ nao na ũvyũ wa kanyw’a wakwa.

17Ũla wĩ na kũtũ, nĩew’e ũndũ Veva ũnũũtavya makanisa. Ũla ũkĩlasya, ngamũnenga kũya lĩu wĩtawa mana ũla mũvithe, na ngamũnenga ĩvia yeũ, na ĩũlũ wa ĩvia yĩu vaandĩkĩtwe syĩtwa yeũ, yĩtesĩkĩwe nĩ mũndũ ate o ũla ũnũũyosa.

18Na mũandĩkĩe mũlaĩka wa ĩkanisa yĩla yĩ Thiatila atĩĩ: Maũndũ aa easya Mwana wa Ngai, ũla wĩ na metho mailyĩ ũmũĩ wa mwaki, na nyaĩĩ syake itilyĩ ũthuku mũkute mũno:

19Nĩnĩsĩ mawĩa maku, na wendo waku na mũĩkĩĩo na ũthũkũmi na wũmĩĩsyo, na kana mawĩa maku ma mũminũkĩlyo nĩmathonokete ala ma mbee.

20Ĩndĩ nĩ na ũndũ naku, atĩ nũmwĩtĩkĩlaa ũla mũndũ mũka Yeseveli, ũla wĩyĩtaa mwathani; na amanyĩasya na kwasya ngombo syakwa kana ilaalae, na kũya syĩndũ ithembeawa mĩvw’anano.

21Nakwa namũnengie ĩvinda kana alyũle ngoo; nake ndekwenda kwĩalyũla na kũeka ũlaalai wake.

22Sisya, nĩmwĩkya ũkomonĩ, na asu mekaa ũlaalai nake ũnyamaonĩ mũnene, ethĩwa maikwĩalyũla na kũeka mawĩa make.

23Nakwa ngooaa syana syake na kĩkw’ũ; na makanisa onthe makamanya kana ninyie nĩoasya malilikano na ngoo: na ngamũnenga kĩla mũndũ wa kwenyu kwĩanana na mawĩa menyu.

24Ĩndĩ nĩmũtavya inyw’ĩ ala mũtiele Thiatila, o ũndũ mwĩana ala mũte na ũmanyĩsyo ũsu, ala mũtesĩ maũndũ maliku ma Satani, o tondũ mekwasya; Nyie ndiũmwilĩĩla mũio ũngĩ.

25Ĩndĩ ũla mwĩ naw’o, lũmyai mũvaka yĩla nĩũka.

26Na ũla ũkĩlasya, na we ũla ũsũvĩaa mawĩa makwa kũvĩka mũminũkĩlyo, ngamũnenga ũsu ũkũmũ ĩũlũ wa Andũ‐ma‐mbaĩ‐ingĩ:

27nake akasumbĩka ĩũlũ woo na ndata ya kĩaa, ta mĩio ya mũmbi yanangawa vyũ; otondũ nyie nakwa noosie kwa Asa wakwa:

28na ngamũnenga ĩla ndata ya kĩoko.

29Ũla wĩ na kũtũ, nĩew’e ũndũ Veva ũnũũtavya makanisa.

← Chapter 1 Jump to: Chapter 3 →