Revelation 16

Kamba (Mbivilia) 1956

← Chapter 15 Jump to: Chapter 17 →

1Na neew’a wasya mũnene ũiuma ĩkalũnĩ, ũimatavya ala alaĩka mũonza atĩĩ, Endai, na mũiĩta ila mbakũli mũonza sya ũthilĩku wa Ngai nthĩ.

2Na ũla wa mbee aenda, na eta mbakũli yake nthĩ; na kweethĩwa itau nthũku mũno na syĩ na woo mũnene andũnĩ ala me na ũvano wa ĩla nyamũ, na ala mathaithaa mũvw’anano wayo.

3Na ũla wa kelĩ eta mbakũli yake ũkanganĩ; naw’o watw’ĩka nthakame ta ya mũndũ mũkw’ũ; na kyonthe kĩ thayũ kyakw’a, kya ila syĩ ũkanganĩ.

4Na ũla wa katatũ eta mbakũli yake mbũsĩnĩ na nthongonĩ sya manzĩ; nasyo syatw’ĩka nthakame.

5Na neew’a mũlaĩka wa manzĩ aiasya, We wĩ mũlũngalu, ũla wĩ vo na ũla waĩ vo, we Ũla Mũtheu, nĩkwĩthĩwa nĩwasilĩla ũu:

6nũndũ nĩmetĩkisye nthakame ya atheu na athani, naku wamanenga nthakame manyw’e: nĩmaĩlwe.

7Na neew’a kĩthembeo kĩiasya, Ĩĩ, we Mwĩaĩi Ngai, Mwene Vinya W’onthe, motw’ĩo maku nĩ ma w’o na nĩ malũngalu.

8Na ũla wa kana eta mbakũli yake ĩũlũ wa syũa; na yanengwa kũvĩvya andũ na mwaki.

9Na andũ mavĩvw’a na ũvyũvu mũnene: na mayĩuma syĩtwa ya Ngai ũla wĩ na ũkũmũ ĩũlũ wa mothĩn’yo asu; na matyaalyũla ngoo na kũmũnenga ndaĩa.

10Na ũla wa katano eta mbakũli yake kĩvĩlanĩ kya ũsumbĩ kya ĩla nyamũ; na ũsumbĩ wayo weekĩwa kĩvindu; na matanyũka nĩmĩ syoo nũndũ wa woo,

11na mamũuma Ngai wa ĩtunĩ nũndũ wa mawoo moo na itau syoo; na matyaaalyũla ngoo ũndũ wa mawĩa moo.

12Na ũla wa thanthatũ eta mbakũli yake ĩũlũ wa ũla ũsĩ mũnene, wĩtawa Euvalati; na manzĩ maw’o mang’ala, nĩ kana nzĩa ĩseũvĩw’e asumbi ala meũka kuma wumĩlonĩ wa syũa.

13Na noona maveva atatũ mavuku, mailyĩ syoa, maiuma kanyw’anĩ wa ũla mũkũnga, na kanyw’anĩ wa ĩla nyamũ, na kanyw’anĩ wa mwathani wa ũvũngũ:

14nĩkwĩthĩwa nĩ maveva ma ndaimoni, mekaa syama; ala meuma mathi kwa asumbĩ ma nthĩ yonthe kũmomban’ya kaũnĩ wa mũthenya mũnene wa Ngai, Mwene Vinya W’onthe.

15(Sisya, nĩũka ta kĩng’ei. Nĩ mũathime ũla ũsyaĩĩasya na kũsũvĩa ngũa syake, ndakathi e mũthei, na makona nthoni syake.)

16Na mamomban’ya vamwe vala vetawa Kĩevelania Ali‐Maketoni.

17Na ũla wa mũonza eta mbakũli yake ĩũlũ wa yayaya; na wasya mũnene wauma ĩkalũnĩ kuma kĩvĩlanĩ kya ũsumbĩ, ũkyasya, Nĩ kwĩke:

18na kwaĩ motisi, na mawasya, na itundumo; na kwaĩ kĩtetemo kĩnene kya nthĩ, o na kũiaaithĩwa kĩngĩ takyo kuma andũ meethĩwa kũũ nthĩ, kĩtetemo kĩnenevete ũu, kĩan’ya vinya ũu.

19Na ĩla ndũa nene yaanw’a ilungu itatũ, na ndũa sya i mbaĩ syavalũka: na Mbaviloni ĩla ndũa nene yalilikanwa mbee wa Ngai, ĩnengwe kĩkombe kya mbinyu ya wai wa ũthilĩku wake.

20Na ithama syonthe syakĩa, na iĩma nasyo ityaaoneka ĩngĩ.

21Na mbua nene ya mavia, kĩla ĩvia ũito wayo waĩ ta talendi ĩmwe, yamatheeea andũ kuma ĩtunĩ: na andũ mamũuma Ngai nũndũ wa ũthĩn’yo ũsu wa mbua ya mavia; nĩkwĩthĩwa ũthĩn’yo wayo nĩ mũnene mũno.

← Chapter 15 Jump to: Chapter 17 →