Revelation 11

Kamba (MBIVILIA ŨVOO MŨSEO)

← Chapter 10 Jump to: Chapter 12 →

1Nĩnanengiwe mũtĩ wa kũthima ũilyĩ ta ndata na neewa atĩĩ, “Enda ũkathime Ĩkalũ ya Ngai ũndũ yĩana, na ũithima kĩthembeo, na ũitala andũ ala mathaithĩaa Ĩkalũnĩ yĩu.

2Ĩndĩ ndũkathime kũu nza, ekana nakw'o nĩkwĩthĩwa nĩkũnengetwe Andũ-ma-mbaĩ-ingĩ makinyange nthĩ ũla mũsyĩnĩ mũtheu, vandũ va myei mĩongo ĩna na ĩlĩ.

3Nganenga ngũsĩ ilĩ syakwa ũtonyi wa kũtavany'a ũvoo wakwa nyie Ngai, vandũ va ĩvinda ya mĩthenya ngili ĩmwe na maana elĩ na mĩongo thanthatũ. Athani asu makeethĩawa mekĩĩte ngũa ngaamu sya makunia.”

4Ngũsĩ isu ilĩ nĩsyo ĩla mĩtĩ ĩlĩ yĩtawa mĩthata, na ila syĩndũ ilĩ sya kwilĩĩla taa, ila iũngyĩ mbee wa Mwĩai wa nthĩ yonthe.

5Ethĩwa mũndũ o na wĩva akenda kũmeka naĩ, akavĩvw'a na kũawa nĩ mwaki kuma kanyw'anĩ woo; ĩĩ, ethĩwa mũndũ akenda kũmeka naĩ akooawa kwa nzĩa ĩsu.

6Me na ũtonyi wa kũsiĩĩa mbua ndĩkaue ĩvindanĩ yĩla maendee na kũtavany'a ũvoo wa Ngai. O ta ũu me na ũtonyi wa kũalyũla kĩw'ũ kya kĩla vandũ kĩkatw'ĩka nthakame, na me na ũtonyi wa kũetee andũ ĩũlũ wa nthĩ mowau mathũku ma kĩla mũthemba, ĩvindanĩ o yĩla mekwenda.

7Mamina kũtavany'a ũtũmani woo, vakooka nyamũ mbai kuma yĩla ĩimanĩ yĩte kĩtulu na ĩyũkita na athani asu. Ĩkamakĩlya vinya na kũmoaa,

8na mĩĩ yoo ĩkaekanwa nayo yĩkale ĩvalũkĩte vandũ lelũnĩ mũsyĩnĩ ũsu mũnene, ũla ũelekanĩtw'e na Sondomu kana Misili, vala nĩvo Mwĩai woo wambĩtwe.

9Vandũ va ĩvinda ya mĩthenya ĩtatũ na nyusu, andũ kuma kĩla vandũ ĩũlũ wa nthĩ, mbaĩnĩ syonthe, andũnĩ ma ithyomo na ngo syĩ kĩvathũkany'o, makamĩloela na kwasya mĩĩ ĩsu ndĩkathikwe.

10Andũ onthe ĩũlũ wa nthĩ makatana mũno nũndũ wa kũkw'a kwoo, na mainengane mĩthĩnzĩo ũmwe kwa ũla ũngĩ, nĩkwĩthĩwa athani asu elĩ nĩmanathĩnĩtye andũ mũno ĩũlũ wa nthĩ.

11Ĩndĩ ĩtina wa mĩthenya ĩsu ĩtatũ na nyusu, Ngai nĩwanengie mĩĩ ya athani asu thayũ na mookĩla maũngama, na andũ onthe ala moonie ũu weekĩka makwatwa nĩ w'ĩa mũnene mũno.

12Nĩvo ĩndĩ athani asu meewie wasya mũnene kuma ĩtunĩ ũineena namo na kũmea atĩĩ, “Ambatai mũke kũũ?” Amaitha moo masyaĩĩsye, nĩmambatie ĩtunĩ me nthĩnĩ wa matu.

13Ĩvindanĩ o yĩu nĩkweethĩiwe kĩthingitho kĩnene mũno kya nthĩ; kĩlungu kĩmwe kya ĩkũmi kya ndũa ĩsu nĩkyaanangĩkie. Andũ ngili mũonza nĩmooaiwe nĩ kĩthingitho kĩu, namo ala matialile makĩa na kũkumya ũnene wa Ngai ũla wĩ ĩtunĩ.

14Ĩvinda ya kyeva kya kelĩ nĩyavĩtũka, yu ĩvinda ya kyeva kya katatũ yĩ vakuvĩ kũka.

15Nĩvo ĩndĩ mũlaĩka ũla wa mũonza wavuvie soo wake, na neew'a mawasya manene kuma ĩtunĩ mayasya atĩĩ, “Ũtonyi wa kũsumbĩka ĩũlũ wa nthĩ yu nĩ wa Mwĩai waitũ na wa Klĩsto, nake akasumbĩka tene na tene!”

16Ala atumĩa mĩongo ĩlĩ na ana mekalaa ivĩlanĩ nini sya kĩ-ũsumbĩ vau mbee wa Ngai, nĩmakumanie matina nthĩ na ũthyũ mamũthaitha Ngai

17mayasya, “Nĩtũũkũtũngĩa mũvea we Mwĩai Ngai Mwene Ũtonyi W'onthe, we ũla wĩ vo na ũla waĩ vo, nĩkwĩthĩwa nĩwosete vinya waku mũnene na ũkambĩĩa kũsumbĩka!

18Andũ ma nthĩ nĩmathatĩte, nĩkwĩthĩwa ĩvinda ya kwonany'a ũthatu waku nĩ ĩviku, nayo nĩ ĩvinda ya kũsilĩla ala akw'ũ. Ĩvinda nĩ ĩviku yaku ya kũmatuva athũkũmi maku, athani, aĩkĩĩi na andũ onthe ala me kĩkĩo kyaku, me nguma na mate nguma. Na yĩĩ noyo ĩvinda yaku ya kũmamina ala manangaa nthĩ.”

19Nĩvo ĩndĩ Ĩkalũ ya Ngai ĩtunĩ yavingũiwe, na noona Ĩsandũkũ ya Ũtianĩo vo. Nĩveethĩiwe kyeni ta kya ũtisi, mawasya, itundumo ta sya kĩtandalĩki, kĩthingitho kya nthĩ, na mbua nene ya mavia.

← Chapter 10 Jump to: Chapter 12 →