Revelation 13

Kamba (MBIVILIA ŨVOO MŨSEO)

← Chapter 12 Jump to: Chapter 14 →

1Nĩnoonie nyamũ mbai yambĩĩa kumĩla ũkanganĩ. Nyamũ ĩsu yaĩ na mbya ĩkũmi na mĩtwe mũonza; yaĩ na ngovia ya kĩ-ũsumbĩ ĩũlũ wa kĩla ũmwe wa mbya syayo, na kĩla ũmwe wa mĩtwe ya yo waĩ na ũandĩko wa kũuma Ngai.

2Nyamũ ĩsu noonie yailyĩ ta ngo mwĩĩnĩ wayo, ĩndĩ maũũ mayo mailyĩ ta ma lũma, naw'o mũnuka wayo wailyĩ ta wa mũnyambũ. Ũla mũkũnga wa kũseng'ya nĩwanengie nyamũ ĩsu ũtonyi na ũkũmũ waw'o wa kũsumbĩka.

3Mũtwe ũmwe wa mĩtwe ya nyamũ ĩsu wailyĩ ta waĩ ĩlanga ya kĩtau kyaĩ vakuvĩ kũmyũaa, ĩndĩ kyaĩ kĩvou vyũ. Andũ onthe nĩmaseng'iw'e nĩ nyamũ ĩsu na mamĩatĩĩa.

4Andũ nĩmathaithie mũkũnga ũsu, nĩkwĩthĩwa nĩ w'o watonyethisye nyamũ ĩsu kwĩthĩwa na ũkũmũ. O ta ũu nĩmathaithaa nyamũ ĩsu o nayo mayasya atĩĩ, “Kũi mũndũ o na ũmwe ũilyĩ ta nyamũ ĩno, o na kũi ũmwe ũtonya kũkita nayo!”

5Nyamũ ĩsu nĩyanengiwe mwanya wa kũneena ndeto sya mĩtũlyo na sya kũmũuma Ngai, na yeetĩkĩlw'a kũtũmĩa ũkũmũ wayo vandũ va myei mĩongo ĩna na ĩlĩ.

6Nĩyambĩĩie kũumanga Ngai, ĩsyĩtwa yake, vala wĩkalaa, na onthe ala mekalaa ĩtunĩ.

7O ta ũu nĩyeetĩkĩlilw'e kũkita na aĩkĩĩi nĩ kana ĩmakĩlye vinya. Nĩyanengiwe ũkũmũ ĩũlũ wa andũ ma mbaĩ syonthe na ithyomo syonthe, na ma ngo syĩ kĩvathũkany'o.

8Andũ onthe ala matũaa ĩũlũ wa nthĩ makathaitha nyamũ ĩsu, ate o ala masyĩtwa moo maandĩkiwe kuma nthĩ ĩtanombwa, ĩvukunĩ ya thayũ ya kala Kalondu kaĩ koae.

9“Ũla wĩ kũtũ, nĩew'e!

10Ethĩwa mũndũ o na wĩva nĩ wa kwovwa, akoovwa, na ethĩwa mũndũ nĩ wa kũawa na ũvyũ, akooawa na ũvyũ. Kwoou ve vata mũnene mũno wa aĩkĩĩi methĩwe me na wũmĩĩsyo na mũĩkĩĩo.”

11Nĩvo ĩndĩ nasyokie noona nyamũ ĩngĩ mbai yaumĩlĩĩla vandũ nthĩ, nayo yaĩ na mbya ilĩ iilyĩ ta sya katena ka ĩlondu, na yaneenaa ta mũkũnga.

12Nyamũ ĩno nayo nĩyatũmĩaa ũtonyi wa ĩla ĩngĩ yaĩ mbee wayo, na kũtuma andũ onthe mathaitha ĩsu ya mbee, ĩla yaĩ mbou kĩtau kĩla kyaĩ vakuvĩ kũmyũaa.

13Nyamũ ĩsu nĩyeekie syama syĩ vinya, o na kũtuma mwaki ũtheea ĩũlũ wa nthĩ kuma ĩtunĩ andũ onthe masyaĩĩsye.

14Nĩyatũmĩie syama isu yeekaa yĩ mbee wa ĩsu ĩngĩ, yakenga andũ ala matũaa ĩũlũ wa nthĩ, na kũmea maseũvye mũvw'anano wa nyamũ ĩsu yatemetwe na ũvyũ ĩndĩ yaema kũkw'a.

15Nĩyanengiwe mwanya ĩvevee mũvw'anano ũsu wĩthĩwe thayũ, nĩ kana ũneene na kũtuma andũ onthe ala mataaĩtĩkĩla kũũthaitha moawa.

16O ta ũu nyamũ ĩsu ya kelĩ nĩyatumie andũ onthe mekĩwa ũvano vandũ kw'okonĩ kwa aũme kana kĩtulyanĩ kya ũthyũ. Vayaĩ kĩvathũkany'o kya ala me nguma na ala mate nguma, athwii kana ngya, ngombo kana ala mate ngombo.

17Ũu weekiwe nĩ kana vaikethĩwe mũndũ o na ũmwe ũtonya kũthooa kana kũthoosya kĩndũ atekĩĩtwe ũvano ũsu, naw'o nĩ w'o wonanasya ũndũ nyamũ ĩsu yĩtawa, kana ũyonany'a namba ya ĩsyĩtwa ya yo.

18Vaa ve vata wa mũndũ ethĩwe na ũĩ, nĩ kana atonye kũmanya namba ĩsu na kĩla yonanasya, nĩkwĩthĩwa nĩ namba ya mũndũ, nayo nĩ 666.

← Chapter 12 Jump to: Chapter 14 →